સૌરાષ્ટ્રમાં ચૂંટણી પહેલા નવા-જૂનીના એંધાણની રાજકીય ગલીયારોમાં ચર્ચા તેજ
રાજકોટના રાજકારણનું બદલાતુ ચિત્ર! અંતર ધરાવતા નેતાઓ એક ફ્રેમમાં
નીતિનભાઇ ભારદ્વાજ, ડો.ભરતભાઇ બોઘરા, પૂર્વ શહેર અધ્યક્ષ મુકેશ દોશી, પૂર્વ સ્ટે.ચેરમેન જયમીન ઠાકરની કેન્દ્રીય જળશકિત મંત્રી સી.આર.પાટીલ સાથે મુલાકાત : તસ્વીરો સોશ્યલ મીડિયામાં વાયરલ થતા રાજકીય સમીકરણો પર સૌની નજર : જૂના જોગીઓ સક્રિય થતા અનેક તર્ક-વિર્તક
અગ્ર ગુજરાત, રાજકોટ
રાજકારણમાં કાયમી મિત્ર કે કાયમી શત્રુ હોતો નથી, તે વાતને ફરી એકવાર ઉજાગર કરતી તસવીર સામે આવી છે. રાજકોટ ભાજપના બે અગ્રણી નેતાઓ નીતિન ભારદ્વાજ અને ભરત બોઘરાએ કેન્દ્રીય મંત્રી અને ભાજપના પૂર્વ પ્રદેશ અધ્યક્ષ સી.આર. પાટીલ સાથે મુલાકાત કરી હતી. આ મુલાકાતની તસવીરો સોશિયલ મીડિયા પર સામે આવતાં સૌરાષ્ટ્રના રાજકીય વર્તુળોમાં ચર્ચા તેજ બની છે.
સામાન્ય રીતે નેતાઓની મુલાકાતને શુભેચ્છા મુલાકાત તરીકે જોવામાં આવે છે, પરંતુ ભૂતકાળમાં એકબીજાથી રાજકીય અંતર ધરાવતા મનાતા નેતાઓ એક જ તસવીરમાં જોવા મળતાં આ મુલાકાતને વિશેષ મહત્ત્વ આપવામાં આવી રહ્યું છે. શું રાજકોટ ભાજપમાં જૂના રાજકીય સમીકરણો બદલાઈ રહ્યા છે? શું ચૂંટણી પહેલાં નવી રાજકીય ગોઠવણના સંકેતો મળી રહ્યા છે? આવા સવાલો હાલ ચર્ચાઈ રહ્યા છે.
પૂર્વ મુખ્યમંત્રી વિજય રૂપાણી સાથે નિકટના સંબંધો ધરાવતા મનાતા ભાજપના નેતા નીતિન ભારદ્વાજ અને પ્રદેશ ભાજપના પૂર્વ ઉપાધ્યક્ષ ભરત બોઘરાએ સી.આર. પાટીલ સાથેની મુલાકાતની તસવીરો સોશિયલ મીડિયા પર શેર કરી છે. આ તસવીર માત્ર એક મુલાકાત પૂરતી મર્યાદિત છે કે તેની પાછળ કોઈ રાજકીય સંદેશ છે, તે અંગે અટકળો શરૂ થઈ છે.
રાજકોટ ભાજપમાં અગાઉ જુદા-જુદા જૂથો વચ્ચે રાજકીય ખેંચતાણની ચર્ચા થતી રહી છે. એક તરફ સી.આર. પાટીલની નજીકના નેતા તરીકે ભરત બોઘરાને જોવામાં આવતા હતા, જ્યારે બીજી તરફ નીતિન ભારદ્વાજને વિજય રૂપાણીના જૂથની નજીકના નેતા તરીકે ઓળખવામાં આવતા હતા. આ બંને નેતાઓ વચ્ચેનું રાજકીય અંતર લાંબા સમયથી ચર્ચાનો વિષય રહ્યું હતું.
સી.આર. પાટીલ જ્યારે ભાજપના પ્રદેશ અધ્યક્ષ બન્યા ત્યારે નીતિન ભારદ્વાજ સુરેન્દ્રનગર જિલ્લાના પ્રભારી તરીકે જવાબદારી સંભાળતા હતા. જોકે, થોડા સમય બાદ તેમને આ જવાબદારીમાંથી મુક્ત કરવામાં આવ્યા હતા. ત્યારબાદ તેમને સંગઠનમાં કોઈ મોટી જવાબદારી ન સોંપાઈ હોવાની ચર્ચા રહી હતી.
નીતિન ભારદ્વાજને ભાજપના કાર્યક્રમોમાં પૂરતું મહત્ત્વ મળતું ન હોવાની પણ રાજકીય વર્તુળોમાં ચર્ચા થતી હતી. આ પરિસ્થિતિને કારણે તેઓ સંગઠનમાં સાઇડલાઇન થયા હોવાની છાપ ઊભી થઈ હતી.
આ કહેવાતા જૂથવાદની અસર કાર્યકરો સુધી પણ પહોંચી હોવાની ચર્ચા રહી હતી. નીતિન ભારદ્વાજની નજીકના મનાતા નેતાઓને સંગઠનમાં યોગ્ય સ્થાન ન મળતું હોવાની ફરિયાદો પણ સામે આવતી હતી. વિધાનસભાની ચૂંટણીથી લઈને મહાનગરપાલિકાની ચૂંટણી અને સંગઠનની નિમણૂકો સુધી વિવિધ તબક્કે બંને જૂથો વચ્ચે રાજકીય ખેંચતાણની ચર્ચા થતી રહી હતી.
વિજય રૂપાણીના નિધન સમયે પણ રાજકોટ ભાજપના આંતરિક રાજકીય સમીકરણો અંગે ચર્ચાઓ થઈ હતી. અંતિમવિધિના ખર્ચને લઈને ઊભા થયેલા વિવાદે પણ રાજકીય વર્તુળોમાં ધ્યાન ખેંચ્યું હતું. આ સમગ્ર ઘટનાક્રમ પાછળ આંતરિક જૂથવાદની ભૂમિકા હોવાની અટકળો વ્યક્ત કરવામાં આવી હતી.
એક સમયે અલગ-અલગ રાજકીય જૂથોની નજીક મનાતા નેતાઓ એક જ તસવીરમાં જોવા મળતાં રાજકોટ ભાજપમાં નવા સમીકરણો રચાઈ રહ્યાં હોવાની અટકળો તેજ બની છે. જોકે, આ મુલાકાતને કોઈ ચોક્કસ રાજકીય ગઠબંધન કે નવી ગોઠવણનો સંકેત ગણવો હાલ ઉતાવળભર્યું રહેશે. આ મુલાકાતની રાજકોટ અને સૌરાષ્ટ્રના રાજકારણ પર કેટલી અસર પડશે, તે આગામી દિવસોમાં સ્પષ્ટ થશે. હાલ તો એક તસવીરે રાજકોટ ભાજપના આંતરિક રાજકારણમાં ચર્ચાનો નવો દોર શરૂ કર્યો છે.
જગદીશ વિશ્વકર્મા પ્રદેશ અધ્યક્ષ બન્યા બાદ બદલાયાં સમીકરણો?
સમય જતાં ભાજપના સંગઠનમાં પણ પરિવર્તન આવ્યું. સી.આર. પાટીલનો પ્રદેશ અધ્યક્ષ તરીકેનો કાર્યકાળ પૂર્ણ થયો અને જગદીશ વિશ્વકર્માએ પ્રદેશ અધ્યક્ષ તરીકે જવાબદારી સંભાળી. ત્યારબાદ રાજકોટમાં રાજકીય સમીકરણો બદલાઈ રહ્યાં હોવાની ચર્ચા શરૂ થઈ. અગાઉ વિજય રૂપાણીની નજીકના મનાતા નેતાઓને પૂરતું મહત્ત્વ ન મળતું હોવાની ચર્ચા થતી હતી, જ્યારે હવે સી.આર.પાટીલની નજીકના મનાતા કેટલાક નેતાઓની ભૂમિકા અંગે પણ સવાલો ઊભા થઈ રહ્યા છે. જોકે, આ બદલાવ પાછળનાં કારણો અને તેની વાસ્તવિક અસર અંગે સ્પષ્ટ ચિત્ર આગામી સમયમાં જ સામે આવશે.
