- માલ વાહક વાહનોમાં મુસાફરોની હેરાફેરીથી હાલાકી
- 10 થી વધુ મુસાફરોને ઇજા થતાં સારવાર હેઠળ ખસેડાયા
- પિક-અપમાં સવાર મજૂરો પૈકી એક મજુરનું ઘટના સ્થળેજ મોત નિપજ્યુ
- વાગરાની વિલાયત જીઆઈડીસીમાં કામદારોને લઈને જતો પિક-અપ ટેમ્પો પલ્ટી ખાતા ગોઝારો અકસ્માત સર્જાયો હતો. જેમાં બે લોકોના કરુણ મોત નિપજ્યા હતા. જ્યારે 10 વ્યક્તિઓને ઇજા થતા સારવાર હેઠળ ખસેડવામાં આવ્યા છે. બનાવની જાણ થતાંજ વાગરા પોલીસ સહિત ડી.વાય.એસ.પી. પણ ઘટના સ્થળે દોડી જઇ જરૂરી કાર્યવાહી આરંભી હતી. વાગરા પોલીસે સ્થળ પર પહોંચી કાયદેસરની તપાસ હાથ ધરી હતી.
આજે વહેલી સવારે લેબરો ભરીને વિલાયત જીઆઈડીસીમાં આવેલ જ્યુબિલિયન્ટ કંપનીમાં પીક-અપ ટેમ્પો જઈ રહ્યો હતો. આ દરમિયાન વિલાયત GIDC માં આવેલ કલરટેક્ષ કંપની નજીક આવેલ ચોકડી ઉપર કોઈક કારણસર પિક-અપ પલ્ટી જતા અકસ્માતની કરુણ ઘટના બની હતી. પિક-અપમાં સવાર મજૂરો પૈકી એક મજુરનું ઘટના સ્થળેજ મોત નિપજ્યુ હતુ.
તેમજ વધુ ઇજાઓના પગલે અન્ય એક કામદારનું પણ ટૂંકી સારવાર બાદ મોત નિપજ્યુ હતુ. જ્યારે ડ્રાઈવર સહિત દશ થી વધુ મુસાફ્રો ગંભીર રીતે ઇજાગ્રસ્ત થતા ભરૂચ સારવાર માટે ખસેડાયા હતા. ઇજાગ્રસ્તોની હાલત જોતા મૃત્યુઆંક વધવાની શક્યતાઓ સેવાઇ રહી છે.ઘટનાની જાણ વાગરા પોલીસને થતા પોલીસ કાફ્લો ઘટના સ્થળે દોડી ગયો હતો.ત્યાર બાદ DYSP એ પણ ઘટના સ્થળની મુલાકાત લઇ વધુ તપાસ હાથ ધરી હતી.
ઔદ્યોગિક વસાહતમાં માલ વાહક વાહનોમાં પણ ગેટા બકરા માફ્ક મુસાફરોને બેસાડીને પૂરપાટ ઝડપે દોડતા ટેમ્પાઓથી લોકોના જીવ જોખમાય રહ્યા છે. ભૂતકાળમાં પણ આવી ઘટનાઓ બની ચૂકી છે. થોડા સમય પહેલાં પણ કામદારો ભરેલ આઈશર ટેમ્પો પલ્ટી ખાતા ત્રીસ થી વધુ કામદારોના જીવ જોખમાયા હતા. આજરોજ બનેલ અકસ્માતની ઘટના તેનું ઉત્તમ ઉદાહરણ છે.
GIDCના ખખડધજ રસ્તાથી અકસ્માતનો ભય
GIDC માં આવેલ તમામ રૂટ પરના માર્ગો અત્યંત જોખમી બની ગયા છે. ઠેક-ઠેકાણે મસ મોટા ખાડાઓનું સામ્રાજય જામ્યુ છે. હાલ સર્જાયેલ અકસ્માતવાળી જગ્યાએ પણ ગુટણ સમાં ખાડાઓ પડેલ છે. ભૂતકાળમાં પણ આજ ચોકડી પર અકસ્માત સર્જાયો હતો.જેમાં એક બાઇક ચાલકને જીવ ગુમાવવાનો વાળો આવ્યો હતો.GIDC માં સર્જાતા અકસ્માતોનું મુખ્ય કારણ જોખમી ખાડાઓ સાબિત થઈ રહ્યા છે. તંત્ર જાગી GIDC ના રસ્તાઓ નું મરામત કાર્ય કરાવી અકસ્માતોને નિવારવા નું કાર્ય જલ્દી કરે એવી લોક માંગ ઉઠવા પામી છે.
