મેઘરાજાનો મેગા એટેક
સૌરાષ્ટ્ર-ગુજરાત જળબંબાકાર, ૨૫૫ તાલુકામાં વરસાદ
સુરેન્દ્રનગર-ભાવનગર-બોટાદમાં ૪થી ૭ ઇંચ મેઘકૃપા, રાજ્યમાં પાંચ વરસાદી સિસ્ટમ સક્રિય; અનેક જિલ્લાઓમાં રેડ એલર્ટ, ખેડૂતોમાં ખુશી તો તંત્ર એલર્ટ
અગ્ર ગુજરાત, રાજકોટ
ગુજરાતમાં ચોમાસાએ હવે જોર પકડતાં સમગ્ર રાજ્યમાં મેઘરાજાએ મેગા એટેક શરૂ કર્યો છે. છેલ્લા ૨૪ કલાક દરમિયાન રાજ્યના ૨૫૫ તાલુકામાં વરસાદ નોંધાતા અનેક વિસ્તારોમાં જળબંબાકાર જેવી સ્થિતિ સર્જાઈ છે. હવામાન વિભાગના જણાવ્યા મુજબ અરબી સમુદ્રમાં સર્જાયેલું લો પ્રેશર હવે ડીપ ડિપ્રેશનમાં ફેરવાયું છે અને રાજ્યમાં એકસાથે પાંચ વરસાદી સિસ્ટમ સક્રિય હોવાથી આગામી દિવસોમાં પણ ભારે વરસાદની શક્યતા વ્યક્ત કરવામાં આવી છે. ખાસ કરીને સુરેન્દ્રનગર, ભાવનગર, બોટાદ, રાજકોટ, અમદાવાદ અને આણંદ જિલ્લામાં રેડ એલર્ટ જાહેર કરવામાં આવ્યું છે.
સૌરાષ્ટ્રમાં ગઈકાલ સાંજથી શરૂ થયેલી મેઘસવારી આજે બીજા દિવસે પણ યથાવત રહી હતી. સુરેન્દ્રનગર, ભાવનગર અને બોટાદ જિલ્લામાં સૌથી વધુ વરસાદ નોંધાયો હતો. ચુડામાં ૭ ઇંચ વરસાદ વરસ્યો હતો જ્યારે વઢવાણમાં ૬ ઇંચ જેટલો વરસાદ પડતાં અનેક નીચાણવાળા વિસ્તારોમાં પાણી ભરાઈ ગયા હતા. શિહોર, મહુવા, લખતર, સાયલા, પાલીતાણા, બોટાદ અને ગઢડામાં ૪ ઇંચ વરસાદ નોંધાયો હતો. વલ્લભીપુર, ભાવનગર અને મોરબીમાં સાડા ત્રણ ઇંચ વરસાદ પડ્યો હતો, જ્યારે દસાડા, ચોટીલા, લીંબડી, થાનગઢ, લાઠી અને બાબરામાં ૩ ઇંચ વરસાદ નોંધાયો હતો. ટંકારા, વાંકાનેર અને સાવરકુંડલામાં ૨ ઇંચ વરસાદ વરસ્યો હતો અને અન્ય વિસ્તારોમાં ઝાપટાથી દોઢ ઇંચ સુધી વરસાદ પડતાં વાતાવરણમાં ઠંડક પ્રસરી ગઈ હતી.
રાજકોટ, જામનગર, દેવભૂમિ દ્વારકા, કચ્છ અને મોરબી જિલ્લામાં પણ ધીમીધારે વરસાદ વરસતાં લાંબા વિરામ બાદ ચોમાસાએ ફરી જમાવટ કરી છે. ખેડૂતો માટે આ વરસાદ આશીર્વાદરૂપ સાબિત થયો છે. છેલ્લા કેટલાક દિવસોથી વરસાદના અભાવે ચિંતિત ખેડૂતોમાં હવે ખુશીનો માહોલ જોવા મળી રહ્યો છે.
જૂનાગઢ અને સમગ્ર સોરઠ વિસ્તારમાં પણ મેઘરાજાએ ફરી એન્ટ્રી કરતાં વરસાદી માહોલ જામ્યો હતો. રાત્રિ દરમિયાન શરૂ થયેલા વરસાદ બાદ જિલ્લામાં કુલ ૧૯૪ મીમી એટલે કે અંદાજે ૮ ઇંચ વરસાદ નોંધાયો હતો. છેલ્લા ૨૪ કલાકમાં ભેસાણ, વિસાવદર અને મેંદરડામાં દોઢ-દોઢ ઇંચ વરસાદ પડ્યો હતો જ્યારે જૂનાગઢ શહેરમાં પોણો ઇંચ અને ગિરનાર પર્વત પર ૨ ઇંચ વરસાદ નોંધાયો હતો. આજે સવારે પણ વંથલી, જૂનાગઢ, ભેસાણ અને ગિરનાર વિસ્તારમાં ઝરમર વરસાદ ચાલુ રહ્યો હતો અને દિવસ દરમિયાન વધુ વરસાદની સંભાવના વ્યક્ત કરવામાં આવી હતી.
ભાવનગર જિલ્લામાં પણ સર્વત્ર વરસાદી માહોલ રહ્યો હતો. છેલ્લા ૨૪ કલાક દરમિયાન જિલ્લાના સરેરાશ ૭૩.૪ મીમી એટલે કે લગભગ ૩ ઇંચ વરસાદ નોંધાયો હતો. જિલ્લામાં ચોમાસાનો કુલ સરેરાશ વરસાદ હવે ૪૧૫.૩ મીમી સુધી પહોંચી ગયો છે. તમામ ૧૦ તાલુકામાં વરસાદ નોંધાતા જળાશયોમાં નવા નીરની આવક શરૂ થઈ છે. ભારે વરસાદની આગાહીને ધ્યાનમાં રાખી જિલ્લાની શાળા-કોલેજો સતત બીજા દિવસે પણ બંધ રાખવામાં આવી હતી અને તંત્રને સંપૂર્ણ સતર્ક રાખવામાં આવ્યું છે.
આટકોટમાં રાત્રિથી ધીમીધારે શરૂ થયેલો વરસાદ વીજળીના કડાકા-ભડાકા સાથે ચાલુ રહ્યો હતો. દોઢ ઇંચ જેટલો વરસાદ પડતાં મુખ્ય માર્ગો પર પાણી ભરાઈ ગયા હતા અને ભાવનગર હાઈવે પર વાહનચાલકોને મુશ્કેલીનો સામનો કરવો પડ્યો હતો. તેમ છતાં ખેડૂતો આ વરસાદને પાક માટે “કાચું સોનું” ગણાવી રહ્યા છે અને નદી-નાળાઓ છલકાય તેવી આશા વ્યક્ત કરી રહ્યા છે.
જામકંડોરણામાં પણ ગત રાત્રે ૧૦ વાગ્યાથી આજે સવારે ૮ વાગ્યા સુધીમાં ૩૩ મીમી એટલે કે સવા ઇંચ જેટલો વરસાદ નોંધાયો હતો. ઝરમર વરસાદ ચાલુ રહેતા ખેડૂતો અને ગ્રામજનોમાં ખુશીનો માહોલ જોવા મળ્યો હતો. બીજી તરફ સમગ્ર રાજ્યમાં વરસાદે અનેક રેકોર્ડ નોંધાવ્યા છે. છેલ્લા ૨૪ કલાકમાં સૌથી વધુ અંબિકા વિસ્તારમાં ૨૪ ઇંચ અને ડોલવણમાં ૧૬.૭૩ ઇંચ વરસાદ નોંધાયો હતો. વસોમાં ૧૬.૩૮ ઇંચ, ઉમરપાડામાં ૧૪.૬૯ ઇંચ, નડિયાદમાં ૧૩.૪૩ ઇંચ, નેત્રંગમાં ૧૩.૦૩ ઇંચ, ધરમપુરમાં ૧૧.૦૨ ઇંચ, વઘઈમાં ૧૦.૯૪ ઇંચ, માંગરોળમાં ૧૦.૭૧ ઇંચ અને આણંદમાં ૧૦.૬૭ ઇંચ વરસાદ વરસ્યો હતો. ભારે વરસાદને કારણે અનેક નદીઓમાં નવા નીરની આવક થઈ છે અને નીચાણવાળા વિસ્તારોમાં પાણી ભરાવાની સ્થિતિ સર્જાઈ છે.
હવામાન વિભાગે જણાવ્યું છે કે ડીપ ડિપ્રેશન અને અન્ય ચાર વરસાદી સિસ્ટમ સક્રિય હોવાથી આગામી દિવસોમાં પણ રાજ્યના મોટા ભાગના વિસ્તારોમાં ભારેથી અતિભારે વરસાદની શક્યતા છે. વીજળીના કડાકા, તેજ પવન અને ભારે વરસાદને ધ્યાનમાં રાખીને લોકોને બિનજરૂરી મુસાફરી ટાળવા તેમજ સ્થાનિક તંત્રની સૂચનાઓનું પાલન કરવાની અપીલ કરવામાં આવી છે. ડિઝાસ્ટર મેનેજમેન્ટ સહિત તમામ સરકારી તંત્રને પણ હાઈ એલર્ટ પર રાખવામાં આવ્યા છે જેથી કોઈપણ પરિસ્થિતિનો સમયસર સામનો કરી શકાય.
રાત્રિભર મેઘમહેર: રાજકોટમાં 9 કલાકમાં સાડા ત્રણ ઇંચ વરસાદ, શહેરમાં ઠંડક પ્રસરી
હવામાન વિભાગની આગાહી વચ્ચે રાજકોટમાં મેઘરાજાએ જોરદાર મહેર વરસાવી છે. શુક્રવારે રાત્રે 9 વાગ્યાથી શનિવારે બપોરે 12 વાગ્યા સુધીમાં શહેરમાં કુલ સાડા ત્રણ ઇંચ વરસાદ નોંધાતા સમગ્ર શહેર વરસાદી માહોલમાં તરબોળ બની ગયું છે. આખી રાત ધીમીધારે અને ઝરમર વરસેલા વરસાદથી વાતાવરણમાં નોંધપાત્ર ઠંડક પ્રસરી છે અને લોકોને ગરમી તથા બફારામાંથી મોટી રાહત મળી છે. સતત વરસાદને કારણે શહેરના નીચાણવાળા વિસ્તારો, કેટલાક માર્ગો અને સોસાયટીઓમાં હળવા પાણી ભરાવાની સ્થિતિ સર્જાઈ હતી. પાણીનો નિકાલ ધીમો રહેતાં કેટલાક વિસ્તારોમાં વાહનચાલકોને સાવચેતીપૂર્વક પસાર થવું પડ્યું હતું.
વરસાદી પરિસ્થિતિને ધ્યાનમાં રાખીને તંત્ર દ્વારા શાળા-કોલેજોમાં રજા જાહેર કરવામાં આવતાં વહેલી સવારથી જ શહેરના મુખ્ય માર્ગો સામાન્ય દિવસોની સરખામણીએ સુમસામ જોવા મળ્યા હતા. માત્ર જરૂરી કામ માટે જ લોકો બહાર નીકળ્યા હતા, જ્યારે નોકરીયાતો અને વેપારીઓએ પણ સાવચેતી રાખી હતી.
વરસાદનો રાઉન્ડ યથાવત રહેવાની શક્યતા વચ્ચે મનપા અને જિલ્લા તંત્ર દ્વારા પરિસ્થિતિ પર સતત નજર રાખવામાં આવી રહી છે. વરસાદી ઠંડક વચ્ચે રાજકોટવાસીઓએ ચોમાસાની મનમોહક સોડમનો આનંદ માણ્યો, જોકે ભારે વરસાદની શક્યતાને પગલે સાવચેતી રાખવાની પણ અપીલ કરવામાં આવી રહી છે.
ધ્રોલમાં વિરામ બાદ મેઘરાજાની ધમાકેદાર એન્ટ્રી: શહેરમાં દોઢ, જાલીયા દેવાણીમાં પોણા બે ઇંચ વરસાદ
ધ્રોલ તાલુકામાં વિરામ બાદ મેઘરાજાએ ફરી એન્ટ્રી કરતાં શહેર અને ગ્રામ્ય વિસ્તારોમાં સારો વરસાદ નોંધાયો છે. ગઈકાલે સાંજથી શરૂ થયેલા વરસાદને કારણે વાતાવરણમાં ઠંડક પ્રસરી ગઈ હતી. સત્તાવાર આંકડા મુજબ, ગઈકાલે સાંજે 6 વાગ્યાથી આજે સવારે 8 વાગ્યા સુધીના 14 કલાકમાં ધ્રોલ શહેરમાં 37 મીમી (આશરે દોઢ ઇંચ) વરસાદ નોંધાયો હતો. તાલુકાના જાલીયા દેવાણી ગામમાં સૌથી વધુ 40 મીમી (આશરે પોણા બે ઇંચ) વરસાદ વરસ્યો હતો. ઉપરાંત લતીપરમાં 16 મીમી અને લૈયારા ગામમાં 8 મીમી વરસાદ નોંધાતા ખેડૂતોમાં ખુશીનો માહોલ જોવા મળ્યો છે.
મોરબીમાં સાડા ત્રણ ઇંચ વરસાદ, જિલ્લામાં મેઘમહેરથી જનજીવન તરબતર
મોરબી જિલ્લામાં શનિવારે વહેલી સવારથી મેઘરાજાએ ધમાકેદાર એન્ટ્રી કરી હતી. ભારે વરસાદની આગાહી વચ્ચે સવારે શરૂ થયેલો વરસાદ સતત ચાલુ રહ્યો હતો. સવારે ૮ વાગ્યા સુધીના આંકડા મુજબ મોરબી તાલુકામાં કુલ ૮૫ મીમી (સાડા ત્રણ ઇંચ), ટંકારામાં ૪૬ મીમી (પોણા બે ઇંચ), વાંકાનેરમાં ૪૧ મીમી (દોઢ ઇંચથી વધુ), હળવદમાં ૩૬ મીમી (સવા ઇંચથી વધુ) અને માળિયામાં ૧૧ મીમી વરસાદ નોંધાયો હતો. જિલ્લામાં સાર્વત્રિક વરસાદથી વાતાવરણમાં ઠંડક પ્રસરી હતી, જ્યારે નીચાણવાળા વિસ્તારોમાં પાણી ભરાવાની સ્થિતિ સર્જાઈ હતી. વરસાદ હજુ પણ ચાલુ રહેતા તંત્ર એલર્ટ પર રહ્યું છે.
પૂર્વ કચ્છમાં એકથી દોઢ ઇંચ વરસાદ, અન્યત્ર ઝાપટાંથી રાહત
સખત ગરમી અને બફારા બાદ પૂર્વ કચ્છમાં મેઘરાજાએ ધમાકેદાર એન્ટ્રી કરી છે. રાપર, ભચાઉ, ગાંધીધામ અને અંજાર વિસ્તારમાં એકથી દોઢ ઇંચ વરસાદ નોંધાતા વાતાવરણમાં ઠંડક પ્રસરી છે. જ્યારે ભુજ સહિત પશ્ચિમ કચ્છના અનેક વિસ્તારોમાં ઝાપટાં અને ઝરમર વરસાદથી વરસાદી માહોલ જામ્યો છે. જિલ્લામાં ચોમાસું મોડું શરૂ થતાં ખેડૂતો અને લોકો સારા વરસાદની રાહ જોઈ રહ્યા છે. પ્રથમ રાઉન્ડમાં સામાન્ય વરસાદ બાદ હવે બીજા રાઉન્ડમાં મેઘરાજા વધુ મહેરબાન બનશે તેવી આશા વચ્ચે સમગ્ર જિલ્લામાં વરસાદી વાતાવરણ છવાયું છે.
ઓગસ્ટમાં ચોમાસું નબળું પડશે, અલનીનો બનશે વિલન
ભારતીય હવામાન વિભાગ (IMD)એ આગાહી કરી છે કે ઓગસ્ટ દરમિયાન દેશમાં સામાન્યથી ઓછો વરસાદ થઈ શકે છે. પ્રશાંત મહાસાગરમાં સક્રિય મધ્યમ તીવ્રતાના અલનીનોની અસરથી દક્ષિણ-પશ્ચિમ ચોમાસું નબળું પડવાની શક્યતા છે. ઓગસ્ટમાં સામાન્યના આશરે 94 ટકા વરસાદનું અનુમાન વ્યક્ત કરવામાં આવ્યું છે, જ્યારે તાપમાન સામાન્યથી વધુ રહેવાની પણ સંભાવના છે. સપ્ટેમ્બરમાં અલનીનો વધુ મજબૂત બનતા તેની અસર ઉત્તર અને મધ્ય ભારતના અનેક રાજ્યોમાં જોવા મળી શકે છે. જોકે પોઝિટિવ ઈન્ડિયન ઓશન ડાઈપોલ (IOD) વિકસે તો અલનીનોની અસર થોડી હળવી બની શકે છે.
જુન કરતાં જુલાઈમાં 15 ગણો વધુ વરસાદ: ગુજરાતમાં સિઝનનો વરસાદ 65 ટકાને પાર
ગુજરાતમાં જુલાઈ મહિનામાં મેઘરાજાએ ધમાકેદાર બેટિંગ કરતાં રાજ્યમાં ચોમાસાની સ્થિતિમાં મોટો સુધારો થયો છે. રાજ્ય સરકારના આંકડા મુજબ જુનમાં માત્ર 35.21 મીમી વરસાદ નોંધાયો હતો, જ્યારે જુલાઈમાં 553.35 મીમી વરસાદ વરસતા એક જ મહિનામાં જુન કરતાં અંદાજે 15 ગણો વધુ વરસાદ નોંધાયો છે. જુલાઈ દરમિયાન પડેલા સાર્વત્રિક વરસાદના બે મોટા રાઉન્ડથી રાજ્યમાં ખેતી અને પીવાના પાણી અંગેની ચિંતા ઘણી હળવી બની છે.
રાજ્યમાં અત્યાર સુધી સિઝનનો કુલ વરસાદ 588.56 મીમી નોંધાયો છે, જે સરેરાશ સિઝનલ વરસાદના 64.76 ટકા જેટલો છે. છેલ્લા 24 કલાકમાં 255 તાલુકામાં વરસાદ નોંધાયો હતો. દક્ષિણ ગુજરાતમાં સૌથી વધુ વરસાદ વરસતા આ ઝોનમાં સિઝનનો વરસાદ 91.35 ટકા સુધી પહોંચી ગયો છે. મધ્ય ગુજરાતમાં 62.16 ટકા, સૌરાષ્ટ્રમાં 48.81 ટકા, ઉત્તર ગુજરાતમાં 46.76 ટકા અને કચ્છમાં 20.67 ટકા વરસાદ નોંધાયો છે.
હવામાન વિભાગે અગાઉ અલ-નીનોની અસરને કારણે ચોમાસું અસ્થિર રહેવાની આગાહી કરી હતી. જોકે જુલાઈના બે મજબૂત વરસાદી રાઉન્ડે પરિસ્થિતિમાં નોંધપાત્ર સુધારો કર્યો છે. હવે ઓગસ્ટ અને સપ્ટેમ્બરના વરસાદ પર સૌની નજર છે, કારણ કે ઓગસ્ટ દરમિયાન ચોમાસું નબળું રહેવાની સંભાવના વ્યક્ત કરવામાં આવી છે.
