- રાંચીમાં ટીમ ઈન્ડિયાએ ઈંગ્લેન્ડને 5 વિકેટે હરાવ્યું
- ટીમ ઈન્ડિયાએ 3-1થી સીરિઝ કબ્જે કરી
- ઘરઆંગણે ભારત સતત 17મી ટેસ્ટ સીરિઝ જીત્યું
ભારતે રાંચી ટેસ્ટમાં ઈંગ્લેન્ડને હરાવ્યું છે. ભારતીય ટીમે અંગ્રેજોને 5 વિકેટે હરાવીને સીરિઝ જીતી લીધી છે. આ સાથે ભારતીય ટીમે પાંચ મેચોની સીરિઝ પણ 3-1થી જીતી લીધી છે. જોકે ભારતને જીતવા માટે સખત સંઘર્ષ કરવો પડ્યો હતો. ભારતીય બેટ્સમેનો ઇંગ્લિશ સ્પિનરો સામે સંઘર્ષ કરતા રહ્યા, પરંતુ આખરે શુભમન ગિલ અને ધ્રુવ જુરેલની જોડીએ ટીમને જીત તરફ દોરી હતી. આ ભારતીય ટીમને જીતવા માટે 192 રનનો ટાર્ગેટ હતો. ભારતે 5 વિકેટે 192 રન બનાવીને અંગ્રેજોની સીરિઝ જીતવાની આશા પર પાણી ફરી વળ્યું હતું.
જો કે, એક સમયે ભારતે 120 રનમાં 5 વિકેટ ગુમાવી દીધી હતી. ઇંગ્લિશ સ્પિનરો ભારતીય ટીમ માટે મોટો પડકાર બની ગયા હતા, પરંતુ શુભમન ગિલ અને ધ્રુવ જુરેલે શાનદાર પાર્ટનરશિપ કરીને ઇંગ્લેન્ડની યોજનાઓને બરબાદ કરી દીધી હતી. શુભમન ગિલ 52 રન બનાવીને અણનમ પરત ફર્યો હતો. જ્યારે ધ્રુવ જુરેલે 39 રનની મહત્વની ઇનિંગ રમી હતી. શુભમન ગિલ અને ધ્રુવ જુરેલ વચ્ચે છઠ્ઠી વિકેટ માટે 72 રનની અણનમ પાર્ટનરશિપ થઈ હતી.
ભારતનો મિડલ ઓર્ડર ફ્લોપ
આ પહેલા ભારતીય ઓપનર રોહિત શર્મા અને યશસ્વી જયસ્વાલે પ્રથમ વિકેટ માટે 84 રન જોડ્યા હતા. રોહિત શર્માએ 55 રનની ઇનિંગ રમી હતી. જ્યારે યશસ્વી જયસ્વાલે 37 રન બનાવ્યા હતા. પરંતુ આ પછી ભારતના મિડલ ઓર્ડર બેટ્સમેનો ઝડપથી પેવેલિયન પરત ફર્યા હતા. પરંતુ શુભમન ગિલ અને ધ્રુવ જુરેલે બેન સ્ટોક્સની ટીમને ફરી કોઈ તક આપી ન હતી. ઈંગ્લેન્ડ તરફથી શોએબ બશીર સૌથી સફળ બોલર રહ્યો હતો. શોએબ બશીરે 3 ભારતીય બેટ્સમેનોને પોતાનો શિકાર બનાવ્યા હતા. આ સિવાય જો રૂટ અને ટોમ હાર્ટલીએ 1-1 વિકેટ લીધી હતી.
ધ્રુવ જુરેલ બન્યો સંકટમોચન
ઈંગ્લેન્ડે પ્રથમ દાવમાં 353 રન બનાવ્યા હતા. જેના જવાબમાં ભારતીય ટીમ 177 રનમાં 7 વિકેટ ગુમાવીને સંઘર્ષ કરી રહી હતી. પરંતુ ધ્રુવ જુરેલ ટીમ ઈન્ડિયા માટે સંકટમોચન બન્યો અને ટીમને મુશ્કેલીમાંથી બહાર કાઢી હતી. ધ્રુવ જુરેલે પ્રથમ દાવમાં 90 રનની મહત્વપૂર્ણ ઇનિંગ રમી હતી. જેના કારણે ભારતીય ટીમે પ્રથમ દાવમાં 307 રન બનાવ્યા હતા. આ રીતે ધ્રુવ જુરેલની ઇનિંગના કારણે ઇંગ્લિશ ટીમ મોટી લીડ મેળવી શકી ન હતી.
ઈંગ્લેન્ડનો બીજો દાવ માત્ર 145 રનમાં સમેટાઈ ગયો હતો. ઈંગ્લેન્ડની બીજી ઈનિંગમાં રવિ અશ્વિને સૌથી વધુ 5 વિકેટ લીધી હતી. આ રીતે ભારતને 192 રનનો ટાર્ગેટ મળ્યો હતો, પરંતુ જે રીતે બોલ સ્પિન થઈ રહ્યો હતો, તે પડકાર આસાન નહોતો. રોહિત શર્મા અને યશસ્વી જયસ્વાલની સારી ઓપનિંગ પાર્ટનરશિપ બાદ શુભમન ગિલ અને ધ્રુવ જુરેલે મહત્વની ભૂમિકા ભજવીને ટીમને જીત અપાવી હતી.
