ચાંદીના વેપારીને બનતી બબલીએ 19.37 લાખનો ચૂનો લગાવ્યો
પહેલાં ઉધારનો માલ લઈ સમયસર ચૂકવણી કરી વિશ્વાસ જીત્યો, પછી રૂ.29.13 લાખની ચાંદીની પાયલ ખરીદી પેમેન્ટ અટકાવ્યું; બાકી નાણાં માગતાં વેપારીને છેડતીના કેસમાં ફસાવી દેવાની ધમકી આપ્યાની ફરિયાદ
અગ્ર ગુજરાત, રાજકોટ
રાજકોટમાં વેપારના નામે વિશ્વાસ કેળવી લાખો રૂપિયાની છેતરપિંડી થયાની ફરિયાદ સામે આવી છે. શહેરના સામાકાંઠા વિસ્તારમાં રહેતા ચાંદીના વેપારી પાસેથી પેડક રોડ પર પેઢી ચલાવતા દંપતીએ રૂ.29.13 લાખની ચાંદીની પાયલ ઉધારમાં ખરીદી હતી. શરૂઆતમાં વેપારીને વિશ્વાસમાં લેવા સમયસર નાણાં ચૂકવ્યા બાદ બાકીની મોટી રકમ ચૂકવવામાં ગલ્લાંતલ્લાં કરવામાં આવ્યાં હોવાનો આક્ષેપ છે. વેપારીએ વારંવાર ઉઘરાણી કરતાં રૂ.19.37 લાખ ચૂકવવાને બદલે મહિલા વેપારીએ છેડતીના કેસમાં ફસાવી દેવાની ધમકી આપી હોવાનો પણ ફરિયાદમાં ઉલ્લેખ કરવામાં આવ્યો છે. અંતે મામલો બી ડિવિઝન પોલીસ મથકે પહોંચ્યો છે, જ્યાં પોલીસે દંપતી સામે છેતરપિંડી અને વિશ્વાસઘાતનો ગુનો નોંધી તપાસ શરૂ કરી છે.
આ બનાવમાં ફરિયાદી તરીકે મારુતિનગર મેઇન રોડ પર આવેલી રત્નદીપ સોસાયટી, શેરી નં.4, આર્યનગરના છેડે રહેતા 43 વર્ષીય રાજેશભાઈ મનુભાઈ પદમાણીએ ફરિયાદ નોંધાવી છે. ફરિયાદમાં પેડક રોડ પર કેયુર પાર્ક સોસાયટી, શેરી નં.3માં રહેતા વિમલ ગુણવંત કણસાગરા અને તેમનાં પત્ની નીતાબેન કણસાગરાનાં નામ આરોપી તરીકે આપવામાં આવ્યાં છે.
ફરિયાદમાં જણાવ્યા મુજબ, રાજેશભાઈ ઘરેથી ‘ઓમ સિલ્વર’ નામે ચાંદીના દાગીના બનાવવાનો અને વેચવાનો વ્યવસાય કરે છે. બીજી તરફ, વિમલભાઈ અને નીતાબેન ‘વેદાર્થ’ નામની પેઢી મારફતે સોના-ચાંદીના દાગીનાના વેપાર સાથે સંકળાયેલાં છે. નીતાબેન આ પેઢીનાં પ્રોપરાઇટર હોવાનું ફરિયાદમાં જણાવાયું છે. બંને પક્ષો એક જ વ્યવસાયમાં હોવાથી છેલ્લા આશરે ત્રણ વર્ષથી એકબીજાના પરિચયમાં હતા. દંપતી અગાઉ પણ રાજેશભાઈ પાસેથી સોના-ચાંદીના દાગીના ખરીદતું હતું અને ખરીદી કર્યા બાદ સામાન્ય રીતે 15 દિવસમાં પેમેન્ટ ચૂકવી આપતું હતું. આ વ્યવહારના આધારે વેપારીને દંપતી પર વિશ્વાસ બેઠો હતો.
ફરિયાદ મુજબ, આ વિશ્વાસના આધારે રાજેશભાઈએ 10 જુલાઈ, 2025થી 12 જાન્યુઆરી, 2026 દરમિયાન દંપતીને કુલ રૂ.29,13,463ની ચાંદીની પાયલ ઉધારમાં આપી હતી. માલ ખરીદતી વખતે દંપતીએ 15 દિવસમાં પેમેન્ટ ચૂકવી દેવાની ખાતરી આપી હતી. નક્કી કરેલી સમયમર્યાદા પૂરી થયા બાદ વેપારીએ નાણાંની માગણી કરી ત્યારે દંપતીએ પોતે વેપારી માણસો હોવાનું જણાવી વિશ્વાસ રાખવા કહ્યું હતું. પેમેન્ટ ચૂકવી દેવાની ખાતરી પણ આપવામાં આવી હતી. જોકે, સમય વીતતો ગયો તેમ છતાં સંપૂર્ણ રકમ મળી નહોતી. વેપારી દ્વારા વારંવાર ઉઘરાણી કરવામાં આવતાં દંપતીએ અલગ-અલગ સમયે હપ્તામાં કુલ રૂ.9.75 લાખ આરટીજીએસ મારફતે ચૂકવ્યા હોવાનું ફરિયાદમાં જણાવાયું છે.
આ ચૂકવણી બાદ પણ રૂ.19,37,569ની રકમ બાકી રહી હતી. વેપારીએ વારંવાર નાણાં માગ્યાં છતાં દંપતી તરફથી માત્ર વાયદા મળતા હતા અને બાકી પેમેન્ટ ચૂકવવામાં આવતું નહોતું. આ રીતે મોટી રકમ અટવાઈ જતાં વેપારીની મુશ્કેલી વધી હતી. ફરિયાદમાં વધુમાં જણાવાયું છે કે બાકી નીકળતી રકમની ચૂકવણી માટે નીતાબેને પોતાની ‘વેદાર્થ એન્ટરપ્રાઇઝ’નો રૂ.19.37 લાખનો ચેક આપ્યો હતો. જોકે, આ ચેક બેંકમાંથી પરત ફર્યો હતો. ચેક પરત આવતાં વેપારીએ નીતાબેનને તેની જાણ કરી અને બાકી નાણાં ચૂકવવા માટે ફરીથી ઉઘરાણી શરૂ કરી હતી.
આ દરમિયાન આશરે પાંચ મહિના પહેલાં નીતાબેને વેપારીને ધમકી આપી હોવાનો ફરિયાદમાં આક્ષેપ કરાયો છે. ફરિયાદ મુજબ, હવે પૈસાની માગણી કરવામાં આવશે તો એક મહિલા તરીકે તેમની સામે છેડતીની ફરિયાદ નોંધાવી દેવામાં આવશે અને વેપારીને જેલમાં જવું પડશે, તેવી ધમકી આપવામાં આવી હતી. પરિણામે વેપારી માટે બાકી નાણાંની ઉઘરાણી કરવી પણ મુશ્કેલ બની હોવાનું ફરિયાદમાં જણાવાયું છે. ચાંદીનો માલ ખરીદ્યા બાદ બાકી રહેતી રૂ.19,37,569ની રકમ ચૂકવવામાં ન આવી અને ઉઘરાણી કરતાં ધમકી આપવામાં આવી હોવાના આક્ષેપ સાથે રાજેશભાઈ પદમાણીએ અંતે પોલીસનો સંપર્ક કર્યો હતો. તેમની ફરિયાદના આધારે બી ડિવિઝન પોલીસે વિમલ કણસાગરા અને નીતાબેન કણસાગરા સામે છેતરપિંડી તથા વિશ્વાસઘાત અંગે ગુનો નોંધી વધુ તપાસ હાથ ધરી છે.
હવે પોલીસ દ્વારા માલની ખરીદીના વ્યવહારો, થયેલી ચૂકવણી, પરત ફરેલા ચેક તથા ફરિયાદમાં કરવામાં આવેલા અન્ય આક્ષેપોની તપાસ કરવામાં આવશે. વેપારી સંબંધમાં વિશ્વાસના આધારે કરવામાં આવેલા વ્યવહારમાં લાખો રૂપિયા અટવાઈ જવાના આ બનાવે રાજકોટના ચાંદીના વેપારીઓમાં પણ ચર્ચા જગાવી છે.
