જામનગરમાં કારે બાઇકને હડફેટે લેતા પાંચ વર્ષની બાળકીનું સારવારમાં મોત
પિતાને ગંભીર ઇજા થતાં સારવારમાં ખસેડાયા : CCTVમાં સમગ્ર ઘટના કેદ
અગ્ર ગુજરાત, જામનગર
શહેરના કાલાવડ નાકા બહાર એક કાળજું કંપાવનારી અકસ્માતની ઘટના સામે આવી છે. પુરપાટ ઝડપે આવતી એક કાર અને બાઈક વચ્ચે જોરદાર ટક્કર થતા બાઈક પર સવાર પિતા-પુત્રી રસ્તા પર ફંગોળાયા હતા. આ દુર્ઘટનામાં ગંભીર રીતે ઇજાગ્રસ્ત થયેલી 5 વર્ષની માસૂમ બાળકીનું હોસ્પિટલમાં સારવાર દરમિયાન મોત નીપજ્યું છે.
મળતી માહિતી મુજબ, જામનગરના કાલાવડ નાકા બહાર બાઈક લઈને જઈ રહેલા પિતા અને તેમની પાંચ વર્ષની પુત્રીને એક કારે અડફેટે લીધા હતા. અકસ્માત એટલો ભયાનક હતો કે પિતા-પુત્રી બંનેને ગંભીર ઈજાઓ પહોંચી હતી. અકસ્માતને પગલે આસપાસના લોકોના ટોળા એકઠા થઈ ગયા હતા. સ્થાનિકોની મદદથી બંનેને તાત્કાલિક સારવાર અર્થે હોસ્પિટલ ખસેડવામાં આવ્યા હતા, પરંતુ કમનસીબે ટૂંકી સારવાર બાદ માસૂમ બાળકીએ દમ તોડ્યો હતો.
આ સમગ્ર અકસ્માતની ઘટનાના લાઈવ સીસીટીવી ફૂટેજ સામે આવ્યા છે, જેમાં જોઈ શકાય છે કે કઈ રીતે કાર ચાલકે બાઈકને ટક્કર મારી હતી. આ ફૂટેજના આધારે પોલીસ તપાસ તેજ કરવામાં આવી છે.
ઘટનાની જાણ થતા જ સિટી-એ ડિવિઝન પોલીસની ટુકડી ઘટનાસ્થળે દોડી આવી હતી અને રસ્તા પર એકઠું થયેલું ટોળું વિખેર્યું હતું. પોલીસે કાર ચાલક સામે ગુનો નોંધી, ફરિયાદ દાખલ કરીને આગળની કાયદેસરની કાર્યવાહી હાથ ધરી છે. માસૂમ બાળકીના મોતના સમાચારથી પરિવારમાં શોકનું મોજું ફરી વળ્યું છે.
