અમરેલી ખાતે મુખ્યમંત્રી ભૂપેન્દ્ર પટેલની ઉપસ્થિતિમાં ૮૦મા સ્વાતંત્ર્ય દિવસની રાજ્યકક્ષાની ઉજવણી કરાઇ

અમરેલી ખાતે મુખ્યમંત્રી ભૂપેન્દ્ર પટેલની ઉપસ્થિતિમાં ૮૦મા સ્વાતંત્ર્ય દિવસની રાજ્યકક્ષાની ઉજવણી કરાઇ

ધ્વજવંદન, આકાશમાંથી હેલિકોપ્ટર દ્વારા પુષ્પવર્ષા, બાલિકાઓનું બેગપાઇપર બેન્ડ અને સાહસિક સ્ટંટ સાથે દેશભક્તિસભર માહોલ સર્જાયો

અગ્ર ગુજરાત, અમરેલી

અમરેલીના પોલીસ પરેડ ગ્રાઉન્ડ ખાતે ૮૦મા સ્વાતંત્ર્ય પર્વની રાજ્યકક્ષાની ઉજવણી મુખ્યમંત્રી ભૂપેન્દ્ર પટેલની ઉપસ્થિતિમાં આન-બાન-શાનથી સંપન્ન થઈ હતી. મુખ્યમંત્રીના હસ્તે રાષ્ટ્રધ્વજ લહેરાવી સલામી આપવામાં આવી હતી, જે વેળાએ હેલિકોપ્ટરથી પુષ્પવર્ષા, પોલીસ બેન્ડની કર્ણપ્રિય સુરાવલી અને ગગનભેદી હર્ષનાદથી સમગ્ર પરિસર દેશભક્તિના રંગે રંગાઈ ગયું હતું.

વિદ્યાસભાના વિદ્યાર્થીઓએ ‘મારું અમરેલી’ થીમ આધારિત કૃતિ અને અંબાજીના શ્રી શક્તિ સેવા કેન્દ્રની આદિજાતિ બાલિકાઓના બેગપાઇપર બેન્ડે વિશેષ આકર્ષણ જમાવ્યું હતું. આ ઉપરાંત યોગ નિદર્શન, નારી શક્તિ સાંસ્કૃતિક કાર્યક્રમ, મહિલા રાયફલ ડ્રીલ, મોટરસાયકલ સ્ટંટ, ડોગ શો અને અશ્વ શો રજૂ કરાયા હતા.

મુખ્યમંત્રીએ ખુલ્લી જીપમાં ફરીને નાગરિકોનું અભિવાદન ઝીલ્યું હતું અને ઉજવણીના સમાપને પરેડ ગ્રાઉન્ડ ખાતે વૃક્ષારોપણ કર્યું હતું. આ પ્રસંગે ઊર્જા મંત્રી કૌશિક વેકરીયા, સાંસદ ભરત સુતરિયા, ગોવિંદ ધોળકિયા, મુખ્ય સચિવ મનોજકુમાર દાસ, DGP જી.એસ.મલિક, જિલ્લા કલેક્ટર વિકલ્પ ભારદ્વાજ સહિત ઉચ્ચ અધિકારીઓ અને પદાધિકારીઓ બહોળી સંખ્યામાં હાજર રહ્યા હતા.

મુખ્યમંત્રી ભૂપેન્દ્ર પટેલની મહત્વની જાહેરાતો:

• ગ્રામીણ પ્લોટ ફાળવણી: જમીન ઉપલબ્ધ ન હોય તો ખાનગી જમીન ખરીદીને પણ ગ્રામીણ પરિવારોને વિનામૂલ્યે પ્લોટ આપવામાં આવશે.
• રસ્તાઓનું નવીનીકરણ: રાજ્યના રોડ નેટવર્કને વધુ મજબૂત બનાવવા રૂ. ૩,૪૨૮ કરોડના ખર્ચે ૨૧૦ કિમીના રસ્તાઓનું નવીનીકરણ કરાશે.
• આંગણવાડી બાળકો માટે પોષણ આહાર: પૂરક પોષણ આહારના દરમાં ૬૭ ટકાનો વધારો કરી પ્રતિ બાળક દરરોજ રૂ. ૫.૧૦ના બદલે હવે રૂ. ૮.૫૦ ફાળવવામાં આવશે.
• વિદેશ અભ્યાસ લોન: બિનઅનામત વર્ગના યુવાનો માટે વિદેશ અભ્યાસ લોન અર્થે કૌટુંબિક આવકમર્યાદા રૂ. ૬ લાખથી વધારીને રૂ. ૧૦ લાખ કરવામાં આવી.