ધોરાજીના ‘જય ગેલી અંબે ભૂલકા ગરબી મંડળ’ના 25 વર્ષ પૂર્ણ થતાં 200 કાર્યકરોનું સન્માન
સિલ્વર જ્યુબિલી વર્ષમાં 1,800થી વધુ બાળાઓએ લીધો રાસ-ગરબીમાં ભાગ; પ્રમુખ સી.સી. અંટાળાનું સંસ્થાઓ દ્વારા સન્માન
અગ્ર ગુજરાત, ધોરાજી
ધોરાજીના ખાડિયા વિસ્તારમાં બજરંગ ગ્રુપ આયોજિત ‘જય ગેલી અંબે ભૂલકા ગરબી મંડળ’ છેલ્લા 25 વર્ષથી ભૂલકા ગરબીનું નિસ્વાર્થભાવે સફળ આયોજન કરી રહ્યું છે. આ ગરબીમાં દર વર્ષે 1,000થી વધુ બાળાઓ ઉત્સાહપૂર્વક રાસ-ગરબીમાં ભાગ લે છે. ચાલુ વર્ષે ગરબી મંડળે 25 વર્ષ પૂર્ણ કરી સિલ્વર જ્યુબિલીની ઉજવણી કરી હતી, જેમાં બે વર્ષથી લઈને દસ વર્ષ સુધીની 1,800થી વધુ બાળાઓએ ભાગ લઈને ગરબીની શોભામાં વધારો કર્યો હતો.આ ઐતિહાસિક સફરની ખુશીમાં શરદ પૂનમના પાવન અવસરે વિશેષ સન્માન સમારોહ યોજવામાં આવ્યો હતો. ગરબીના આયોજનમાં છેલ્લા 25 વર્ષથી તન, મન અને ધનથી નિસ્વાર્થ સેવા આપતા 200 જેટલા કાર્યકરોનું પુષ્પગુચ્છ, સન્માનપત્ર અને શાલ અર્પણ કરીને સન્માન કરવામાં આવ્યું હતું.
આ કાર્યક્રમમાં જય ગેલી અંબે ગરબી મંડળના પ્રમુખ સી.સી. અંટાળા, હરિભાઈ અંટાળા, પીપુભાઈ અંટાળા, ધોરાજી નગરપાલિકાનાં પ્રમુખ પાયલબેન ધોળકિયા, કારોબારી ચેરમેન સી.સી. અંટાળા, ઉપપ્રમુખ ચિન્ટુભાઈ કોયાણી, ધોરાજી ખોડલધામના પ્રમુખ દિનેશભાઈ વોરા, એડવોકેટ દિનેશ વોરા, અરવિંદ કાપડિયા, પાર્થ વઘાસિયા, હરકિશનભાઈ માવાણી, રાજકોટ જિલ્લા ભાજપ ઉપપ્રમુખ રાજુભાઈ બાલધા અને સંગીતાબેન બારોટ સહિતના આગેવાનો ઉપસ્થિત રહ્યા હતા.
ઉપસ્થિત મહાનુભાવોના હસ્તે 200 જેટલા કાર્યકરોને પુષ્પગુચ્છ, સન્માનપત્ર અને શાલ અર્પણ કરીને સન્માનિત કરવામાં આવ્યા હતા. આ પ્રસંગે ગરબી મંડળની 25 વર્ષની સફરમાં સહયોગ આપનાર કાર્યકરો અને દાતાઓ પ્રત્યે આભારની લાગણી વ્યક્ત કરવામાં આવી હતી.
ધોરાજીમાં છેલ્લા 25 વર્ષથી બાળાઓમાં ધાર્મિક સંસ્કાર અને રાસ-ગરબાની પરંપરાને પ્રોત્સાહન આપતું ‘જય ગેલી અંબે ભૂલકા ગરબી મંડળ’ સિલ્વર જ્યુબિલી વર્ષમાં 1,800થી વધુ બાળાઓની સહભાગિતાથી વિશેષ ઓળખ મેળવી રહ્યું છે. શરદ પૂનમ નિમિત્તે યોજાયેલો આ સન્માન સમારોહ કાર્યકરોની નિસ્વાર્થ સેવાને બિરદાવવાની સાથે મંડળની 25 વર્ષની સફળ સફરની ઉજવણી બની રહ્યો હતો.
