- ધ્રાંગધ્રા શહેરની ખારી શેરી, તાલુકાના કોંઢ અને થાનના નવાગામમાં જુગારના દરોડા
- રોકડ, મોબાઈલ, બાઈક સહિત રૂપિયા 2,86,670નો મુદ્દામાલ જપ્ત કરાયો
- નવાગામ થયેલા દરોડામાં 3 જુગારિયાઓ પોલીસને થાપ આપી
ધ્રાંગધ્રા શહેરની ખારી શેરી, તાલુકાના કોંઢ અને થાનના નવાગામમાં પોલીસે જુગારના દરોડા કર્યા હતા. જેમાં કુલ 11 જુગારિયાઓ રોકડ, મોબાઈલ અને બાઈક સહિત રૂપિયા 2,86,670ની મત્તા સાથે ઝડપાયા હતા. થાનના નવાગામ થયેલા દરોડામાં 3 જુગારિયાઓ પોલીસને થાપ આપી ફરાર થઈ ગયા હતા.
સુરેન્દ્રનગર એલસીબી ટીમના પી.એન. ઝાલા, દશરથભાઈ સહિતનાઓને ધ્રાંગધ્રા તાલુકાના કોંઢ ગામે પોસ્ટ ઓફીસ પાછળના ભાગે અમુક શખ્સો ગંજીપાનાનો જુગાર રમતા હોવાની બાતમી મળતા દરોડો કરાયો હતો. જેમાં કલ્યાણપુરનો મુનેશ ઉર્ફે ભુરો બેચરભાઈ તારબુંદીયા, ઢવાણાનો ભરત અમરસીંહભાઈ દુધરેજીયા, ધ્રાંગધ્રાનો ઝુલ્ફીકાર ઉર્ફે જુલો મુસ્તુફાભાઈ મંડલી, મહીપાલસીંહ ભરતસીંહ ટાંક અને મનોજસીંહ ઉર્ફે મોટભા મેરૂભા ઝાલા ઝડપાયા હતા. આ શખ્સો પાસેથી રોકડા રૂ. 83,200, રૂ. 55 હજારના 4 મોબાઈલ ફોન અને રૂ. 1.30 લાખના 3 બાઈક મળી કુલ રૂપિયા 2,68,200નો મુદ્દામાલ જપ્ત કરાયો છે. જયારે થાન પોલીસે બાતમીને આધારે નવાગામના સ્મશાન પાસે આવેલ વોકળામાં જુગારની રેડ કરી હતી. જેમાં ધીરૂ સવાભાઈ સારલા, પભા વાલજીભાઈ ડાભી અને જનક સામાભાઈ મીઠાપરા ગંજીપાના વડે પૈસાની હારજીતનો જુગાર રમતા રોકડા રૂપિયા 3220, રૂપિયા 5 હજારનો મોબાઈલ ફોન મળી કુલ રૂપિયા 8,220ની મત્તા સાથે ઝડપાયા હતા. આ દરોડામાં વિનુ કેશાભાઈ સાબરીયા, દેવાયતભાઈ કાઠી દરબાર અને લધુભાઈના જમાઈ ફરાર થઈ ગયા હતા. બીજી તરફ ધ્રાંગધ્રાની ખારીશેરીમાં આવેલ ખવાસ સમાજની વાડી પાસે જુગાર રમતા નીલેશ ગીરીશભાઈ લાલુકીયા, ભાવેશ રણછોડભાઈ મેવાડા અને જીલા સેલાભાઈ મેવાડા ઝડપાયા હતા. આ શખ્સો પાસેથી રૂપિયા 10,250 રોકડા કબજે કરી ધ્રાંગધ્રા સિટી પોલીસ મથકે ફરિયાદ નોંધી વધુ તપાસ એ.એ.મલેક ચલાવી રહ્યા છે.
