બાબરાના મોટા દેવળીયા ગામે તળાવમાં ડૂબેલા બાળકનો મૃતદેહ મળ્યો
ફાયરની ટીમે ચાર કલાક મહેનત કરતા મૃતદેહ હાથ લાગ્યો
અગ્ર ગુજરાત, અમરેલી
અમરેલી જિલ્લાના બાબરા તાલુકાના મોટા દેવળિયા ગામે એક દુર્ઘટના સામે આવી છે. મોટા દેવળિયા ગામમાં પશુ ચરાવવા નીકળેલા એક સગીર વયનો તરુણ અકસ્માતે નદીના ઊંડા પાણીના ઘુનામાં ડૂબી ગયો હતો. કલાકોના રેસ્ક્યુ ઓપરેશન બાદ આખરે તેનો મૃતદેહ મળી આવતા સ્થાનિક વિસ્તારમાં ભારે ચકચાર મચી ગઈ છે અને સમગ્ર પંથકમાં શોકનું મોજું ફરી વળ્યું છે. મળતી માહિતી મુજબ, બાબરાના મોટા દેવળિયા ગામે સીમમાં ભરત મેરામભાઈ બોહારીયા ઉંમર વર્ષ ૧૩ નામનો તરુણ પશુ ચરાવવા માટે સીમ વિસ્તારમાં ગયો હતો. આ દરમિયાન અચાનક કોઈ કારણસર આકસ્મિકે તે નદીમાં પડી જતાં પાણીનો પ્રવાહ વધુ હોવાથી તે સીધો ઊંડા પાણીના ઘુનામાં ગરકાવ થઈ ગયો હતો. આ તરુણ ડૂબ્યો હોવાની જાણ થતાં જ તાત્કાલિક ઘટના સ્થળે સ્થાનિક ગ્રામજનો મોટી સંખ્યામાં દોડી આવ્યા હતા અને બચાવ કામગીરી શરૂ કરી હતી. ઘટનાની ગંભીરતા જોઈને વહીવટી તંત્રના ઉચ્ચ અધિકારીઓ અને અમરેલી ફાયર વિભાગની ટીમ પણ તાત્કાલિક સ્થળ પર પહોંચી ગઈ હતી. સ્થાનિક તરવૈયાઓ બચાવ કામગીરીમા જોડાયા હતા. નદી અને આસપાસના તળાવના ભાગમાં સઘન શોધખોળ હાથ ધરવામાં આવી હતી. તરુણની ભાળ મેળવવા માટે ભારે જહેમત ઉઠાવવામાં આવી રહી હતી જેથી મદદ માટે NDRF ની ટીમને પણ બોલાવવામાં આવી હતી. NDRF અને ફાયર બ્રિગેડના જવાનોએ કલાકો સુધી નદીના ઊંડા પાણીમાં શોધખો કરી હતી. ભારે જહેમત બાદ અંતે તરુણ ભરત બોહારીયાનો મૃતદેહ નદીના ઊંડા ઘુનામાંથી મળી આવ્યો હતો. આ કરુણ ઘટનાને પગલે મૃતક તરુણના પરિવારમાં શોકમય માહોલ છવાયો છે.
