પોરબંદરમાં અરબી સમુદ્રના કિનારે સમુહમાં વિહાર કરતું ડોલ્ફિનોનું ઝૂંડ
આહલાદક દ્રશ્ય સ્થાનિક માછીમારો અને સહેલાણીઓ માટે આકર્ષણ બન્યું
અગ્ર ગુજરાત, પોરબંદર
ગુજરાતના ઐતિહાસિક અને પ્રકૃતિથી સભર એવા પોરબંદરના દરિયા કિનારેથી એક અત્યંત મનમોહક અને અદ્ભુત નજારો સામે આવ્યો છે. ચોમાસાના પ્રારંભિક વરસાદી માહોલ વચ્ચે પોરબંદરના અરબી સમુદ્રમાં એકસાથે અનેક ડોલ્ફિનો સ્વેચ્છાએ વિહાર કરતી જોવા મળી છે. આ આહલાદક દ્રશ્ય સ્થાનિક માછીમારો અને સહેલાણીઓ માટે ભારે આકર્ષણનું કેન્દ્ર બન્યું છે.
પ્રાપ્ત વિગતો અનુસાર, પોરબંદરના દરિયામાં એક બે નહીં પરંતુ આખી 8 થી 10 ડોલ્ફિનોનું એક મોટું ઝુંડ નજરે પડ્યું હતું. આ ડોલ્ફિનો સમુદ્રના મોજાંઓ સાથે તાલ મિલાવીને ઊંચા-ઊંચા કૂદકા મારી રહી હતી. સામાન્ય રીતે ડોલ્ફિન જેવા જીવો દરિયાના શાંત અને ઊંડા પાણીમાં રહેવાનું પસંદ કરે છે, પરંતુ પોરબંદરના કિનારે તેમનું આ પ્રકારે લાઈવ પરફોર્મન્સ જોવા મળવું એ પ્રકૃતિ પ્રેમીઓ માટે એક વિરલ લહાવો સાબિત થયો છે.
અત્રે ઉલ્લેખનીય છે કે, અગાઉ પણ પોરબંદરના સમુદ્ર કિનારે અવારનવાર ડોલ્ફિનો જોવા મળી ચૂકી છે. આ વિસ્તારમાં પ્રદૂષણનું ઓછું પ્રમાણ અને સાનુકૂળ વાતાવરણ હોવાના કારણે હવે ફરી એકવાર મોટી સંખ્યામાં ડોલ્ફિનો પોરબંદર તરફ આકર્ષાઈ રહી છે. વન વિભાગ અને દરિયાઈ જીવ સૃષ્ટિના નિષ્ણાતોના મતે, આ વિસ્તારમાં ડોલ્ફિનોની વારંવાર હાજરી દર્શાવે છે કે અહીં દરિયાઈ પર્યાવરણ અને તેમની ખોરાકની કડી અત્યંત સંગીન છે, જે એક ખૂબ જ શુભ સંકેત છે.
