ઉત્તર પ્રદેશમાં એક મહિલાને પાણીપુરી ખાવી ખરા અર્થમાં ભારે પડી ગઈ અને પાણીપુરીના પ્રેમમાં મહિલાની પરિસ્થિતિ એટલી ખરાબ થઈ ગઈ કે તેને તાત્કાલિક હોસ્પિટલમાં લઈ જવી પડી.
પાણીપુરિએ પરચા પૂર્યા
ઉત્તર પ્રદેશના ઔરૈયા જિલ્લામાં એક વિચિત્ર ઘટના બની છે, જ્યાં પાણીપુરી ખાવાથી એક મહિલાને મોટી મુશ્કેલીનો સામનો કરવો પડ્યો હતો. વાસ્તવમાં દિબિયાપુરથી ઔરૈયા કોઈ કામ માટે આવેલી એક મહિલાએ પાણીપુરી ખાતી વખતે મોં ખોલ્યું અને પછી મોં અચાનક ખુલેલુંજ રહી ગયું. મહિલાને જડબું ખોલતા સમયે એ એની મૂળ જગ્યાએથી ખસી ગયું હતું.
સ્થાનિકોમાં ચર્ચાનો વિષય બની આ ઘટના
મળતી માહિતી મુજબ આ મહિલા કાકોર નજીક ગૌરી કિશનપુરના રહેવાસી વીરેન્દ્રની પત્ની ઇન્કલા દેવી છે જે ગઈ કાળ રાતથી તેમની ભત્રીજીની પુત્રવધૂને બાળકનો જન્મ થયો હોવાના સમાચાર મળવાથી પરિવાર સહિત હોસ્પિટલમાં રોકાઈ હતી. આ દરમિયાન સવારે જ્યારે બાળકોને ભૂખ લાગી, ત્યારે બાળકો સાથે તેણે પાણીપુરી ખાવાનો વિચાર કર્યો અને પરિવાર સાથે નજીકમાં ખાવા બેઠા અને મોંમાં પાણીપુરી નાખવાનો પ્રયત્ન કરતાં તેમનું જડબું અચાનક ખૂલી ગયું.
ડોકટરે જણાવ્યું કારણ
ડોકટરે જણાવ્યું કે આ ઘટના જે ઇન્કલા દેવી સાથે થઈ તે કોઇપણ સાથે થઈ શકે છે. જો કોઈ વ્યક્તિ એક સાથે મોટી ખાદ્ય વસ્તુઓ ખાવા ઝડપથી મોં ખોલવાનો પ્રયત્ન કરે છે તો ઘણીવાર જડબુ તેના મૂળ સ્થાનથી ખસી જાય છે અને બાદમાં તેને પુનઃસ્થાપિત કરવામાં પણ મોટી સમસ્યા આવી શકે છે. જોકે હાલ મહિલાને અદ્યતન તબીબી સુવિધાઓ ધરાવતી હોસ્પિટલમાં ખસેડવામાં આવી છે, જ્યાં સારવાર ચાલુ છે. પાણીપુરી સ્ટોલનો માલિક પણ આ ઘટના બાદ ચિંતામાં છે.
આ પણ વાંચો: ડિજિટલ એરેસ્ટના દરેક કેસની તપાસ હવે CBI કરશે, સુપ્રીમ કોર્ટનો આદેશ, RBIને પણ પાઠવી નોટિસ
