- અંડર-19 વર્લ્ડકપ 2024ની સેમિફાઈનલમાં ભારતની જીત
- સેમિફાઈનલમાં ભારતે સાઉથ આફ્રિકાને 2 વિકેટે હારવ્યું
- ટીમ ઈન્ડિયાએ સતત 5મી વખત ફાઇનલમાં પ્રવેશ કર્યો
અંડર-19 વર્લ્ડકપ 2024 હવે અંતિમ તબક્કામાં પહોંચી ગયો છે. ભારતીય ક્રિકેટ ટીમ અજેય રહીને ફાઇનલમાં પ્રવેશી છે. હવે ટૂર્નામેન્ટની ફાઈનલ મેચ ભારત અને પાકિસ્તાન વચ્ચે રમાઈ શકે છે. જો આમ થશે તો 18 વર્ષ પછી ટાઈટલ માટે ભારત અને પાકિસ્તાન વચ્ચે ટક્કર જોવા મળશે.
પ્રથમ સેમીફાઈનલમાં ટીમ ઈન્ડિયાએ સાઉથ આફ્રિકા સામે રોમાંચક મેચ જીતી હતી. ભારતીય અંડર-19 ટીમ હવે ફાઇનલમાં પ્રવેશી ચૂકી છે. ટૂર્નામેન્ટની બીજી સેમી ફાઈનલ મેચ પાકિસ્તાન અને ઓસ્ટ્રેલિયા વચ્ચે રમાવાની છે. જો પાકિસ્તાનની ટીમ આ મેચ જીતી જાય છે તો ફાઈનલમાં ભારત અને પાકિસ્તાન વચ્ચે મોટો મુકાબલો થઈ શકે છે.
ભારતીય ટીમે સેમિફાઇનલમાં 2 વિકેટે જીત મેળવી
અંડર-19 વર્લ્ડકપ 2024ની પ્રથમ સેમિફાઇનલ બેનોનીના વિલોમૂર પાર્ક ખાતે ભારત અને સાઉથ આફ્રિકા વચ્ચે રમાઈ હતી. પ્રથમ બેટિંગ કરીને સાઉથ આફ્રિકાની અંડર-19 ટીમે 50 ઓવરમાં સાત વિકેટે 244 રન બનાવ્યા હતા. જેના જવાબમાં ભારતીય અંડર-19 ટીમે એક સમયે માત્ર 32 રનમાં ચાર મહત્વની વિકેટ ગુમાવી દીધી હતી. જો કે આ પછી કેપ્ટન ઉદય સહારન (81 રન) અને સચિન દાસ (96 રન)એ પાંચમી વિકેટ માટે 171 રનની ભાગીદારી કરીને મેચમાં વાપસી કરી હતી. અંતે, ટીમ ઈન્ડિયાએ સેમિફાઈનલ મેચ 2 વિકેટથી જીતી લીધી અને સતત 5મી વખત ફાઇનલમાં પ્રવેશ કર્યો.
11મી ફેબ્રુઆરીએ ફાઈનલ રમાશે
અંડર-19 વર્લ્ડકપ 2024ની ફાઇનલ મેચ 11 ફેબ્રુઆરીએ રમાશે. આ પહેલા 8 ફેબ્રુઆરીએ ટૂર્નામેન્ટની બીજી સેમિફાઇનલ ઓસ્ટ્રેલિયા અને પાકિસ્તાન વચ્ચે રમાશે. ભારતની જેમ પાકિસ્તાન અને ઓસ્ટ્રેલિયા પણ ટૂર્નામેન્ટમાં અજેય રહ્યા છે. પાકિસ્તાને તેની તમામ મેચો જીતી લીધી છે, જ્યારે ઓસ્ટ્રેલિયાની છેલ્લી મેચ રદ કરવામાં આવી હતી. જો પાકિસ્તાનની ટીમ સેમીફાઈનલમાં ઓસ્ટ્રેલિયાને હરાવશે તો 11 ફેબ્રુઆરીએ ભારત અને પાકિસ્તાન વચ્ચે ફાઈનલ મેચ રમાશે.
18 વર્ષ બાદ ભારત અને પાકિસ્તાન વચ્ચે ફાઈનલ રમાશે
2006માં અંડર-19 વર્લ્ડકપની ફાઈનલ ભારત અને પાકિસ્તાન વચ્ચે રમાઈ હતી. આ લો સ્કોરિંગ મેચ પાકિસ્તાને જીતી હતી. ફાઈનલ મેચમાં પાકિસ્તાનની ટીમ માત્ર 109 રનમાં ઓલઆઉટ થઈ ગઈ હતી. જો કે આ પછી તેણે ભારતીય ટીમને માત્ર 71 રન જ બનાવવા દીધા હતા. આવી સ્થિતિમાં જો આ વખતે ભારત અને પાકિસ્તાન વચ્ચે ફાઈનલ થશે તો ટીમ ઈન્ડિયા ચોક્કસપણે 18 વર્ષ જૂની હારનો બદલો લેવા માંગશે.
