ક્રૂડ સળગ્યું, બજાર ડગમગ્યું: રોકાણકારોને એક જ દિવસે મોટો ફટકો

મધ્ય પૂર્વના તણાવે બજારોમાં ભૂકંપ

ક્રૂડ સળગ્યું, બજાર ડગમગ્યું: રોકાણકારોને એક જ દિવસે મોટો ફટકો

અમેરિકા-ઇરાન વચ્ચે ફરી હુમલાના અહેવાલોથી વૈશ્વિક ગભરાટ; સેન્સેક્સ 788 પોઇન્ટ તૂટ્યો, રૂપિયો 47 પૈસા લથડ્યો

વિદેશી વેચવાલી અને ભૂરાજકીય તણાવની ડબલ અસર; સોનું-ચાંદી નરમ, બ્રેન્ટ ક્રૂડ 97 ડોલરને પાર

અગ્ર ગુજરાત,નવી દિલ્હી

મધ્ય પૂર્વમાં ફરી વધેલા ભૂરાજકીય તણાવની સીધી અસર વૈશ્વિક તેમજ ભારતીય નાણાંબજારો પર જોવા મળી હતી. અમેરિકા અને ઇરાન વચ્ચે સીઝફાયર હોવા છતાં છૂટક હુમલાઓ અને તણાવપૂર્ણ સ્થિતિના અહેવાલો સામે આવતા રોકાણકારોમાં ગભરાટ ફેલાયો હતો. પરિણામે શેરબજાર, કરન્સી બજાર અને કિંમતી ધાતુઓમાં ભારે ઉથલપાથલ જોવા મળી હતી, જ્યારે ક્રૂડતેલના ભાવમાં તેજીનો આગડો દોડ ચાલુ રહ્યો હતો. ભારતીય શેરબજારમાં આજે શરૂઆતથી જ નબળું વલણ જોવા મળ્યું હતું. વૈશ્વિક સંકેતો નકારાત્મક રહેતા અને વિદેશી રોકાણકારોની વેચવાલીના દબાણ વચ્ચે મોટા ભાગના સેક્ટરમાં વેચવાલીનું મોજું ફરી વળ્યું હતું. બેન્કિંગ, આઈટી, ઓટો, મેટલ અને ફાઇનાન્સિયલ શેરોમાં નોંધપાત્ર ઘટાડો જોવા મળ્યો હતો. લાર્જકેપ સાથે મિડકેપ અને સ્મોલકેપ શેરોમાં પણ રોકાણકારોએ નફાવસૂલાત અને જોખમ ઘટાડવા વેચવાલી કરી હતી.
મુંબઇ શેરબજારનો સેન્સેક્સ 788 પોઇન્ટના કડાકા સાથે 73,861ના સ્તરે બંધ રહ્યો હતો. દિવસ દરમિયાન તે 74,507ની ઊંચી સપાટી અને 73,719ની નીચી સપાટી સુધી પહોંચ્યો હતો. બીજી તરફ નિફ્ટી 217 પોઇન્ટ ઘટીને 23,266 પર બંધ રહ્યો હતો. બજારના ઘટાડાથી રોકાણકારોની સંપત્તિમાં હજારો કરોડ રૂપિયાનું નુકસાન નોંધાયું હોવાનું માનવામાં આવે છે.
કરન્સી બજારમાં પણ દબાણ જોવા મળ્યું હતું. સુરક્ષિત રોકાણ તરીકે ડોલરની માંગ વધતા ભારતીય રૂપિયો નબળો પડ્યો હતો. ડોલર સામે રૂપિયો 47 પૈસા તૂટીને 95.74ના સ્તરે પહોંચી ગયો હતો. આયાતકારોની વધેલી માંગ અને વિદેશી નાણાં સંસ્થાઓની વેચવાલીથી રૂપિયામાં વધુ દબાણ અનુભવાયું હતું.
કિંમતી ધાતુઓમાં પણ આજે મંદીનું મોજું રહ્યું હતું. વૈશ્વિક બજારમાં સોનાના ભાવમાં ઘટાડો નોંધાતા સ્થાનિક વાયદા બજારમાં પણ સોનામાં નરમાઈ જોવા મળી હતી. ભારતીય વાયદા બજારમાં સોનાનો ભાવ 900 રૂપિયા ઘટીને 1,54,624 રૂપિયા પર પહોંચ્યો હતો. ચાંદીમાં પણ ભારે વેચવાલી જોવા મળી હતી અને તેનો વાયદો 1,150 રૂપિયા તૂટીને 2,65,555 રૂપિયા રહ્યો હતો.
બીજી તરફ ક્રૂડતેલના ભાવમાં સતત તેજી જોવા મળી રહી છે. મધ્ય પૂર્વમાં પુરવઠા અંગેની અનિશ્ચિતતા અને સંભવિત વિક્ષેપની ભીતિને કારણે આંતરરાષ્ટ્રીય બજારમાં ડબલ્યુટીઆઇ ક્રૂડનો ભાવ 94.99 ડોલર પ્રતિ બેરલ અને બ્રેન્ટ ક્રૂડનો ભાવ 97.16 ડોલર પ્રતિ બેરલ સુધી પહોંચી ગયો હતો. ઊંચા ક્રૂડ ભાવો આગામી દિવસોમાં મોંઘવારી અને આયાત ખર્ચ પર વધારાનો બોજ ઊભો કરી શકે તેવી ચિંતા વ્યક્ત કરવામાં આવી રહી છે.

શેરબજારનો હાલ

* સેન્સેક્સ : 788 પોઇન્ટનો ઘટાડો
* બંધ સ્તર : 73,861
* દિવસની ઊંચી સપાટી : 74,507
* દિવસની નીચી સપાટી : 73,719
* નિફ્ટી : 217 પોઇન્ટ ઘટીને 23,266

રૂપિયામાં ધોવાણ

* ડોલર સામે રૂપિયો 47 પૈસા તૂટ્યો
* રૂપિયો 95.74ના સ્તરે પહોંચ્યો
* ડોલરની માંગ વધતા દબાણ
* વિદેશી રોકાણકારોની વેચવાલીની અસર

સોના-ચાંદીમાં મંદી

* સોનું વાયદો ₹900 ઘટ્યું
* ભાવ : ₹1,54,624
* ચાંદી વાયદો ₹1,150 તૂટ્યો
* ભાવ : ₹2,65,555
* વૈશ્વિક બજારમાં પણ નરમાઈ

ક્રૂડતેલમાં આગ

* બ્રેન્ટ ક્રૂડ : 97.16 ડોલર પ્રતિ બેરલ
* WTI ક્રૂડ : 94.99 ડોલર પ્રતિ બેરલ
* મધ્ય પૂર્વના તણાવથી તેજી
* મોંઘવારી વધવાની ચિંતા ફરી ગાઢ બની

મોંઘવારી ભડકે બળશે ; પેટ્રોલ-ડીઝલ હજુ 3 રૂપિયા મોંઘા થવાની આશંકા ; ક્રિસિલનો ચેતવણીભર્યો રિપોર્ટ

મધ્ય પૂર્વમાં વધતા તણાવ અને ક્રૂડ ઓઈલના સતત ઊંચા ભાવોના કારણે દેશના લોકોને આગામી દિવસોમાં મોંઘવારીનો વધુ એક કડવો ડોઝ ભોગવવો પડી શકે છે. રેટિંગ એજન્સી ક્રિસિલના તાજેતરના અહેવાલમાં જણાવાયું છે કે પેટ્રોલ અને ડીઝલના ભાવમાં હજુ આશરે 3 રૂપિયા પ્રતિ લિટરનો વધારો થવાની શક્યતા છે, જેના કારણે પરિવહન ખર્ચ વધશે અને તેની સીધી અસર રોજિંદા જીવનમાં ઉપયોગી ચીજવસ્તુઓના ભાવ પર પડશે.
અહેવાલ મુજબ 15 મે બાદથી પેટ્રોલ અને ડીઝલના ભાવમાં સરેરાશ 7.5 રૂપિયા પ્રતિ લિટરનો વધારો થઈ ચૂક્યો છે. જો ક્રૂડ ઓઈલના ભાવ હાલના ઊંચા સ્તરે જળવાઈ રહેશે તો કુલ વધારો 10 રૂપિયા પ્રતિ લિટર સુધી પહોંચી શકે છે. ઇંધણના વધતા ભાવો મોંઘવારીને વધુ વેગ આપશે અને છૂટક મોંઘવારીમાં 0.48 ટકા સુધીનો વધારો નોંધાઈ શકે છે. ક્રિસિલના જણાવ્યા અનુસાર માર્ગ પરિવહન ક્ષેત્ર સૌથી વધુ પ્રભાવિત થશે, કારણ કે તેના કુલ ખર્ચમાં ઇંધણનો હિસ્સો આશરે 42 ટકા છે. દેશમાં લગભગ 71 ટકા માલસામાનની હેરફેર રોડ માર્ગે થતી હોવાથી પરિવહન ખર્ચમાં વધારો થતાં દૂધ, ફળ, કઠોળ, ચા-કોફી, મસાલા, માછલી સહિતના ખાદ્યપદાર્થો મોંઘા બની શકે છે. ઉપરાંત કાપડ, કન્ઝ્યુમર ઇલેક્ટ્રોનિક્સ, સિમેન્ટ, સિરામિક્સ અને લાકડાના ઉત્પાદનોના ક્ષેત્રોમાં પણ ખર્ચ વધવાની શક્યતા વ્યક્ત કરવામાં આવી છે.
રિપોર્ટમાં વધુમાં જણાવાયું છે કે ચાલુ નાણાકીય વર્ષના પ્રથમ બે મહિનામાં ક્રૂડ ઓઈલની સરેરાશ કિંમત 112 ડોલર પ્રતિ બેરલ રહી છે, જે વાર્ષિક અંદાજ કરતાં ઘણી વધુ છે. હાલ મોંઘવારી આરબીઆઈના 4 ટકાના લક્ષ્યાંકથી નીચે હોવા છતાં આગામી મહિનાઓમાં તેમાં વધારો થવાની સંભાવના છે. રિઝર્વ બેંક ઊર્જા ખર્ચ, ચોમાસું અને અલ નીનો જેવી હવામાન પરિસ્થિતિઓ પર નજીકથી નજર રાખી રહી છે.