પેપરલીકની ફરી ફરિયાદ ઉઠતા NTAનો નિર્ણય
NEET-UGની પરીક્ષા રદ, ૨3 લાખ છાત્રોને અસર
તપાસ દરમિયાન સામે આવેલા તથ્યો અને કાયદા અમલીકરણના અહેવાલથી રદ કરવાનો નિર્ણય લેવાયો : નવી તારીખો જાહેર કરાશે : CBI તપાસની માંગ
અગ્ર ગુજરાત, નવી દિલ્હી
નેશનલ ટેસ્ટિંગ એજન્સી એટલે કે NTA એ 3 મેના રોજ યોજાયેલી NEET 2026 પરીક્ષા રદ કરી દીધી છે. પરીક્ષાની નવી તારીખો ટૂંક સમયમાં જાહેર કરવામાં આવશે. NTA એ જણાવ્યું છે કે કેન્દ્ર સરકારની મંજૂરી બાદ પરીક્ષા રદ કરવામાં આવી છે. NTAએ જણાવ્યું કે તપાસ દરમિયાન સામે આવેલા તથ્યો અને કાયદા અમલીકરણ એજન્સીઓના અહેવાલ પરથી સ્પષ્ટ થયું કે વર્તમાન પરીક્ષા પ્રક્રિયા ચાલુ રાખવી યોગ્ય રહેશે નહીં. આવા સંજોગોમાં, હવે NEET-UG 2026 ની પરીક્ષા ફરીથી યોજવામાં આવશે. નવી પરીક્ષાની તારીખો અને એડમિટ કાર્ડ સંબંધિત શેડ્યૂલ ટૂંક સમયમાં સત્તાવાર વેબસાઇટ દ્વારા જાહેર કરવામાં આવશે.
આ સમગ્ર મામલાની ગંભીરતાને જોતા કેન્દ્ર સરકારે તેને કેન્દ્રીય તપાસ બ્યુરો (CBI) ને સોંપવાનો નિર્ણય લીધો છે. એજન્સીએ કહ્યું છે કે તે CBI ને દરેક પ્રકારનો સહયોગ આપશે અને તપાસ માટે જરૂરી તમામ દસ્તાવેજો અને રેકોર્ડ ઉપલબ્ધ કરાવશે.
NTA એ જાણકારી આપી છે કે વિદ્યાર્થીઓને ફરીથી પરીક્ષા માટે રજીસ્ટ્રેશન કરાવવું પડશે નહીં. પાછલા પરીક્ષા કેન્દ્રોમાં પણ કોઈ ફેરફાર થશે નહીં. રી-એક્ઝામ માટે નવા એડમિટ કાર્ડ પણ જાહેર કરવામાં આવશે. આ ઉપરાંત પરીક્ષામાં સામેલ વિદ્યાર્થીઓની ફી પણ પાછી આપવામાં આવશે.
3 મેના રોજ દેશભરમાં NEET UG 2026ની પરીક્ષા યોજાઈ હતી. આશંકા છે કે પરીક્ષાનું પેપર પહેલાથી જ લીક થઈ ગયું હતું. રાજસ્થાનમાં ઘણા વિદ્યાર્થીઓ પાસેથી હાથથી લખેલું ગેસ પેપર મળ્યું છે જેના પ્રશ્નો અસલ પરીક્ષા સાથે મેચ થઈ રહ્યા છે. 10 મેના રોજ રાજસ્થાન સ્પેશિયલ ઓપરેશન ગ્રુપ એટલે કે SOGએ ઇન્ટેલ ઇનપુટ પર કાર્યવાહી કરતા દેહરાદૂન, સીકર અને ઝુંઝુનૂમાંથી 13 શંકાસ્પદ વ્યક્તિઓને કસ્ટડીમાં લેવામાં આવ્યા છે. આમાં સીકરની એક કોચિંગ ઇન્સ્ટિટ્યૂટ સાથે સંકળાયેલા કરિયર કાઉન્સિલર પણ સામેલ છે.
તપાસમાં સામે આવ્યું છે કે પરીક્ષાના 720 માંથી 600 માર્કના પ્રશ્નો બે દિવસ પહેલા જ સીકરમાં વિદ્યાર્થીઓ પાસે પહોંચી ગયા હતા. જોકે, એક ગેસ પેપર કેરળની એક કોલેજમાંથી MBBS કરી રહેલા વિદ્યાર્થીએ 1 મેના રોજ સીકરમાં પોતાના એક મિત્રને મોકલી આપ્યું હતું.
રિપોર્ટ અનુસાર, સીકરના એક પીજી સંચાલકને આ પેપર મળ્યું, જેણે તેને પોતાના ત્યાં રહેતા વિદ્યાર્થીઓને આપી દીધું. આ માધ્યમથી તે અલગ-અલગ લોકો સુધી પહોંચ્યું.
SOG હાલ મામલાની તપાસ કરી રહી છે. એજન્સી માસ્ટરમાઇન્ડ સુધી પહોંચવા માટે કડીઓ જોડી રહી છે. તમામ શંકાસ્પદોની સોશિયલ મીડિયા ચેટ્સ અને કોલ લોગ્સ તપાસવામાં આવી રહ્યા છે. જોકે, આ એક ગેસ પેપરની જેમ લોકો સુધી પહોંચ્યું છે અને SOG હાલ તપાસ કરી રહી છે કે તેને પેપર લીક માનવામાં આવે કે નહીં.
બાળકોના ભવિષ્યની બજારમાં હરરાજી : રાહુલ ગાંધી
રાહુલ ગાંધીએ ‘એક્સ’ પર પોસ્ટ કર્યું, ”નીટ 2026 ના પેપર લીકના સમાચાર સાંભળ્યા. પરીક્ષા નહીં – નીટ હવે હરાજી છે. અનેક સવાલો પરીક્ષાના 42 કલાક પહેલા વોટ્સએપ પર વેચાઈ રહ્યા હતા. 22 લાખથી વધુ બાળકો વર્ષભર રાત-રાત ભર આંખો બાળીને ભણતા રહ્યા અને એક રાતમાં તેમનું ભવિષ્ય બજારમાં સરેઆમ હરાજી થઈ ગયું. તેમણે કહ્યું કે ‘આ પહેલીવાર નથી. 10 વર્ષમાં 89 પેપર લીક, 48 વાર ફરીથી પરીક્ષા. દર વખતે એ જ વાયદાઓ, અને પછી એ જ મૌન.
ભ્રષ્ટાચારથી યુવાનોનું ભવિષ્ય છીનવાયું
કોંગ્રેસના સાંસદ પ્રિયંકા ગાંધી વાડ્રાએ કહ્યું, એકવાર ફરીથી NEET UG ની પરીક્ષામાં મોટા પાયે ગરબડને લઈને સમાચારો છપાઈ રહ્યા છે. બીજેપી રાજમાં છેલ્લા ઘણા વર્ષોથી પરીક્ષાઓમાં વ્યાપ્ત ભ્રષ્ટાચાર દેશના યુવાનો પાસેથી તેમનું ભવિષ્ય છીનવી રહ્યો છે. આ વખતે પણ આશરે 23 લાખ વિદ્યાર્થીઓના ભવિષ્ય સાથે ખેલ કરવામાં આવ્યો. તેમણે કહ્યું કે NEET જેવી પરીક્ષાઓ માટે બાળકો જી-જાનથી મહેનત કરે છે. માતા-પિતા પોતાનું બધું જ દાવ પર લગાવે છે જેથી બાળકોનું ભવિષ્ય બને. પરંતુ દરેક પરીક્ષા ભ્રષ્ટાચારની ભેટ ચઢી જાય છે. સંસદમાં પેપર લીક વિરુદ્ધ લાવવામાં આવેલા કથિત કડક કાયદાનો શું ફાયદો થયો જો જમીની સ્તરે એ જ ભ્રષ્ટાચાર જારી છે?
