દિવાળી પૂર્વે રંગોળી ખરીદીમાં તેજી: રાજકોટની બજારમાં ભીડ
ગણતરીના દિવસો જ બાકી રહેતા ગ્રાહકો ઉમટયા : બજારમાં રોનક
અગ્ર ગુજરાત, રાજકોટ
દિવાળીના પાવન પર્વને હવે ગણતરીના દિવસો બાકી છે ત્યારે ઘર-આંગણે આંગણાને રંગબેરંગી રંગોથી શણગારવા માટે લોકોમાં ભારે ઉત્સાહ જોવા મળી રહ્યો છે. આ વર્ષે દિવાળીના તહેવાર પૂર્વે રંગોળી અને ચિરોડી કલર્સના વેપારમાં અદભુત અને અભૂતપૂર્વ તેજી જોવા મળી રહી છે, જેને લઈને બજારોમાં ગ્રાહકોની ભારે ભીડ ઉમટી છે. ખાસ વાત એ છે કે, મોંઘવારીના આ યુગમાં પણ આ વખતે રંગોળી અને ચિરોડી કલર્સના ભાવોમાં એક પણ ટકાનો વધારો કરવામાં આવ્યો નથી, જેના કારણે સામાન્ય જનતાને વાજબી ભાવે સરળતાથી કલર્સ ઉપલબ્ધ થઈ રહ્યા છે.
વ્યવસાયિક મોરચે આ વર્ષે નવો રેકોર્ડ સર્જાયો છે. સામાન્ય રીતે શ્રાદ્ધ પક્ષમાં વેપાર ધીમો રહેતો હોય છે, પરંતુ આ વર્ષે શ્રાદ્ધ પક્ષને બદલે સાતમ-આઠમથી જ રંગોળી કલર્સનું વિતરણ શરૂ કરી દેવામાં આવ્યું હતું. જેના પરિણામે સૌરાષ્ટ્રના પ્રમુખ મથકો એવા બગસરા, અમરેલી અને બોટાદમાં ૨૦૦-૨૦૦ ટન કલર્સનો રેકોર્ડબ્રેક વેપાર નોંધાયો છે.
ગુજરાતમાં તૈયાર થતી રંગોળી અને ચિરોડી કલર્સની માંગ હવે માત્ર રાજ્ય પૂરતી સીમિત નથી રહી, પરંતુ તેનો વ્યાપ દેશભરમાં ફેલાયો છે. કેરળ, તમિલનાડુ અને કર્ણાટક જેવા દક્ષિણ ભારતીય રાજ્યોમાં પણ ગુજરાતની રંગોળીના રંગો જામ્યા છે. ઇતિહાસમાં પ્રથમવાર પૂર્વોત્તરના સેવન સિસ્ટર્સ રાજ્યો (મેઘાલય, મણિપુર, નાગાલેન્ડ, ત્રિપુરા) સુધી પણ અહીંના રંગો પહોંચ્યા છે, જે સ્થાનિક ઉદ્યોગો માટે ગર્વની બાબત છે.
આ જબરદસ્ત સફળતા પાછળ સરકારની મહત્વની ભૂમિકા રહી છે. સરકાર દ્વારા આપવામાં આવતી સબસિડી અને સહાયના પગલે ઉત્પાદનમાં ૩૨% નો મોટો વધારો નોંધાયો છે. ઉત્પાદન વધવાની સાથે ભાવ નિયંત્રણમાં રહેતા સામાન્ય જનતા અને વેપારીઓ બંનેમાં દિવાળીના તહેવાર અગાઉ ભારે ખુશીનો માહોલ જોવા મળી રહ્યો છે.
