દાણચોરીનો નવો કિમિયો : ચાંદીની વખ ચડાવી ગેરકાયદે ઘૂસાડાતુ ગોલ્ડન
સુરત એરપોર્ટ પર સિલ્વર કડુ અને સીટ નીચેથી 3૬.૮૯ લાખનું સોનું મળ્યું : એર ઇન્ટેલિજન્સ યુનિટ દ્વારા સમગ્ર કૌભાંડનો કર્યા પર્દાફાશ
અગ્ર ગુજરાત, સુરત
સોનાની સ્મગલિંગ કરવા માટે તસ્કરો અવનવા કીમિયા અપનાવતા હોય છે, પરંતુ સુરત ઇન્ટરનેશનલ એરપોર્ટ પર કસ્ટમ્સ વિભાગે તસ્કરીની એક સાવ નવી જ ટ્રિક પકડી પાડી છે. સામાન્ય રીતે સોના પર કેમિકલનું કોટિંગ થતું હોય છે, પરંતુ આ કેસમાં તસ્કરે કસ્ટમ્સ અધિકારીઓની નજરમાંથી બચવા માટે અસલી સોનાના કડા પર ચાંદીનો એવો ફિનિશિંગ ઢોળ ચઢાવી દીધો કે જોતાં જ એવું લાગે કે આ માત્ર ચાંદીનું સામાન્ય કડું છે. એર ઇન્ટેલિજન્સ યુનિટ (AIU) એ આ નવી ટ્રિકનો પર્દાફાશ કરી 36.89 લાખ રૂપિયાનું સોનું પકડી પાડ્યું છે.
પકડાઈ જવાના ડરથી સ્મગલરે આ વખતે કસ્ટમ્સ કલિયરન્સ મેળવવા માટે માસ્ટરપ્લાન બનાવ્યો હતો. તેણે 24 કેરેટ શુદ્ધ સોનાના કડાની ઉપર સિલ્વર કલરનું એવું આઉટર ફિનિશિંગ (કોટિંગ) કરી દીધું જેથી સ્કેનરમાં કે તપાસમાં તે સામાન્ય ચાંદી કે સ્ટીલ જેવું દેખાય. જોકે, કસ્ટમ્સ અધિકારીઓની બાજ નજરથી આ નવી ટ્રિક છૂપી રહી શકી ન હતી. કડાની બનાવટ અને વજનમાં શંકા જતાં જ્યારે સરકારી વેલ્યુઅર પાસે તેની કસોટી કરાવવામાં આવી ત્યારે બહારનું સિલ્વર પડ તૂટતા જ અંદરથી 238 ગ્રામ અસલી સોનું નીકળી પડ્યું હતું.
આ સમગ્ર મામલો 14 જૂન 2026ના રોજ દુબઈથી સુરત આવેલી એર ઈન્ડિયા એક્સપ્રેસની ફ્લાઈટ (IX-274) માં સામે આવ્યો હતો. ફ્લાઈટ સુરત એરપોર્ટ પર લેન્ડ થયા બાદ તમામ મુસાફરો ઉતરી ગયા હતા. ત્યારબાદ કસ્ટમ્સની ટીમે એરક્રાફ્ટની અંદર સર્ચ ઓપરેશન શરૂ કર્યું હતું. આ દરમિયાન પેસેન્જર સીટ નંબર 21-B ની નીચેથી એક કાળા વેલ્વેટ કાપડની નાની થેલી બિનવારસી હાલતમાં મળી આવી હતી, જેમાં આ કડું છુપાવેલું હતું.
એરપોર્ટ પર કસ્ટમ્સનું ચેકિંગ અત્યંત કડક હોવાથી પકડાઈ જવાની બીકે પેસેન્જર સોનાનું આ કડું સીટ નીચે જ છોડીને ઈમિગ્રેશન પતાવી ભાગી ગયો હોવાની પ્રબળ આશંકા છે. હાલમાં આ 36.89 લાખની કિંમતનું સોનું કસ્ટમ્સ એક્ટ, 1962 હેઠળ જપ્ત કરવામાં આવ્યું છે. કસ્ટમ્સ વિભાગ હવે ફ્લાઈટના ચાર્ટમાંથી સીટ નંબર 21-B પર કયા પેસેન્જરે દુબઈથી મુસાફરી કરી હતી તેની કુંડળી કાઢી રહ્યું છે, જેથી આ નવી ટ્રિક અજમાવનાર સ્મગલરને જેલના સળિયા પાછળ ધકેલી શકાય.
