કલ્યાણપુરમાં નાવદ્રા ગામમાં જમીનના ડખ્ખામાં પાંચ રાઉન્ડ આડેધડ ફાયરીંગ

કલ્યાણપુરમાં નાવદ્રા ગામમાં જમીનના ડખ્ખામાં પાંચ રાઉન્ડ આડેધડ ફાયરીંગ

એકને પગમાં બે ગોળી વાગતા ઇજાગ્રસ્ત : વીડિયો સોશ્યલ મીડિયામાં વાયરલ : ૧૦ની અટકાયત

અગ્ર ગુજરાત, દ્વારકા

દેવભૂમિ દ્વારકા જિલ્લાના કલ્યાણપુર તાલુકાના નાવદ્રા ગામેથી એક સનસનાટીભરી ઘટના સામે આવી છે.જ્યાં જમીન બાબતની જૂની માથાકૂટમાં ધોળા દિવસે હથિયારો સાથે સામસામે આવી ગયેલા જૂથો વચ્ચે સરેઆમ ફાયરિંગની ઘટના બની છે.આ હિંસક ફાયરિંગમાં નાવદ્રા ગામના લખમણ કરમૂર નામના એક વ્યક્તિ ગંભીર રીતે ઇજાગ્રસ્ત થયા છે.ગોળીબારની ઘટનાને પગલે સમગ્ર પંથકમાં ભારે તણાવ અને ચકચાર મચી ગઈ છે.જ્યારે ઇજાગ્રસ્ત લખમણભાઈને તાત્કાલિક લોહીલુહાણ હાલતમાં સારવાર અર્થે નજીકની હોસ્પિટલમાં ખસેડવામાં આવ્યા છે.

મળતી વિગતો અનુસાર,જમીન વિવાદ ઉગ્ર બનતા દેવસી ચેતરીયા નામના શખ્સ દ્વારા હવામાં અંદાજે 5 રાઉન્ડ જેટલું આડેધડ ફાયરિંગ કરવામાં આવ્યું હતું.જે બાદ લખમણ કરમૂરને નિશાન બનાવીને કરાયેલા ફાયરિંગમાં તેમના પગના ભાગે 2 ગોળીઓ વાગી હોવાનું પ્રાથમિક અનુમાન લગાવવામાં આવી રહ્યું છે.આ ચકચારી ફાયરિંગની સમગ્ર ઘટના અને ત્યારબાદનો હોબાળો દર્શાવતો એક વીડિયો પણ સોશિયલ મીડિયામાં વાયરલ થયો છે.જેમાં દેવસી ચેતરીયા દ્વારા જ ફાયરિંગ કરાયું હોવાનો સ્પષ્ટ ઉલ્લેખ કરવામાં આવી રહ્યો છે.

ઘટનાની જાણ થતાં જ કલ્યાણપુર પોલીસનો કાફલો તાબડતોબ ઘટનાસ્થળે દોડી ગયો હતો અને પરિસ્થિતિ પર કાબૂ મેળવ્યો હતો.સોશિયલ મીડિયા પર વાયરલ વીડિયો અને સ્થાનિક પૂછપરછના આધારે પોલીસે ત્વરિત એક્શન લીધા છે.સૂત્રો પાસેથી મળતી માહિતી મુજબ,પોલીસે ગુનાની ગંભીરતાને ધ્યાને લઈને આ ફાયરિંગ અને હિંસક મારામારીની ઘટનામાં સંડોવાયેલા અંદાજે 8 થી 10 જેટલા શખ્સોને રાઉન્ડઅપ કરીને ઝડપી પાડ્યા છે અને તેમની સામે કાયદેસરની આકરી કાર્યવાહી હાથ ધરી છે.