લાઠીના અડતાળા ગામે ઉપસરપંચની દાદાગીરી મામલે ૩ આરોપી ઝડપાયા
ઘટનાસ્થળે રિકન્સ્ટ્રક્શન કરાયું: મંગાવી માફી!: મુખ્ય આરોપી જીતુ વાળા સહિત બે ફરાર
અગ્ર ગુજરાત, અમરેલી
અમરેલી જિલ્લાના લાઠી તાલુકાના અડતાળા ગામે પાણીના પ્રશ્ને રજૂઆત કરવા ગયેલા ગ્રામજનો પર ઉપસરપંચ દ્વારા કરવામાં આવેલા હુમલા અને દાદાગીરીના ચકચારી પ્રકરણમાં પોલીસે કડક કાર્યવાહી હાથ ધરી છે. આ મામલે લાઠી પોલીસે કુલ ૫ શખ્સો વિરુદ્ધ ગુનો નોંધ્યો હતો. જેમાંથી ૩ આરોપીઓને ઝડપી પાડવામાં આવ્યા છે. જ્યારે મુખ્ય આરોપી ઉપસરપંચ જીતુ વાળા સહિત અન્ય બે આરોપીઓ હજુ ફરાર છે. પોલીસ દ્વારા પકડાયેલા આરોપીઓ પૈકી બે આરોપીઓને ચુસ્ત પોલીસ બંદોબસ્ત વચ્ચે અડતાળા ગામે ઘટનાસ્થળે લઈ જવામાં આવ્યા હતાં. અમરેલી LCB, SOG અને લાઠી પોલીસની સંયુક્ત ટીમ દ્વારા આરોપીઓને સાથે રાખી સમગ્ર ઘટનાનું રિકન્સ્ટ્રક્શન કરાવી પંચનામું કરવામાં આવ્યું હતું. અને પોલીસે જાહેરમાં આરોપીને માફી મંગાવી હતી. કાયદો અને વ્યવસ્થાની સ્થિતિ જળવાઈ રહે અને આરોપીઓમાં કાયદાનો ડર રહે તે હેતુથી પોલીસ દ્વારા આ કાર્યવાહી હાથ ધરવામાં આવી હતી. ઘટનાની વિગત મુજબ, બે દિવસ પહેલા અડતાળા ગામના ગ્રામજનો પાણીના પ્રશ્ને રજૂઆત કરવા માટે ઉપસરપંચ જીતુભાઈ વાળાના ઘરે ગયા હતાં. આ દરમિયાન ઉશ્કેરાયેલા ઉપસરપંચ જીતુ વાળાએ એક હાથમાં રિવોલ્વર અને બીજા હાથમાં ધોકો લઈને રજૂઆત કરવા આવેલા લોકો પર હુમલો કરી માર માર્યો હતો. ઉપસરપંચની આ દાદાગીરીનો વીડિયો સોશિયલ મીડિયામાં વાયરલ થતા સમગ્ર પંથકમાં ભારે ચકચાર મચી ગઈ હતી. હાલ પોલીસ દ્વારા ફરાર મુખ્ય આરોપી જીતુ વાળા અને તેના અન્ય વ્યક્તિને ઝડપી પાડવા માટે તપાસના ચક્રો ગતિમાન કરવામાં આવ્યાં છે.


