Mehsana Rain: ઉત્તર ગુજરાતમાં પણ મેઘમહેર, મહેસાણામાં ધોધમાર વરસાદ

• મહેસાણા કડીમાં ધોધમાર વરસાદ
  
• કડી શહેર સહિત ગ્રામ્ય વિસ્તારમાં વરસાદ
  
• દિવસભર ભારે ઉકળાટ બાદ રાત્રે વરસાદ
  

સૌરાષ્ટ્ર સહિત સમગ્ર ગુજરાત ચોમાસાની કાગડોળે રાહ જોઈ રહ્યું છે. સૌરાષ્ટ્ર સહિત સમગ્ર ગુજરાતમાં છેલ્લા કેટલાક સમયથી અંગ દાઝડતી ગરમીથી આજે અચાનક રાહત મળી છે. આજે, ગુજરાતના અનેક વિસ્તારોમાં આકાશેથી કાચું સોનું વરસ્યું છે અને તરસી ધરતીને તૃપ્ત થઈ છે. આજે, સૌરાષ્ટ્રના રાજકોટ, ભાવનગર, જામનગર સહિતના જિલ્લાઓમાં વાતાવરણમાં પલટો આવ્યો છે અને વરસાદ થયો છે. તો સાથે સાથે મોડી સાંજે અમદાવાદ અને મહેસાણામાં પણ વરસાદ થયો છે. 

કડી શહેર સહિત ગ્રામ્ય વિસ્તારોમાં વરસાદ 

છેલ્લા કેટલાય સમયથી ગરમીમાં શેકતા ઉત્તર ગુજરાતના મહેસાણામાં આજે મેઘમહેર થઈ છે. મહેસાણા જિલ્લાના કડીમાં આજે મોડી સાંજે  ધોધમાર વરસાદ શરૂ થઈ ગયો છે. મહેસાણા જિલ્લાના કડી શહેર સહિત ગ્રામ્ય વિસ્તારમાં ધોધમાર વરસાદ ખાબકી ગયો છે.  દિવસભરના ઉકળાટ બાદ વરસાદ થતાં વાતાવરણમાં ઠંડક પ્રસરી ગઈ હતી. મળતી માહિતી મુજબ કડીમાં ભારે પવન સાથે વરસાદ થયો હતો. 

અમદાવાદના અનેક વિસ્તારોમાં વરસાદ 

અમદાવાદ શહેરના વિવિધ વિસ્તારમાં સાંજ બાદ વરસાદ શરૂ થયો હતો. પ્રહલાદનગર, એસજી હાઈવે, ચાંદખેડા સહિત ઘણા વિસ્તારોમાં વરસાદી ઝાપટા પડ્યા છે. કેટલીક જગ્યાએ ઝરમર વરસાદ પડ્યો હતો. શહેરમાં ભારે બફારા વચ્ચે અચાનક વાતાવરણમાં પલટો આવ્યો હતો. અમદાવાદ સિવાય ગાંધીનગરમાં પણ વરસાદી છાંટા પડ્યા હતા.

વરસાદને લઇ હવામાનની આગાહી

મંગળવારે રાજ્યના અનેક જિલ્લાઓમાં વરસાદની આગાહી કરવામાં આવી છે. 11 જૂને સાબરકાંઠા, અરવલ્લી, પંચમહાલ, દાહોદ, મહીસાગર, વડોદરા, છોટાઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી, દમણ, દાદરા નગર, હવેલી, જુનાગઢ, અમરેલી, ભાવનગર, ગીર સોમનાથમાં વરસાદની આગાહી કરવામાં આવી છે.