રોયલ ચેલેન્જર્સ બેંગલુરુ અને ચેન્નાઈ સુપર કિંગ્સ વચ્ચેની મેચ એમએ ચિદમ્બરમ સ્ટેડિયમ ખાતે રમાવાની છે. આ હાઈ-વોલ્ટેજ મેચ પહેલા, ચેન્નાઈ સુપર કિંગ્સના ભૂતપૂર્વ ક્રિકેટરો અંબાતી રાયડુ અને એસ બદ્રીનાથે RCBના ટ્રોફી વિજેતા બનવાના સપનાની મજાક ઉડાવી છે.
વીડિયો થયો વાયરલ
સોશિયલ મીડિયા પર વાયરલ થયેલા એક વીડિયોમાં બંને ભૂતપૂર્વ ખેલાડીઓ લાંબા સમય સુધી ટ્રોફી ન જીતવાના RCBના સંઘર્ષની મજાકમાં ચર્ચા કરતા જોવા મળ્યા હતા. બદ્રીનાથે મજાકમાં પૂછ્યું કે શું RCB આ વર્ષે ચેન્નાઈમાં જીતનો દુષ્કાળ પૂરો કરશે? આ સાંભળીને બંને ખેલાડીઓ હસી પડ્યા અને રાયડુએ કહ્યું કે તેને હંમેશા RCB ની મહેનત જોવાની મજા આવે છે.
બંને ટીમો વચ્ચે ટક્કરની મેચ જોવા મળશે
આ સિઝનની પહેલી મેચમાં CSK એ મુંબઈ ઈન્ડિયન્સને હરાવ્યું, જ્યારે RCB એ કોલકાતા નાઈટ રાઈડર્સને હરાવ્યું. આવી સ્થિતિમાં, બંને ટીમો વચ્ચે ટક્કરની મેચ જોવા મળશે. મોટી વાત એ છે કે બેંગલુરુની ટીમ છેલ્લા 17 વર્ષથી ચેન્નાઈને તેના હોમ ગ્રાઉન્ડ પર હરાવી શકી નથી. આ વખતે પરિણામ શું આવશે તે જોવું રસપ્રદ રહેશે.
અત્યાર સુધીમાં RCB અને CSK વચ્ચે 33 મેચ રમાઈ છે, જેમાં ચેન્નાઈએ 21 વખત જીત મેળવી છે, જ્યારે બેંગલુરુએ ફક્ત 11 મેચ જીતી છે. ગયા વર્ષે, IPL 2024 માં બંને ટીમો વચ્ચેની છેલ્લી ગ્રુપ સ્ટેજ મેચમાં RCB એ CSK ને 24 રને હરાવ્યું હતું. હવે જોવાનું એ રહ્યું કે શું RCB આ વખતે ચેન્નાઈની ધરતી પર હારનો સિલસિલો તોડી શકશે કે પછી CSK ફરી એકવાર RCB પર પોતાનો દબદબો જાળવી રાખશે.
