ખેત મજૂરના ચાર વર્ષના બાળક પર દીપડાનો જીવલેણ હુમલો.:આણંદપુરમાં ઘરમાં કીડીઓ નીકળતા બહાર સૂવા ગયેલા પરિવાર પાસે સુતેલા બાળક પર દીપડાનો ત્રાટક્યો, ચાર વર્ષના માસૂમનું મોઢું ફાડી ખાધું.
જૂનાગઢ જિલ્લાના ગ્રામ્ય પંથકમાં વન્ય પ્રાણીઓના આતંકની વધુ એક હૃદયદ્રાવક ઘટના સામે આવી છે. આણંદપુર ગામની સીમમાં ખેત મજૂરી કરતા એક પરિવારના ચાર વર્ષના બાળક પર મોડી રાત્રે દીપડાએ હુમલો કર્યો હતો. માતાની પડખે સૂતેલા માસૂમને દીપડાએ નિશાન બનાવતા ચકચાર મચી ગઈ છે. આ હુમલામાં બાળકને માથા અને મોઢાના ભાગે ગંભીર ઇજાઓ પહોંચતા તેને તાત્કાલિક જૂનાગઢ સિવિલ હોસ્પિટલમાં સારવાર અર્થે ખસેડવામાં આવ્યો છે. આ ઘટનાને પગલે વન વિભાગ દ્વારા તાત્કાલિક દીપડાને પાંજરે પૂરવા માટેની તજવીજ હાથ ધરવામાં આવી છે. ઇજાગ્રસ્ત થયેલ બાળકના પિતા સામજીનાથ કાળુનાથે હોસ્પિટલના બિછાનેથી હચમચાવી દેતી વિગતો આપતા જણાવ્યું હતું કે, “હું ઇવનગર ગામનો રહેવાસી છું અને અમે આણંદપુર ગામે ખેતી મજૂરી કરવા માટે ગયા હતા. ત્યાં અમે રાત્રિના સમયે ખેતરનું કામ પતાવીને આરામ કરી રહ્યા હતા. રાત્રિના આશરે અઢી વાગ્યાની આસપાસ અમારા ઘરમાં અચાનક કીડીઓ નીકળી હતી, જેના કારણે ઘરમાં સૂવું મુશ્કેલ બન્યું હતું. આથી અમે નક્કી કર્યું કે રાત બહાર ખુલ્લામાં પસાર કરીએ અને અમે બહાર સૂવા માટે ગયા હતા.
સામજીનાથે વધુમાં જણાવ્યું કે બહાર સૂતી વખતે મારો છોકરો તેની મમ્મી પાસે નીચે સૂતો હતો અને હું બાજુમાં જ ખાટલા પર સૂતો હતો. અમે ઊંઘમાં હતા ત્યારે આશરે એક કલાક પછી અચાનક એક હિંસક દીપડો ત્યાં આવી ચડ્યો હતો. અંધારામાં દીપડાએ આવીને સીધો જ મારા છોકરા પર હુમલો કર્યો અને તેને પોતાના જડબામાં પકડી લીધો હતો. દીપડાના હુમલા સમયે મારા પત્નીની નજર પડતા તેમણે જોરજોરથી બૂમાબૂમ કરી મૂકી હતી, જેના કારણે હું તરત જ જાગી ગયો હતો.
