ઇન્ડિસેન્ટ વિપ્રેઝન્ટેશન ઓફ વુમન એમેન્ડમેન્ટ બિલ ફરીથી રજૂ કરવા શકિતસિંહની રજૂઆત

 ઇન્ડિસેન્ટ વિપ્રેઝન્ટેશન ઓફ વુમન એમેન્ડમેન્ટ બિલ ફરીથી રજૂ કરવા શકિતસિંહની રજૂઆત

રાજયસભામાં માંગણી કરતા સાંસદ શકિતસિંહ ગોહિલ : OTTની અશ્લીલતા વિરૂધ્ધ કડક જોગવાઇની માંગ

અગ્ર ગુજરાત, નવી દિલ્હી

સોશિયલ મીડિયા અને OTT પર પીરસવામાં આવી રહેલી અશ્લીલતા વિરુદ્ધ કડક સજા માટે કાયદામાં સંશોધન માટે રાજ્યસભા સાંસદ શક્તિસિંહ ગોહિલે રાજ્યસભામાં મજબૂત અવાજ ઉઠાવ્યો છે. આ વિષય પર કડક વલણ અપનાવતા શક્તિસિંહ ગોહિલે ગૃહ અને સરકારનું ધ્યાન દોરતા કહ્યું કે, “આપણો દેશ સંસ્કૃતિ, સંસ્કાર અને મર્યાદા માટે સમગ્ર વિશ્વમાં જાણીતો છે, પરંતુ આજે ઘણા OTT પ્લેટફોર્મ્સ પર અશ્લીલતા પીરસવામાં આવી રહી છે. હું કર્ણાટક સરકારને અભિનંદન આપું છું- જ્યાં બાળકો માટે સોશિયલ મીડિયા પર પ્રતિબંધ મૂકવાની જાહેરાત કરવામાં આવી છે.

જ્યારે OTT પ્લેટફોર્મ નહોતું, ત્યારે UPA સરકારે ઇન્ડિસેન્ટ રિપ્રેઝન્ટેશન ઓફ વુમન એમેન્ડમેન્ટ બિલ, 2012 રજૂ કર્યું હતું. પરંતુ આ બિલ પસાર થઈ શક્યું ન હતું અને BJP સરકાર આવ્યા પછી આ બિલ પાછું ખેંચી લેવામાં આવ્યું હતું. હું સરકારને વિનંતી કરું છું- આ બિલ ફરીથી રજૂ કરવામાં આવે.”
‘અભિવ્યક્તિની સ્વતંત્રતા’ની આડમાં એક સુનિયોજિત ‘Vulgar Gang’ આપણી યુવા પેઢીને માનસિક રીતે ખોખલી કરવાનું ષડયંત્ર રચી રહી છે. ડિજિટલ પ્લેટફોર્મ્સ પર ‘Algorithm-Driven Agenda Dumping’ દ્વારા અશ્લીલતા, નગ્નતા, ઓપન રિલેશન્સ અને વિકૃત કન્ટેન્ટને ‘ન્યૂ નોર્મલ’ બનાવવામાં આવી રહ્યું છે. ‘KD’ ફિલ્મનું ‘ચુનરી’ ગીત હોય કે ‘ટટીરી’ ટ્રેક, આ માત્ર મનોરંજન નથી પરંતુ યુવાનોના મન, શરીર અને આત્માને પ્રદૂષિત કરવાનું માધ્યમ છે જે સમાજમાં ‘બળાત્કારી માનસિકતા’ના બીજ વાવી રહ્યા છે. ‘સંસ્કાર’ અને ‘સંસ્કૃતિ’ જ ભારતની કરોડરજ્જુ છે, પરંતુ આજે AI ડીપફેક્સ અને સોશિયલ મીડિયા દ્વારા પવિત્ર સંબંધોને વિકૃત કરવામાં આવી રહ્યા છે.
માત્ર પ્રતિબંધ મૂકવો એ કોઈ કાયમી ઉકેલ નથી, કારણ કે આ આધુનિક ‘રાક્ષસો’ નવા નામો સાથે ફરીથી અવતરિત થઈ જાય છે. ‘લાતોના ભૂત વાતોથી નથી માનતા’, તેથી હવે કાયદાનો વાસ્તવિક ડર ઊભો કરવો ફરજિયાત છે. ‘Indecent Representation of Women Act, 1986’ ના દાયરાને વિસ્તૃત કરીને તેમાં તમામ ઑડિયો-વિઝ્યુઅલ અને ડિજિટલ માધ્યમોને આવરી લેતા તેને એક વિશેષ કાયદો (Special Law) જાહેર કરવામાં આવે, જેની સામાન્ય કાયદાઓ પર ‘Overriding Effect’ હોય.

આ સાથે જ, નારી ગરિમા સાથે ચેડાં કરતા કન્ટેન્ટને અપલોડ કે પ્રસારિત કરવાને બિન-જામીનપાત્ર ગુનો ગણીને ન્યૂનતમ 10 વર્ષની સખત કેદ અને એક કરોડ રૂપિયાથી વધુના દંડની જોગવાઈ હોવી જોઈએ. સમાજમાં હવસની આગ ફેલાવીને પોતાના ખિસ્સા ભરનારાઓની દરેક કમાણીને ‘ગુનાની આવક’ માનીને તરત જ જપ્ત કરવામાં આવે અને ‘ઝીરો મોનેટાઇઝેશન’ નીતિનો કડકાઈથી અમલ કરવામાં આવે.