વડતાલ ખાતે યોજાયેલી અખિલ ભારતીય રાષ્ટ્રીય શૈક્ષિક મહાસંઘની રાજ્ય કારોબારીમાં રાજકોટ જિલ્લાનું પ્રતિનિધિત્વ
૫,૦૦૦ શિક્ષકમિત્રોના પ્રશ્નો રાજ્ય કક્ષાએ ગૂંજ્યા : જૂની પેન્શન યોજના (OPS) અને બિન-શૈક્ષણિક ભારણ ઘટાડવા વિશેષ રજૂઆત
અગ્ર ગુજરાત, રાજકોટ
અખિલ ભારતીય રાષ્ટ્રીય શૈક્ષિક મહાસંઘ, ગુજરાતની રાજ્ય કારોબારી તથા સાધારણ સભાની મહત્વપૂર્ણ બેઠક ઐતિહાસિક તીર્થધામ વડતાલ મુકામે યોજાઈ હતી. રાજ્યભરમાંથી પ્રાંત, સંભાગ, જિલ્લા અને તાલુકા કક્ષાના ૭૦૦થી વધુ અગ્રણીઓની ઉપસ્થિતિમાં યોજાયેલી આ બેઠકમાં સંગઠનાત્મક મજબૂતી તેમજ શિક્ષકહિતના વિવિધ જ્વલંત મુદ્દાઓ પર વ્યાપક મંથન કરવામાં આવ્યું હતું.
આ રાજ્યસ્તરીય અધિવેશનમાં અખિલ ભારતીય રાષ્ટ્રીય શૈક્ષિક મહાસંઘ, જિ. રાજકોટ દ્વારા રાજકોટ જિલ્લાના અંદાજે ૫,૦૦૦ જેટલા શિક્ષકમિત્રોના સેવાકીય, શૈક્ષણિક અને વહીવટી પ્રશ્નોને ખૂબ જ પ્રભારી અને મુદ્દાસર રીતે રાજ્ય મંચ સમક્ષ રજૂ કરવામાં આવ્યા હતા.
બેઠકના વિવિધ સત્રોમાં અખિલ ભારતીય સંગઠન મંત્રી આદરણીય મહેન્દ્રજી કપૂર, આદરણીય મોહનજી પુરોહિત, પ્રાંત અધ્યક્ષ આદરણીય ભીખાભાઈ પટેલ, પ્રાંત અધ્યક્ષ આદરણીય મિતેશભાઈ ભટ્ટ અને મહામંત્રી આદરણીય પરેશભાઈ પટેલનું પ્રેરણાદાયી માર્ગદર્શન પ્રાપ્ત થયું હતું. વરિષ્ઠ આગેવાનોએ સંગઠનને વધુ વ્યાપક અને શિક્ષકહિતલક્ષી બનાવવા માટે મૂલ્યવાન માર્ગદર્શન પૂરું પાડ્યું હતું.
રાજકોટ જિલ્લા દ્વારા રજૂ થયેલા મુખ્ય પ્રશ્નોમાં કર્મચારીઓની મુખ્ય માંગણી સમાન ઓપીએસ લાગુ કરવા અંગે સૂર વ્યક્ત કરાયો હતો. ધોરણ ૬ થી ૮ ના શિક્ષકોના પ્રશ્નો અને વર્ષ ૨૦૦૪ની ભરતીના પ્રતીક્ષાયાદીના શિક્ષકોના પડતર પ્રશ્નો, સમયસર પગારધોરણ, બઢતી, પેન્શન તથા નાણાકીય લાભોના કેસોનું સમયબદ્ધ નિરાકરણ. HTAT, BRC-CRC ભરતી, પારદર્શક બદલી પ્રક્રિયા તેમજ રજાના અન્ય લાભો સરળ બનાવવા. શાળાઓમાં માળખાકીય સુવિધાઓ, શિક્ષણની ગુણવત્તા, સરકારી શાળાઓનું સશક્તિકરણ તેમજ બિન-શૈક્ષણિક કામગીરી અને ડિજિટલ પોર્ટલના ભારણમાં ઘટાડો કરવાની પ્રબળ માંગ કરાઈ હતી.
રાજકોટ જિલ્લા સંગઠને સ્પષ્ટ કર્યું હતું કે શિક્ષકોના પ્રશ્નો માત્ર વ્યક્તિગત નથી, પરંતુ તેની સીધી અસર શાળાઓની કાર્યક્ષમતા અને વિદ્યાર્થીઓના સર્વાંગી વિકાસ પર પડે છે. શિક્ષકોને બિન-શૈક્ષણિક કામગીરીમાંથી મુક્તિ મળે જેથી તેઓ શિક્ષણ કાર્ય પર વધુ ધ્યાન કેન્દ્રિત કરી શકે.
આ રાજ્યસ્તરીય બેઠકમાં રાજકોટ જિલ્લા તરફથી સંજયભાઈ હુંબલ (જિલ્લા અધ્યક્ષ), સાગરભાઈ પોપટ (જિલ્લા મહામંત્રી), નયનભાઈ વ્યાસ (સહમંત્રી), હિતેશભાઈ ભંડેરી (લોધિકા તાલુકા અધ્યક્ષ), મનીષભાઈ ચાવડા (રાજકોટ તાલુકા મહામંત્રી)એ ઉપસ્થિત રહીને જિલ્લાના શિક્ષકોના અવાજને બુલંદ બનાવ્યો હતો.
વડતાલ બેઠકમાં ગ્રામ્ય કક્ષાથી લઈને રાજ્ય કક્ષા સુધી સંગઠનને વધુ શક્તિશાળી બનાવવા અને વધુમાં વધુ શિક્ષકમિત્રોને જોડાવાનો સંકલ્પ લેવાયો હતો. અખિલ ભારતીય રાષ્ટ્રીય શૈક્ષિક મહાસંઘ, જિ. રાજકોટ દ્વારા “રાષ્ટ્ર કે હિતમાં શિક્ષા, શિક્ષા કે હિતમાં શિક્ષક, શિક્ષક હિતમાં સમાજ” ના ઉદાત્ત ધ્યેય સાથે શિક્ષક, વિદ્યાર્થી અને ગુણવત્તાયુક્ત શિક્ષણના સશક્તિકરણ માટે સતત કાર્યરત રહેવાની પ્રતિજ્ઞા લેવામાં આવી હતી.
