- પેટીએમ સામે આરબીઆઈએ લીધો મોટો એક્શન
- કંપની પર નવા કસ્ટમર જોડવા પર પ્રતિબંધ મૂક્યો
- 29 ફેબ્રુઆરી બાદ કંપની નવા કસ્ટમર નહીં જોડી શકે
ઓનલાઈન પેમેંટ સર્વિસની આપતી દિગ્ગજ કંપની પેટીએમને ભારતીય રિઝર્વ બેંક તરફથી મોટો ઝટકો મળ્યો છે. બુધવારે આ કંપની પર નવા કસ્ટમર જોડવા પર પ્રતિબંધ લગાડવામાં આવ્યું છે. એટલે કે હવે પીપીબીએલની સાથે નવો કોઈ કસ્ટમર જોડાઈ શકશે નહીં. કેન્દ્રીય બેંકે કહ્યું કે, આ નિર્ણય તાત્કાલિક ધોરણે લાગૂ કરવામાં આવી રહ્યો છે. જો કે બેંકનાં ગ્રાહકોને તેમના ખાતામાંથી બચત ખાતું, કરંટ એકાઉન્ટ, પ્રીપેડ ઇન્સ્ટ્રુમેન્ટ્સ, ફાસટેગ, નેશનલ કોમન મોબિલિટી કાર્ડ સહિત તેમના ખાતામાંથી કોઈપણ પ્રતિબંધ વિના બેલેન્સ ઉપાડવા અથવા વાપરવાની મંજૂરી આપવામાં આવશે, પણ પૈસા જમા કરી શકશે નહીં. આરબીઆઈએ બેંકિંગ રેગ્યુલેશન એક્ટ – 1949ની કલમ 35A હેઠળ પેટીએમ પેમેન્ટ્સ બેંક વિરુદ્ધ આ કાર્યવાહી કરી છે.
29 ફેબ્રુઆરી પછી બેંકિગ સેવાઓ બંધ
આરબીઆઈએ કહ્યું છે કે, 29 ફેબ્રુઆરી પછી પેટીએમ ગ્રાહકો ખાતા, પ્રીપેડ ઈન્સ્ટ્રુમેન્ટ, વોલેટ, ફાસ્ટેગ અને નેશનલ મોબિલિટી કાર્ડમાં પૈસા જમા કરાવી શકશે નહીં. જો કે તેમના ખાતામાં વ્યાજ, કેશબેક અને રિફંડ આવી શકે છે. આરબીઆઈએ કહ્યું છે કે, 29 ફેબ્રુઆરી પછી પેટીએમ પેમેન્ટ્સ બેંક દ્વારા કોઈ બેંકિંગ સેવા આપવામાં આવશે નહીં.
આરબીઆઈએ શા માટે કડક વલણ અપનાવ્યું?
રિઝર્વ બેંકની તરફથી પેટીએમ પેમેન્ટ બેન્ક પર લેવામાં આવેલ એક્શન અંગે કહેવામાં આવ્યું છે કે, એક ઓડિટ રિપોર્ટ અને બીજા ઓડિટર્સ દ્વારા આપવામાં આવેલ રિપોર્ટ બાદ પેટીએમની બેંકિંગ સર્વિસમાં નિયમોનાં ભંગ અને મેટિરિયલ સુપરવાઇઝરીને લગતી ઘણી બાબતો બહાર આવી હતી. જેના લીધે કેન્દ્રીય બેંક દ્વારા આ નિર્ણય લેવામાં આવ્યો છે.
નિયમો અને ધારાધોરણોનું ઉલ્લંઘન કર્યું
સેન્ટ્રલ બેંકે કહ્યું છે કે, સિસ્ટમ ઓડિટ રિપોર્ટ અને અનુગામી કમ્પાઇલેશન વેલિડેશન રિપોર્ટથી જાણવા મળ્યું છે કે, કંપનીએ સતત નિયમો અને ધારા-ધોરણોનું ઉલ્લંઘન કર્યું છે. આ ઉપરાંત પેટીએમ બેંક સંબંધિત પણ ઘણી ખામીઓ સામે આવી છે જેના કારણે ભવિષ્યમાં પણ તેની સામે જરૂરી પગલાં લેવામાં આવશે. આ આદેશ અનુસાર નવા ગ્રાહકો પર બેનની સાથે સાથે 29 જાન્યુઆરી 2024 બાદથી હાલનાં કસ્ટમરનાં એકાઉંટ્સમાં પણ ટ્રાંઝેક્શન પર રોક લગાડી દેવામાં આવી છે.
કંપનીનાં શેરમાં 20 ટકાનો ઘટાડો
શક્ય છે કે આરબીઆઈનાં આજના આ નિર્ણયની અસર કંપનીનાં શેર પર આવતી કાલે પડે…અત્રે ઉલ્લેખનીય છે કે થોડા સમય પહેલાં જ પેટીએમનાં શેરોમાં 20%નો ઘટાડો થયો હતો. જેની પાછળનું મુખ્ય કારણ પેટીએમ પેમેન્ટ બેન્ક દ્વારા ફાળવવામાં આવતી મિની પોસ્ટપેડ લોન હતું તેવું માનવામાં આવી રહ્યું છે.
