નવો પેંતરો: વોશિંગ મશીન બાદ એરકુલરમાં દારુની હેરાફેરી

• અમદાવાદમાં એરકુલરની આડમાં દારુની હેરાફેરી
  
• નરોડા પોલીસે કન્ટેનરમાંથી વિદેશી દારૂ ઝડપ્યો
  
• દારૂની 3960 બોટલ સાથે 21.18 લાખનો દારૂ જપ્ત
  

ગુજરાત રાજ્યમાં દારૂ ઘુસાડવાનો નવો પેંતરો બુટલેગરોએ અજમાવ્યો છે. જેમાં વોશિંગ મશીન બાદ એરકુલરમાં દારુની હેરાફેરી થઇ રહી છે. ત્યારે અમદાવાદમાં એરકુલરની આડમાં દારુની હેરાફેરી કરતા નરોડા પોલીસે કન્ટેનરમાંથી વિદેશી દારૂ ઝડપ્યો છે.

પોલીસથી બચવા બુટલેગરે કન્ટેનરની આગળ કાર રાખી

દારૂની 3960 બોટલ સાથે 21.18 લાખનો દારૂ જપ્ત કરવામાં આવ્યો છે. જેમાં પોલીસથી બચવા બુટલેગરે કન્ટેનરની આગળ કાર રાખી હતી. તેથી પોલીસે દારૂ સહિતના મુદ્દામાલ સાથે 4 આરોપીને ઝડપ્યા છે. જેમાં 4 આરોપીઓની ધરપકડ કરી કાર, કન્ટેનર, એરફૂલર સહિત ₹79.50 લાખનો મુદ્દામાલ કબ્જે કરાયો છે. તેમજ નરોડા પોલીસે વધુ તપાસ હાથ ધરી છે.

વોશીંગ મશીનની આડમાં દારૂ

અગાઉ અમદાવાદ પોલીસના પીસીબીના સ્ટાફે બુધવારે રાતના સમયે નાના ચિલોડા સર્કલથી નરોડા જીઆઇડીસી પાસે બાતમીને આધારે દરોડો પાડીને વોશીંગ મશીનની આડમાં લઇ જવામાં આવી રહેલો રૂપિયા 17 લાખની કિંમતનો વિદેશી દારૂનો જથ્થો જપ્ત કર્યો હતો. પ્રાથમિક તપાસમાં આ દારૂ પંજાબથી લોડ કરીને અસલાલી સર્કલ સુધી પહોંચાડવા માટેની સુચના ડ્રાઇવરને આપવામાં આવી હતી. આ અંગે પોલીસે વધુ તપાસ શરૂ કરી છે. પીસીબીનો સ્ટાફ બુધવારે રાતના સમયે પેટ્રોલીંગમાં હતો. ત્યારે પોલીસ ઇન્સ્પેક્ટર એમસી ચૌધરીને બાતમી મળી હતી કે નાના ચિલોડા સર્કલથી એક કન્ટેઇનરમાં દારૂનો મોટો જથ્થો અસલાલી સર્કલ તરફ લઇ જવાનો છે. જેના આધારે સ્ટાફે વોચ ગોઠવીને એક શંકાસ્પદ કન્ટેઇનરને રોકવાની સુચના આપી હતી. જો કે ડ્રાઇવરે સ્પીડ વધારી હતી. જેથી પીછો કરીને નરોડા જીઆઇડીસી પાસે કન્ટેઇનરને રોકીને પુછપરછ કરતા ડ્રાઇવરે વોશીંગ મશીનનો સ્ટોક હોવાની વાત કરી હતી. જો કે તપાસ કરતા વોશીંગ મશીનની આડમાં છુપાવવામાં આવેલી રૂપિયા 17 લાખની કિંમતની વિદેશી દારૂ અને બિયરની 7300 જેટલી બોટલો મળી આવી હતી.