ભાજપના શક્તિ પ્રદર્શન સામે ગુલાબ સાથે પ્રતિકાત્મક વિરોધ કરતા કોંગી કાર્યકરો
શાંતિપૂર્ણ વિરોધ કરનારાઓને અટકાવી ઘર્ષણની સ્થીતી પેદા કરી: ડો.રાજદીપસિંહ જાડેજા
અગ્ર ગુજરાત, રાજકોટ
રાજકોટ શહેર ભાજપ દ્વારા ‘લોકતંત્ર બચાવો, અરાજકતા હટાવો’ના નારા સાથે યોજાયેલી રેલી સામે રાજકોટ શહેર કોંગ્રેસ સમિતિ દ્વારા સૂતરની આંટી અને ગુલાબનાં ફૂલો સાથે અનોખી રીતે પ્રતીકાત્મક વિરોધ નોંધાવવામાં આવ્યો હતો. ભાજપના આગેવાનો અને કાર્યકરોને ગુલાબનાં ફૂલો આપીને તથા સૂતરની આંટી પહેરાવીને પોતાની વાત રજૂ કરવાનો કોંગ્રેસનો પ્રયાસ હતો. જોકે, આ દરમિયાન પોલીસ દ્વારા કોંગ્રેસના આગેવાનો અને કાર્યકરોને અટકાવવામાં આવતાં શાંતિપૂર્ણ વિરોધની સ્વતંત્રતા અને બંધારણીય અધિકારો અંગે ગંભીર સવાલો ઊભા થયા છે.
આ અંગે રાજકોટ શહેર કોંગ્રેસ પ્રમુખ ડૉ. રાજદીપસિંહ જાડેજાએ જણાવ્યું હતું કે, ભાજપ આજે ‘લોકશાહી બચાવો’ના નારા સાથે રેલી યોજી રહ્યું છે, પરંતુ જ્યારે કોંગ્રેસના કાર્યકરો સૂતરની આંટી અને ગુલાબનાં ફૂલો સાથે શાંતિપૂર્ણ રીતે પોતાની લાગણી વ્યક્ત કરવા આગળ વધે છે, ત્યારે તેમને અટકાવવામાં આવે છે. જો ગુલાબનું ફૂલ આપીને વિરોધ નોંધાવવાનો પ્રયાસ પણ સત્તાધીશોને સ્વીકાર્ય ન હોય, તો લોકશાહીમાં અસહમતિ વ્યક્ત કરવાના અધિકારનું શું સ્થાન છે? આ ઘટનાએ લોકશાહીના દાવા અને વાસ્તવિક પરિસ્થિતિ વચ્ચેના વિરોધાભાસને ઉજાગર કર્યો છે.
ડૉ. જાડેજાએ વધુમાં જણાવ્યું હતું કે, કોંગ્રેસનો આ કાર્યક્રમ કોઈ અશાંતિ ફેલાવવા માટે નહીં, પરંતુ શાંતિપૂર્ણ અને પ્રતીકાત્મક રીતે લોકશાહીના પ્રશ્નો ઉઠાવવા માટે હતો. સૂતરની આંટી અને ગુલાબનાં ફૂલો દ્વારા સંવાદ, શાંતિ અને લોકશાહી મૂલ્યોનો સંદેશ આપવાનો પ્રયાસ કરવામાં આવ્યો હતો. તેમ છતાં કાર્યકરોને અટકાવવામાં આવ્યા અને પોલીસ સાથે ઘર્ષણની સ્થિતિ સર્જાઈ. આ પરિસ્થિતિમાં સવાલ એ ઊભો થાય છે કે લોકશાહીમાં શાંતિપૂર્ણ વિરોધ માટે પણ અવરોધો ઊભા કરવામાં આવે, તો સામાન્ય નાગરિક પોતાના પ્રશ્નો અને અસંતોષ કેવી રીતે વ્યક્ત કરી શકશે?
તેમણે જણાવ્યું હતું કે, લોકશાહી માત્ર ચૂંટણી, રેલીઓ અને રાજકીય સૂત્રોચ્ચાર પૂરતી મર્યાદિત નથી. લોકશાહીની સાચી તાકાત નાગરિકોને મળતી અભિવ્યક્તિની સ્વતંત્રતા, વિરોધ પક્ષના વિચારોનું સન્માન અને સત્તાને પ્રશ્ન પૂછવાના અધિકારમાં રહેલી છે. ભારતીય બંધારણ નાગરિકોને વાણી અને અભિવ્યક્તિની સ્વતંત્રતા તથા શાંતિપૂર્ણ રીતે એકત્ર થવાનો અધિકાર આપે છે, જે કાયદેસરના વાજબી નિયંત્રણોને આધીન છે. તેથી શાંતિપૂર્ણ વિરોધને અવકાશ આપવો એ લોકશાહી વ્યવસ્થાની મહત્ત્વપૂર્ણ જવાબદારી છે.
