જામનગરમાં એસ.કે. રેસ્ટોરન્ટમાં નોનવેજ ભોજન ખાધા બાદ સાત લોકોને ફૂડ પોઝનીંગ
તબીયત લથડતા સારવાર માટે હોસ્પિટલ ખસેડાયા: આરોગ્ય વિભાગની તપાસ
અગ્ર ગુજરાત, જામનગર
જામનગર શહેરમાં નોનવેજ ફૂડ આરોગ્યા બાદ ગંભીર ફૂડ પોઇઝનિંગની ઘટના સામે આવી છે. શહેરના પાંચ હાટડી વિસ્તારમાં આવેલી એસ કે રેસ્ટોરન્ટ નામની નોનવેજ રેસ્ટોરન્ટમાં શાવરમા, ફ્રાઇડ રાઇસ અને ચિકન રોલ ખાધા બાદ અચાનક 7 ગ્રાહકોની તબિયત લથડી ગઈ હતી. ફૂડ પોઇઝનિંગની આશંકા વચ્ચે અસરગ્રસ્ત લોકોને તાત્કાલિક સારવાર અર્થે ખાનગી હોસ્પિટલોમાં ખસેડવામાં આવ્યા છે.
જામનગરના પાંચ હાટડી વિસ્તારમાં આવેલા એક નોનવેજ રેસ્ટોરન્ટમાં બનેલી આ ઘટના અંગે મળતી વિગતો અનુસાર, ગ્રાહકો દ્વારા અહીં પીરસવામાં આવતી નોનવેજ વાનગીઓ આરોગવામાં આવી હતી. જેમાં સ્વાદના શોખીન નાગરિકોને શાવરમા, ફ્રાઇડ રાઇસ અને ચિકન રોલ ખાધા પછી તેનો સ્વાદ ખૂબ જ ભારે પડ્યો હતો.
આ વાનગીઓ આરોગ્યાના થોડા સમયમાં જ અચાનક 7 જેટલા ગ્રાહકોની તબિયત એકાએક લથડી ગઈ હતી. ફૂડ પોઇઝનિંગની ગંભીર આશંકા વચ્ચે અસરગ્રસ્ત તમામ લોકોને તાકીદે સારવાર માટે શહેરની અલગ અલગ ખાનગી હોસ્પિટલોમાં ખસેડવામાં આવ્યા હતા. હાલ આ તમામ દર્દીઓ ખાનગી હોસ્પિટલોમાં તબીબોની દેખરેખ હેઠળ જરૂરી સારવાર મેળવી રહ્યા છે.
આ ઘટના સામે આવતા જ ફૂડ વિભાગની ટીમે તાબડતોબ હરકતમાં આવીને રેસ્ટોરન્ટના સ્થળ પર પહોંચી જઈને તપાસની કડક કાર્યવાહી શરૂ કરી દીધી હતી. ઘટનાસ્થળે પહોંચેલા ફૂડ વિભાગના અધિકારીઓ દ્વારા સમગ્ર રેસ્ટોરન્ટનું નિરીક્ષણ કરવામાં આવ્યું હતું અને ત્યાંથી શંકાસ્પદ જણાતા કુલ 5 જેટલા વિવિધ ખાદ્ય પદાર્થોના સેમ્પલ કાયદેસર રીતે લેવામાં આવ્યા હતા.
આ તમામ 5 સેમ્પલ્સને ગુણવત્તા ચકાસણી અને પૃથક્કરણ અર્થે લેબોરેટરીમાં મોકલવાની તજવીજ હાથ ધરવામાં આવી છે. અધિકારીઓએ જણાવ્યું હતું કે લોકોના આરોગ્ય સાથે કોઈ પણ પ્રકારની ગેરરીતિ કે બેદરકારી જરાય ચલાવી લેવાશે નહીં.
તંત્ર દ્વારા આ સમગ્ર મામલે રેસ્ટોરન્ટ સંચાલકો સામે કડક તપાસનો દોર શરૂ કરવામાં આવ્યો છે. ફૂડ વિભાગ દ્વારા સત્તાવાર રીતે જણાવવામાં આવ્યું છે કે આ રેસ્ટોરન્ટમાં વપરાશમાં લેવાતા પાણીના ટેસ્ટિંગ રિપોર્ટ, પરિસરની સાફ-સફાઈ, હાઇજીનિક વ્યવસ્થા તેમજ પેસ્ટ કંટ્રોલની કામગીરીની સઘન ચકાસણી કરવામાં આવશે. આ તમામ જરૂરી પ્રક્રિયાઓ પરિપૂર્ણ થયા બાદ જ રેસ્ટોરન્ટને ફરીથી ખોલવાની મંજૂરી આપવામાં આવશે. લેબોરેટરીમાંથી ફૂડ સેમ્પલના રિપોર્ટ આવ્યા બાદ કસૂરવાર રેસ્ટોરન્ટ પર નિયમાનુસાર યોગ્ય દંડ સહિતની કડક કાનૂની કાર્યવાહી કરવામાં આવશે તેમ ફૂડ વિભાગ દ્વારા સ્પષ્ટ શબ્દોમાં જણાવાયું છે.
