યુનિક વિકલાંગ ટ્રસ્ટ દ્વારા ‘દિવ્યાંગ રાસ મહોત્સવ’ યોજાયો
રાજ્યભરમાંથી ૨૫૦થી વધુ દિવ્યાંગ ભાઈ-બહેનોએ ઉત્સાહભેર લીધો ભાગ | વિજેતાઓને આકર્ષક ઇનામો કરાયા એનાયત
અગ્ર ગુજરાત, રાજકોટ
શ્રી યુનિક વિકલાંગ ચેરીટેબલ ટ્રસ્ટ દ્વારા પોતાની વર્ષો જૂની પરંપરાને જાળવી રાખીને આ વર્ષે પણ અનંતજી વડનગરા નાગર બોર્ડિંગના ગ્રાઉન્ડ ખાતે ‘યુનિક દિવ્યાંગ રાસમહોત્સવ-૨૦૨૬’નું દિવ્ય અને આકર્ષક આયોજન કરવામાં આવ્યું હતું. રમતગમત, યુવા અને સાંસ્કૃતિક પ્રવૃત્તિઓ વિભાગ, ગાંધીનગરની પ્રેરણાથી યોજાયેલા આ મહોત્સવમાં દિવ્યાંગોની અદભુત પ્રતિભા અને ઉત્સાહ જોવા મળ્યો હતો. આ રાસમહોત્સવમાં રાજકોટ ઉપરાંત મોરબી, ભાવનગર, સુરત, ખેડા, નડિયાદ સહિત ગુજરાતના વિવિધ વિસ્તારોમાંથી ૨૫૦થી વધુ દિવ્યાંગ ભાઈઓ અને બહેનોએ ભાગ લીધો હતો. સંગીતના તાલ અને ગરબાના ઘૂમરા સાથે દિવ્યાંગ ખેલૈયાઓએ રાસની રમઝટ બોલાવીને આનંદ, ઉત્સાહ અને એકતાનો અનોખો મેળાપ સર્જ્યો હતો.
વિવિધ સ્પર્ધાત્મક રાઉન્ડના અંતે બેસ્ટ વેશભૂષા, બેસ્ટ પરફોર્મન્સ, બેસ્ટ કપલ, બેસ્ટ પરફોર્મન્સ ઇન કિટ્સ શ્રેણીઓમાં વિજેતાઓની પસંદગી કરી આકર્ષક ઇનામો એનાયત કરવામાં આવ્યા હતા.
આ આયોજનને સફળ બનાવવા માટે ડૉ. હેમાંગભાઈ વસાવડા (નાગર બોર્ડિંગ), પ્રવિણાબેન ચોવટિયા (વિરાણી સ્કૂલ), ચિરાગભાઈ ધામેચા (સી. જે. ગ્રુપ), વિપુલભાઈ બોકરવાડિયા, બંટીભાઈ, ભવાની ઈન્ડસ્ટ્રીઝ, પૂનમબેન કોરાટ, લક્ષ્મીબેન મિશ્રા-ગ્રુપ, ડી જવેલર્સ તથા ગોકુલ હોસ્પિટલ સહિતના અનેક દાતાઓ અને સંસ્થાઓએ વિશેષ સહયોગ પૂરો પાડ્યો હતો. સંસ્થાના પ્રમુખ શૈલેષભાઈ પંડ્યા (મો. ૯૨૭૭૮ ૦૭૭૭૮) દ્વારા યાદીમાં જણાવ્યા મુજબ, આવા કાર્યક્રમોથી દિવ્યાંગજનોમાં આત્મવિશ્વાસ વધે છે અને સમાજમાં એકતાનો સુંદર સંદેશ જાય છે.
