વાવણીના સમયે જ ખેડૂતોની માઠી
કલ્યાણપુરના રાવલમાં તારીખ વિતેલા બિયારણ અને દવાનો જથ્થો ઝડપાયો
SOGનો સપાટો, એગ્રોના વેપારીની અટકાયત: ૫.૨૯ લાખનો મુદ્દામાલ જપ્ત કરાયો
અગ્ર ગુજરાત, દ્વારકા
દેવભૂમિ દ્વારકા જિલ્લામાં જગતના તાત ગણાતા ખેડૂતો સાથે છેતરપિંડી આચરીને પોતાની તિજોરીઓ ભરતા લેભાગુ તત્વો સામે એસઓજી પોલીસે લાલ આંખ કરી છે. દ્વારકા જિલ્લાના ધરતીપુત્રોને છેતરીને ભેળસેળયુક્ત અને એક્સપાયરી ડેટ વાળી પ્રોડક્ટ્સ વેચતા એક મોટા કૌભાંડનો પોલીસે પર્દાફાશ કર્યો છે. જામ કલ્યાણપુર તાલુકાના રાવલ ગામે આવેલા એક એગ્રો સેન્ટર પર રેડ કરીને લાખો રૂપિયાનો મુદ્દામાલ જપ્ત કરવામાં આવ્યો છે, જેનાથી પંથકના લેભાગુ વેપારીઓમાં ફફડાટ વ્યાપી ગયો છે.
દેવભૂમિ દ્વારકાના પોલીસ અધિક્ષક જયરાજસિંહ વાળાની સૂચના અને SOG પીઆઈ વી. એ. રાણા તેમજ પીએસઆઈ ડી. એ. વાળાના માર્ગદર્શન હેઠળ પોલીસની ટીમ વિસ્તારમાં પેટ્રોલિંગમાં હતી. આ દરમિયાન એએસઆઈ વિરેન્દ્રસિંહ જાડેજા, કોન્સ્ટેબલ વિજયસિંહ અને પબુભાઈ માયાણીને ચોક્કસ ખાનગી રાહે બાતમી મળી હતી કે, રાવલ ગામે અડવાણા રોડ પર આવેલા ‘ગુરૂકૃપા કૃષી કેન્દ્ર’માં એક્સપાયરી ડેટવાળી અને પ્રતિબંધિત દવાઓ વેચાઈ રહી છે. પોલીસે કૃષિ વિભાગના નાયબ ખેતી અધિકારીને સાથે રાખીને આ દુકાનમાં અચાનક સરપ્રાઇઝ રેડ કરી હતી.
ખેતીવાડી અધિકારી અને પોલીસે જ્યારે આ એગ્રો સેન્ટરમાં તપાસ હાથ ધરી ત્યારે ચોંકાવનારી વિગતો સામે આવી હતી. દુકાનમાંથી કોઈપણ પ્રકારના સ્ટીકર, કંપનીનું નામ, મેન્યુફેક્ચરિંગ કે એક્સપાયરી ડેટ વગરની શંકાસ્પદ રાસાયણિક દવાની 32 બોટલો મળી આવી હતી, જેના વિશે સંચાલકો પાસે કોઈ જવાબ ન હતો. આ ઉપરાંત, જેની અવધિ પૂર્ણ થઈ ગઈ હોય તેવી 50 જેટલી દવા, ખાતર અને બિયારણનો જથ્થો પણ વેચાણ માટે રાખવામાં આવ્યો હતો, જે ખેડૂતોના મહામુલા પાકને મોટું નુકસાન કરી શકે તેમ હતો.
આટલું જ નહીં, જેના છૂટક વેચાણ પર સરકાર દ્વારા સખ્ત પ્રતિબંધ લાદવામાં આવ્યો છે, તેવી બિયારણના પટ માટેની ‘વેટાવેક્સ’ દવા પણ આ સંચાલકો ઊંચા નફાની લાલચમાં ખેડૂતોને બોટલોમાં ભરી ભરીને ગેરકાયદેસર રીતે વેચતા હતા. આ સાથે દુકાનની નીચે આવેલા ગોડાઉનની તપાસ કરતા NPK ખાતરની 135 બોરીઓ મળી આવી હતી, જેના સ્ટોક રજિસ્ટર અને વાસ્તવિક વેચાણના આંકડામાં બહુ મોટો તફાવત જોવા મળ્યો હતો, જે કાળાબજારી તરફ ઈશારો કરે છે.
પોલીસે આ આખી કાર્યવાહી દરમિયાન કુલ રૂ. 5,29,320 ની કિંમતનો મુદ્દામાલ સ્થળ પરથી જપ્ત કર્યો છે. આ ગુનામાં સંડોવાયેલા એગ્રો સેન્ટરના બે સંચાલકો માલદે ઠેબાભાઇ ઓડેદરા (ઉંમર 46 વર્ષ) અને તેના પુત્ર દિનેશ માલદેભાઇ ઓડેદરા (ઉંમર 24 વર્ષ) ની એસઓજી પોલીસે ધરપકડ કરી કાયદેસરની કાર્યવાહી હાથ ધરી છે. પોતાના આર્થિક લાભ ખાતર ખેડૂતોના પાક સાથે ખીલવાડ કરતા આ બંને સંચાલકો હવે પોલીસ સબજા હેઠળ છે.
ખેતીવાડી વિભાગ દ્વારા નોટિસ
આ સમગ્ર મામલે સાથે રહેલા ખેતી અધિકારી દ્વારા એગ્રો સેન્ટરને કાયદેસરની નોટિસ ફટકારવામાં આવી છે. એક્સપાયરી ડેટ વાળા જોખમી જથ્થાને તાત્કાલિક નાશ કરવાની અને સ્ટોક રજિસ્ટરમાં વિસંગતતા ધરાવતા ખાતરના જથ્થાને વેચાણ માટે સ્થગિત કરવાની કડક કાર્યવાહી કરવામાં આવી છે. જગતના તાત સાથે આટલું મોટું કૌભાંડ આચરનારા આ તત્વો સામે SOG પોલીસની આ ઓપરેશનથી પંથકના અન્ય લેભાગુ એગ્રો સંચાલકોમાં ફફડાટ વ્યાપી ગયો છે.
