ગુજરાતને ઉડતા પંજાબ બનાવવામાં બેંગકોક કેન્દ્ર બિંદુ, શખ્સ ચાર કરોડના ગાંજા સાથે પકડાયો
અમદાવાદ એરપોર્ટ પર બેંગકોકની ફલાઇટમાં આવેલા મુસાફર પાસેથી ૨૨ ફૂડ પેકેટસ મળ્યા
અગ્ર ગુજરાત, અમદાવાદ
અમદાવાદના ફોરેન પોસ્ટ ઓફિસમાં પાર્સલ મારફતે ગાંજો મંગાવવાના રેકેટની શાહી હજુ સુકાઈ નથી, ત્યાં જ અમદાવાદ ઇન્ટરનેશનલ એરપોર્ટ પરથી કરોડો રૂપિયાનું ડ્રગ્સ પકડાતા સળવળાટ મચી ગયો છે. કસ્ટમ વિભાગના એર ઇન્ટેલિજન્સ યુનિટ (AIU) એ એક મોટી કાર્યવાહી કરતા બેંગકોકથી અમદાવાદ આવેલા એક મુસાફર પાસેથી અંદાજે ₹4 કરોડની કિંમતનો હાઇડ્રોપોનિક ગાંજો ઝડપી પાડ્યો છે. આંતરરાષ્ટ્રીય બજારમાં ભારે કિંમતી ગણાતા આ ડ્રગ્સ સાથે મહારાષ્ટ્રના ઉલ્હાસનગરના એક 40 વર્ષીય શખ્સની ધરપકડ કરવામાં આવી છે.
પ્રાપ્ત વિગતો અનુસાર 1 જુલાઈ, 2026ના રોજ બેંગકોકથી ફ્લાઇટ નંબર TG-343 દ્વારા અમદાવાદ એરપોર્ટ પર એક પુરુષ મુસાફર ઉતર્યો હતો. આ 40 વર્ષીય આરોપી મહારાષ્ટ્રના ઉલ્હાસનગરનો રહેવાસી છે અને તે પ્રથમ વખત જ વિદેશ પ્રવાસ કરીને અમદાવાદ એરપોર્ટ પર આવ્યો હતો. તેની શંકાસ્પદ હિલચાલને પગલે કસ્ટમ્સના AIU યુનિટે તેને અટકાવ્યો હતો. જ્યારે કસ્ટમ્સ વિભાગના અધિકારીઓએ મુસાફરની ચેક-ઇન કરેલી ટ્રોલી બેગની ઝીણવટભરી તપાસ કરી, ત્યારે તેઓ પણ ચોંકી ઉઠ્યા હતા. ટ્રોલી બેગની અંદર રાખેલા સામાન્ય ખાદ્ય પદાર્થોના પેકેટોની અંદર ડ્રગ્સ છુપાવવામાં આવ્યું હતું. કસ્ટમ્સને આ ફૂડ પેકેટ્સમાંથી 22 પારદર્શક સફેદ પોલીથીનથી લપેટેલા શંકાસ્પદ પેકેટ મળી આવ્યા હતા.
જપ્ત કરાયેલા આ શંકાસ્પદ પદાર્થની જ્યારે એરપોર્ટ પર જ કસ્ટમ્સની સ્પેશિયલ ‘ફીલ્ડ ટેસ્ટ કીટ’ દ્વારા તપાસ કરવામાં આવી, ત્યારે તેનું પરિણામ પોઝિટિવ આવ્યું હતું. આ પદાર્થ ઉચ્ચ ગુણવત્તાવાળો ‘હાઇડ્રોપોનિક ગાંજો’ હોવાનું સાબિત થયું હતું. પકડાયેલા પ્રતિબંધિત ડ્રગ્સનું કુલ વજન 4.276 કિલોગ્રામ છે, જેની આંતરરાષ્ટ્રીય બજારમાં અંદાજિત કિંમત ₹4 કરોડ જેટલી થવા જાય છે.
કસ્ટમ્સ વિભાગે આ કરોડોની કિંમતનો પ્રતિબંધિત જથ્થો નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ, 1985ની કડક જોગવાઈઓ હેઠળ જપ્ત કરી લીધો છે. ડ્રગ્સની હેરાફેરી કરનાર ઉલ્હાસનગરના શખ્સની સ્થળ પર જ ધરપકડ કરી લેવામાં આવી છે. આ ડ્રગ્સ કોને ડિલિવરી કરવાનું હતું અને આ આંતરરાષ્ટ્રીય ડ્રગ્સ રેકેટના તાર ક્યાં સુધી જોડાયેલા છે, તે દિશામાં કસ્ટમ્સ અને સુરક્ષા એજન્સીઓએ ઊંડાણપૂર્વકની તપાસ હાથ ધરી છે.
