મોરબીમાં મહંતસ્વામી અને મુખ્યમંત્રીની ઉપસ્થિતિમાં BAPS સ્વામિનારાયણ મંદિરનું લોકાર્પણ
૨૫,૦૦૦ ભક્તોની ઉપસ્થિતિમાં શરદપૂર્ણિમા અને પ્રાણપ્રતિષ્ઠા મહોત્સવની દિવ્ય ઉજવણી : ૮ એકરમાં ફેલાયેલ ભવ્ય શિખરબદ્ધ મંદિર જનતા માટે ખુલ્લું મુકાયું
અગ્ર ગુજરાત, રાજકોટ-મોરબી
ભગવાન શ્રી સ્વામિનારાયણના પહેલા આધ્યાત્મિક વારસદાર અને અનાદિ મૂળ અક્ષરમૂર્તિ અક્ષરબ્રહ્મ ગુણાતીતાનંદ સ્વામીના પ્રાગટ્ય દિન તથા પવિત્ર શરદપૂર્ણિમાના અવસરે મોરબી ખાતે નૂતન શિખરબદ્ધ BAPS સ્વામિનારાયણ મંદિરનો ભવ્ય લોકાર્પણ અને પ્રાણપ્રતિષ્ઠા મહોત્સવ પરમ પૂજ્ય મહંતસ્વામી મહારાજના વરદ હસ્તે સંપન્ન થયો હતો. આ ઐતિહાસિક પ્રસંગે અંદાજે ૨૫,૦૦૦ જેટલા ભાવિક ભક્તો ઉપસ્થિત રહી ધન્યતા અનુભવી હતી.
આ દિવ્ય સમારોહમાં પૂજ્ય મહંતસ્વામી મહારાજની સાથે ગુજરાતના મુખ્યમંત્રી ભૂપેન્દ્રભાઈ પટેલ પણ ખાસ સહભાગી થયા હતા. તેમની સાથે રાજ્યના મંત્રીઓ, અનેક મહાનુભાવો અને સમાજના શ્રેષ્ઠિઓએ પણ ઉપસ્થિતિ રહી હતી. મંચ પર મહાનુભાવોનું સ્વાગત હારતોરા અને સ્મૃતિભેટ અર્પણ કરીને કરવામાં આવ્યું હતું.
ધૂન, કીર્તન અને આરતીથી શરૂ થયેલા આ સમારોહમાં વિવિધ સંતો દ્વારા વિચારો રજૂ કરવામાં આવ્યા હતા. પૂજ્ય આદર્શ જીવન સ્વામીએ ‘ગુણાતીતાનંદ સ્વામી મૂળ અક્ષર’ અને મંદિર પ્રતિષ્ઠાનું મહાત્મ્ય સમજાવ્યું હતું. પૂજ્ય જ્ઞાનવત્સલ સ્વામીએ આ મંદિર દ્વારા સેવા, સંસ્કાર અને શ્રદ્ધાનું સિંચન કેવી રીતે થઈ રહ્યું છે તે વિશે વક્તવ્ય આપ્યું હતું. પૂજ્ય બ્રહ્મવિહારી સ્વામીએ મંદિર નિર્માણમાં સહયોગ આપનાર હરકોઈના યોગદાનને બિરદાવ્યું હતું. વિવેકસાગરદાસ સ્વામીએ મોરબીના ‘મંદિરનો ઇતિહાસ’ અને પૂજ્ય આનંદ સ્વરૂપ સ્વામીએ ‘ગુણાતીત સંતનું અખંડ પ્રાગટ્ય’ વિષય પર માર્ગદર્શન પૂરું પાડ્યું હતું.
મુખ્યમંત્રી ભૂપેન્દ્રભાઈ પટેલે BAPS સંસ્થાના સનાતન અને સમાજ ઉત્કર્ષના યોગદાનને બિરદાવતા મોરબી મંદિરના અદભુત નિર્માણ બદલ પરમ પૂજ્ય મહંતસ્વામી મહારાજનો હૃદયપૂર્વક આભાર વ્યક્ત કર્યો હતો. પરમ પૂજ્ય મહંતસ્વામી મહારાજે આશીર્વચન પાઠવતા જણાવ્યું હતું કે, “આ મંદિર તમારા બધાનું છે. અહીં જે કોઈ દર્શન કરવા આવે તે તને, મને અને ધને સુખી થાય – ભગવાનને પ્રાર્થના.”
બાળકો અને યુવાનો દ્વારા ભક્તિનૃત્ય રજૂ કરીને ગુરુભક્તિ અદા કરવામાં આવી હતી. અંતિમ ચરણમાં ૨૫,૦૦૦ દીવાઓ સાથે સમૂહ આરતી ઉતારી આ ભવ્ય મહોત્સવની પૂર્ણાહુતિ કરવામાં આવી હતી.
