ટીડીઓની કોન્ટ્રાકટરો સાથે મિલીભગતનો આક્ષેપ
વાલાસીમડી, મજેવડી, ઇવનગર, પ્લાસવા, પાદરીયામાં કામગીરીમાં લોટ પાણીને લાકડા
અગ્ર ગુજરાત, જૂનાગઢ
ગુજરાત સરકાર દ્વારા ગ્રામ્યસ્તરે લોકોની સુખાકારી માટે કરોડો રૂપિયાની ગ્રાન્ટ ફાળવવામાં આવે છે. પરંતુ, જૂનાગઢ તાલુકામાં આ ગ્રાન્ટનો ઉપયોગ લોકોની સુવિધા માટે નહીં પણ અધિકારીઓ અને કોન્ટ્રાક્ટરોના ખિસ્સા ભરવા માટે થતો હોય તેવું ચિત્ર ઉપસી રહ્યું છે. જૂનાગઢ-86 વિધાનસભા મતવિસ્તારના ધારાસભ્ય સંજય કોરડિયાએ જ્યારે જિલ્લા કલેક્ટરને પત્ર લખીને ગંભીર તપાસની માંગ કરી, ત્યારે તંત્રમાં ફફડાટ મચી ગયો છે. વાલાસીમડી, મજેવડી , ઈવનગર,પ્લાસવા અને પાદરીયા ગામે ઘણા ગામોમાં નાખેલા પેવર બ્લોક ભ્રષ્ટાચાર ઉજાગર કરતા હતા.તો ક્યાંક ગટરમાં પાણી જવું જોઈએ તે રોડ પર વહેતું દેખાયું હતું.વાલાસીમડી ગામે તો ગ્રામજનો અને પશુઓ માટે પાણીના બોર બનાવવાનું કામ કાગળ પર આ કામ પૂર્ણ બતાવીને સવા લાખ રૂપિયા (1.25 લાખ) ઉધારી લેવામાં આવ્યા છે. પરંતુ આશ્ચર્યની વાત એ છે કે, બોરમાં મોટર નાખવામાં જ આવી નથી.
ગામના સભ્ય ભીખાભાઈ રાઠોડે જણાવ્યું હતું કે, “અહીં સવા લાખ રૂપિયાનો બોર થયો છે પણ પાણી આવ્યું નથી. આજે ખબર પડી કે કાગળ પર મોટર નખાઈ ગઈ છે અને પૈસા પણ ઉપડી ગયા છે, પણ સ્થળ પર મોટર છે જ નહીં.” આ ઘટના સીધો પુરાવો આપે છે કે કઈ રીતે જનતાના પૈસાની ઉઘાડી લૂંટ ચાલી રહી છે.
આ સમગ્ર કૌભાંડમાં સૌથી વધુ આંગળી જૂનાગઢના તાલુકા વિકાસ અધિકારી રાજેન્દ્ર ઠાકોર પર ચિંધાઈ રહી છે. ગામના સરપંચ અને ઉપસરપંચોએ ખુલ્લેઆમ આક્ષેપ કર્યો છે કે TDO રાજેન્દ્ર ઠાકોર કોન્ટ્રાક્ટરો સાથે ભાગીદારીમાં કામ કરે છે. વાલાસીમડીના સરપંચ દેવરાજભાઈએ વ્યથા ઠાલવતા કહ્યું કે, તંત્રમાં અમારું કંઈ ચાલતું નથી. અધિકારીઓ અને કોન્ટ્રાક્ટરો જાણે પાર્ટનરશિપમાં ધંધો કરતા હોય તેમ મનસ્વી રીતે કામ કરે છે. દોઢ લાખની ગટર બનાવી જેમાં માત્ર અડધો ફૂટ ઊંડો હલકી ગુણવત્તાનો પાઇપ નાખ્યો છે. વારંવાર રજૂઆત છતાં TDO સાંભળતા નથી કારણ કે તેમની ભાગીદારી છે.
ઈવનગરમાં પેવર બ્લોકમાં ગેરરીતિનો ઉપસરપંચનો આક્ષેપ
ઈવનગરના ઉપસરપંચ પરેશ ભુતે TDO પર આકરા પ્રહારો કર્યા છે. તેમણે જણાવ્યું કે વોર્ડ નંબર 5માં 15માં નાણા પંચની ગ્રાન્ટમાંથી ગટરનું કામ થયું છે જે એક વર્ષથી ઉભરાય છે. લાખોના ખર્ચે જે પેવર બ્લોક નાખવામાં આવ્યા તે એટલા નબળા છે કે અત્યારથી જ ઉખડવા લાગ્યા છે.
ગટરની નબળી કામગીરીને લઈ ધારાસભ્યએ કલેકટરને પત્ર લખ્યો
ધારાસભ્ય સંજય કોરડિયાએ જિલ્લા કલેક્ટરને લખેલા પત્રમાં ટેકનિકલ ક્ષતિઓનો પર્દાફાશ કર્યો છે. તેમણે જણાવ્યું કે ગટરના કામોમાં એન્જિનિયરિંગની કોઈ સમજ રાખવામાં આવી નથી. ગટરનો ઢાળ ઉંધો હોવાથી પાણી નીકળવાને બદલે ભરાઈ રહે છે. આટલી ગંભીર ભૂલો હોવા છતાં કયા અધિકારીએ ‘Completion Certificate’ (પૂર્ણતા પ્રમાણપત્ર) આપ્યું તે મોટો સવાલ છે. ધારાસભ્યએ માંગ કરી છે કે ટેકનિકલ ટીમ દ્વારા તપાસ કરાવી જે એજન્સીએ નબળું કામ કર્યું છે તેની પાસે ફરીથી યોગ્ય કામ કરાવવામાં આવે.
પ્લાસવા અને પાદરીયા: કરોડોની ગ્રાન્ટ છતાં સુવિધા શૂન્ય
પ્લાસવા ગામના દિનેશભાઈ ગોંડલીયાએ જણાવ્યું કે, 70 લાખથી વધુના કામો પેન્ડિંગ છે. રસ્તા માટે 2.50 કરોડની ગ્રાન્ટ ફાળવવામાં આવી છે છતાં ખેડૂતો અને વાહનચાલકો હાલાકી ભોગવી રહ્યા છે. બીજી તરફ પાદરીયા ગામના સરપંચ વેલજીભાઈ પાથરે જણાવ્યું કે, રસ્તાના કામો બે-ત્રણ વર્ષથી મંજૂર થયા હોવા છતાં એજન્સીઓ કામ શરૂ કરતી નથી. મેટલ કામ કરીને રસ્તા રેઢા મૂકી દેવાયા છે, જેના કારણે જનતા પરેશાન છે.
TDOએ કહ્યું- નબળા કામની કોઈ ફરિયાદ મળી નથી!
જ્યારે આ મામલે તાલુકા વિકાસ અધિકારી રાજેન્દ્ર ઠાકોરનો સંપર્ક કરવામાં આવ્યો ત્યારે તેમણે જાણે કઈ બન્યું જ ન હોય તેમ બચાવ કર્યો હતો. તેમણે કહ્યું કે, “મોટાભાગના કામો થઈ ગયા છે અને હજુ સુધી નબળા કામની કોઈ ફરિયાદ મળી નથી.” ગટરના પ્રશ્ને તેમણે વિચિત્ર જવાબ આપતા લોકોની બેદરકારીને જવાબદાર ગણાવી હતી.
