ફિલ્મી ઢબે જૂનાગઢથી .ઠાવી જામનગર તરફ લઇ ગયા હતા
જૂનાગઢમાં ૬૦ લાખની ખંડણી માટે CAનું અપહરણ : પોલીસ નજીક પહોંચતા અપહરણકારો નાસી છૂટયા
લોનના કમિશન બાબતે થયેલા ઝઘડા બાદ અપહરણ કરાયું : અપહરણકારોની શોધખોળ
અગ્ર ગુજરાત, જૂનાગઢ
જૂનાગઢમાં CA તરીકે પ્રેકટિસ કરતા મિલન ચૌહાણનું ફિલ્મી ઢબે અપહરણ કરી રૂપિયા 60 લાખની ખંડણી માગવામાં આવતા સનસનાટી મચી છે. અપહરણ થયાની જાણ થયા બાદ પોલીસ તુરંત જ એક્શનમાં આવતા જામનગર તરફ જઈ રહેલા અપહરણકારો ભોગ બનનારને ઉતારીને નાશી છૂટ્યા હતા. લોનના કમિશન બાબતે થયેલા ઝઘડા બાદ CAનું અપહરણ કરાયું હોવાનું સામે આવ્યું છે. પોલીસે અપહરણકાર જય ઓડેદરા અને તેના સાગરિતોની શોધખોળ શરૂ કરી છે.
માણાવદરના બોડકા ગામના વતની અને ખેતીકામ કરતા યશભાઈ શાંતિભાઈ મારુના બનેવી મિલનભાઈ ચૌહાણ જૂનાગઢમાં ઓફિસ ધરાવે છે. ગત તા. 23/01/2026ના રોજ સાંજે સાડા સાત વાગ્યાના અરસામાં મિલનભાઈ ઘરે આવવાનું કહી ઓફિસેથી નીકળ્યા હતા, પરંતુ તેઓ ઘરે પહોંચ્યા નહોતા. મોડી રાત સુધી તેમનો ફોન સ્વિચ ઓફ આવતા પરિવારે શોધખોળ આદરી હતી. આ દરમિયાન રાત્રે 12:24 વાગ્યે મિલનભાઈના જ ફોન પરથી સાળા યશભાઈને ફોન આવ્યો હતો, જેમાં મિલનભાઈએ ભયભીત અવાજે જણાવ્યું હતું કે જય ઓડેદરા નામનો શખ્સ તેમને ઉપાડી ગયો છે.
અપહરણકર્તાઓએ મિલનભાઈ પાસે ફોન કરાવીને માંગણી કરી હતી કે, “આવતીકાલે બપોરે 11 વાગ્યા સુધીમાં 60 લાખ રૂપિયા તૈયાર રાખજો અને પોલીસમાં ફરિયાદ કરતા નહીં.” એટલું જ નહીં, આરોપી જય ઓડેદરા સાથેના અન્ય એક શખ્સે ફોન લઈને ધમકી આપી હતી કે, જો લોનની મેટર પૂરી નહીં કરો તો મિલનભાઈને જીવતા નહીં છોડીએ. આ ધમકી બાદ પરિવાર સ્તબ્ધ થઈ ગયો હતો અને તાત્કાલિક પોલીસનો સંપર્ક સાધ્યો હતો.
ફરિયાદ મળતાની સાથે જ જૂનાગઢ બી-ડિવિઝન પોલીસ એક્શનમાં આવી હતી. પોલીસે ટેકનિકલ સોર્સ અને લોકેશન ટ્રેસિંગની મદદથી જાણ્યું કે અપહરણકર્તાઓ મિલનભાઈને જામનગર તરફ લઈ ગયા છે. પોલીસના વધતા દબાણને કારણે આરોપીઓ ભોગ બનનારને છોડીને નાસી છૂટ્યા હતા. મિલનભાઈ જામનગર પાસેથી સુરક્ષિત મળી આવ્યા છે. જોકે, મુખ્ય સૂત્રધાર જય ઓડેદરા અને તેની સાથેના અન્ય સંડોવાયેલા શખ્સોને પકડવા માટે પોલીસે કમર કસી છે. પોલીસ દ્વારા આરોપીઓના આશ્રયસ્થાનો અને સંભવિત ઠેકાણાઓ પર દરોડા પાડવા માટે અલગ-અલગ ટીમો કાર્યરત કરવામાં આવી છે.
પાંચ મહિના પહેલા લોનના નાણા બાબતે માથાકૂટ થઇ હતી
ભોગ બનનારના પરિવારના જણાવ્યા અનુસાર આજથી પાંચેક મહિના પહેલા જય ઓડેદરા અને હાર્દિક ઓડેદરા નામના શખ્સો સાથે લોનના નાણાં બાબતે મિલનભાઈને બોલાચાલી થઈ હતી. આ જ જૂની અદાવત રાખીને જય ઓડેદરાએ પોતાના સાથીદારો સાથે મળીને ખંડણી વસૂલવા માટે આ આખા કાવતરાને અંજામ આપ્યો હોવાનું જણાય છે. હાલમાં જૂનાગઢ પોલીસે જય ઓડેદરા અને તપાસમાં ખુલે તે તમામ આરોપીઓ વિરુદ્ધ ગુનો નોંધી, તેઓને જેલના સળિયા પાછળ ધકેલવા માટે તપાસનો વ્યાપ વધાર્યો છે. ટૂંક સમયમાં જ તમામ આરોપીઓની ધરપકડ કરવામાં આવશે તેવું પોલીસ સૂત્રો દ્વારા જાણવા મળ્યું છે.
