જામનગરની ડેન્ટલ કોલેજમાં રૂ.૧.3૬ કરોડનું કૌભાંડ
નેશનલ હેલ્થ મિશન હેઠળ કરાર આધારિત કર્મચારીએ રોગી કલ્યાણ સમિતિના ખાતામાંથી કરોડોની ઉચાપત કરી : શંકાસ્પદ ટ્રાન્ઝેકશન દ્વારા સમગ્ર કૌભાંડ છતુ થયું
અગ્ર ગુજરાત, જામનગર
જામનગરની સરકારી ડેન્ટલ કોલેજ અને હોસ્પિટલમાં નેશનલ હેલ્થ મિશન (NHM) હેઠળ કરાર આધારિત ફરજ બજાવતા એક કર્મચારી દ્વારા રોગી કલ્યાણ સમિતિના ખાતામાંથી કરોડો રૂપિયાની ઉચાપત અને ચીટિંગ આચરવામાં આવી હોવાનો ચોંકાવનારો મામલો સામે આવ્યો છે. સરકારી ગ્રાન્ટ અને દર્દીઓની સારવાર માટેના નાણામાં મોટી હેરાફેરી કરનાર કર્મચારી સામે સંસ્થાના જવાબદાર અધિકારી દ્વારા પોલીસમથકે સત્તાવાર ફરિયાદ નોંધાવવામાં આવતાં સમગ્ર વહીવટી આલમમાં ભારે ખળભળાટ મચી ગયો છે.
મળતી વિગતો મુજબ, જામનગરની સરકારી ડેન્ટલ કોલેજ અને હોસ્પિટલમાં લાંબા સમયથી વહીવટી સ્ટાફની ભારે અછત વર્તાઈ રહી છે. આ અછતને કારણે સંસ્થાની અનેક મહત્વની નાણાકીય અને વહીવટી જવાબદારીઓ કોન્ટ્રાક્ટ પરના કર્મચારીઓને સોંપવાની ફરજ પડી હતી. જેમાં એન.એચ.એમ. અંતર્ગત ગવર્મેન્ટ કોન્ટ્રાક્ટ કર્મચારી તરીકે ફરજ બજાવતા શોભીત ગર્ગ નામના કર્મચારીને રોગી કલ્યાણ સમિતિના નાણાકીય રેકોર્ડ અને બેંક વ્યવહારો સંભાળવાની જવાબદારી લેખિતમાં સોંપવામાં આવી હતી. આ જ જવાબદારીનો દુરુપયોગ કરીને આરોપીએ કૌભાંડને અંજામ આપ્યો હતો.
સમગ્ર મામલો ગત તા. 16 મે, 2026ના રોજ પ્રકાશમાં આવ્યો હતો. જી.જી. હોસ્પિટલના ડો. કણસાગરાને બેંક મેનેજર દ્વારા એક શંકાસ્પદ ટ્રાન્ઝેક્શન અંગે માહિતી આપવામાં આવી હતી. મેનેજરે જણાવ્યું હતું કે, ડેન્ટલ કોલેજના રોગી કલ્યાણ સમિતિના ચેક મારફતે શોભીત ગર્ગ નામના કર્મચારીના વ્યક્તિગત બેંક ખાતામાં લાખો રૂપિયાની રકમ જમા થઈ રહી છે.
આ ચોંકાવનારી માહિતી મળતા જ ડો. કણસાગરાએ તુરંત ડેન્ટલ કોલેજના ડીનને ફોન દ્વારા આ અંગે વાકેફ કર્યા હતા. ડીન દ્વારા તાત્કાલિક ધોરણે રોગી કલ્યાણ સમિતિના સભ્યો અને અન્ય ઉચ્ચ અધિકારીઓની તાકીદની બેઠક બોલાવી પ્રાથમિક તપાસનો દોર શરૂ કર્યો હતો.
પ્રાથમિક તપાસ દરમિયાન જ્યારે શોભીત ગર્ગને બોલાવીને આ નાણાકીય વ્યવહારો અંગે પૂછપરછ કરવામાં આવી, ત્યારે તે કોઈ સંતોષકારક જવાબ આપી શક્યો ન હતો, જેના કારણે અધિકારીઓની શંકા વધુ દ્રઢ બની હતી.
ત્યાર બાદ સંસ્થા દ્વારા તાકીદે રોગી કલ્યાણ સમિતિના સેન્ટ્રલ બેંક ઓફ ઇન્ડિયાના ખાતાનું સ્ટેટમેન્ટ કઢાવીને બારીકાઈથી ચકાસવામાં આવ્યું હતું. બેંક સ્ટેટમેન્ટની તપાસ કરતા જ અધિકારીઓ પણ ચોંકી ઉઠ્યા હતા. છેલ્લા છ માસના ગાળા દરમિયાન કુલ 15 ચેક મારફતે રૂ. 1,36,19,350 (એક કરોડ છત્રીસ લાખ ઓગણીસ હજાર ત્રણસો પચાસ) જેટલી મોટી રકમ શોભીત ગર્ગના બેંક ઓફ ઇન્ડિયાના વ્યક્તિગત ખાતામાં ટ્રાન્સફર થઈ ગઈ હોવાનું સત્તાવાર રીતે સામે આવ્યું હતું.
તપાસમાં ખુલેલી વિગતો મુજબ, આરોપી કર્મચારી દ્વારા અલગ-અલગ તારીખે રૂ. 46 હજારથી લઈને છેક રૂ. 28.55 લાખ સુધીની મોટી રકમો પોતાના ખાતામાં ટ્રાન્સફર કરવામાં આવી હતી. ખાસ કરીને માર્ચ અને એપ્રિલ મહિનામાં ખૂબ જ ટૂંકાગાળામાં મોટી રકમો સેરવી લેવામાં આવી હતી,
આરોપ છે કે, દર્દીઓની સારવાર તેમજ આઉટસોર્સિંગથી કામ કરતા કર્મચારીઓના પગાર ચૂકવવા માટે ગાંધીનગરથી જે સરકારી ગ્રાન્ટ મળતી હતી, તેના ચેકોમાં આરોપીએ કથિત રીતે ચેડાં કર્યા હતા. ચેકની મૂળ રકમ અને વિગતોમાં ફેરફાર કરીને (ચેક ટેમ્પરિંગ) આ આખું કૌભાંડ આચરવામાં આવ્યું હતું. આરોપીએ પોતાના હોદ્દા અને વિશ્વાસનો દુરુપયોગ કરી સરકાર સાથે ગુનાહિત વિશ્વાસઘાત અને છેતરપિંડી કરી હતી.
આ ગંભીર કૌભાંડ અંગે ડેન્ટલ કોલેજ હોસ્પિટલના ડીન ડૉ. નયના પટેલે જણાવ્યું હતું કે, અમારી હોસ્પિટલમાં દર્દીઓની સુવિધા માટે ‘રોગી કલ્યાણ સમિતિ’ કાર્યરત છે, જેમાં સરકાર દ્વારા ફંડ અપાય છે. આ સમિતિના રેકોર્ડ કીપિંગની જવાબદારી કોન્ટ્રાક્ટ કર્મચારી શોભિત ગર્ગ પાસે હતી. છેલ્લા ત્રણ મહિનામાં મારી જાણ બહાર, ચેકમાં છેડછાડ કરીને ઘણા ખોટા ટ્રાન્ઝેક્શન કરાયા છે. આ બાબત સામે આવતા જ અમે તાત્કાલિક પોલીસ ફરિયાદ નોંધાવી છે.
