ભાજપની રેલી જનતાના પ્રશ્નો પરથી ધ્યાન હટાવવાનો પ્રયાસ છે? : ડૉ. રાજદીપસિંહ જાડેજા
શહેર કોંગ્રેસ પ્રમુખના ભાજપે કાઢેલી રેલી સંદર્ભે આકરા પ્રહાર
અગ્ર ગુજરાત, રાજકોટ
રાજકોટ શહેર ભાજપ દ્વારા રેસકોર્સ ખાતે સરદાર વલ્લભભાઈ પટેલ સાહેબની પ્રતિમાથી નીકળેલી રેલીના સંદર્ભમાં રાજકોટ શહેર કોંગ્રેસ પ્રમુખ ડૉ. રાજદીપસિંહ જાડેજાએ આકરા પ્રહારો કરતાં જણાવ્યું હતું કે, ભાજપની રાજનીતિ આજે જનતાના પ્રશ્નોના ઉકેલ કરતાં રાજકીય પ્રદર્શનો સુધી સીમિત થતી દેખાઈ રહી છે. વર્ષોથી સત્તામાં હોવા છતાં જનતાને મોંઘવારી, બેરોજગારી, કથળતી કાયદો અને વ્યવસ્થાની સ્થિતિ તથા પાયાની સુવિધાઓના પ્રશ્નોનો સામનો કરવો પડી રહ્યો છે. ત્યારે જનતાના પ્રશ્નોનો જવાબ આપવાને બદલે રેલી યોજવાની રાજનીતિ પાછળનો હેતુ શું છે? શું ભાજપને અત્યારથી જ જનતાના રોષ અને આગામી સમયમાં મળનારા જાકારાનો અહેસાસ થવા લાગ્યો છે? શું ભાજપે જનતાના પ્રશ્નોનો જવાબ આપવાને બદલે વિપક્ષમાં બેસવાની માનસિક તૈયારી શરૂ કરી દીધી છે?
આજે રાજકોટથી લઈને ગુજરાત અને કેન્દ્ર સુધી ભાજપનું શાસન છે. તેમ છતાં જનતાના પ્રશ્નોનો ઉકેલ લાવવામાં સરકારની નિષ્ફળતા સ્પષ્ટપણે સામે આવી રહી છે. સત્તામાં રહીને જનતાને પડતી મુશ્કેલીઓનું નિરાકરણ લાવવાને બદલે રાજકીય પ્રદર્શનો દ્વારા જનતાનું ધ્યાન અન્યત્ર દોરવાનો પ્રયાસ કરવામાં આવે, તો તે સરકારની પ્રાથમિકતાઓ સામે ગંભીર સવાલો ઊભા કરે છે. જનતાને હવે રાજકીય દાવપેચ નહીં, પરંતુ પોતાના પ્રશ્નોના જવાબ અને નક્કર પરિણામો જોઈએ છે.
દેશમાં મતાધિકારની સુરક્ષા, ચૂંટણી પ્રક્રિયાની પારદર્શિતા, વાણી સ્વાતંત્ર્ય અને બંધારણીય મૂલ્યો સામે ઊભા થતા પ્રશ્નો લોકશાહી માટે ચિંતાજનક છે. કોંગ્રેસ પક્ષ મતચોરીના મુદ્દે લોકશાહીની રક્ષા માટે મજબૂતીથી અવાજ ઉઠાવી રહ્યો છે. જનતાના મતનું મહત્ત્વ જળવાઈ રહે અને લોકશાહી અધિકારોનું રક્ષણ થાય તે માટે કોંગ્રેસની લડાઈ ચાલુ રહેશે. લોકશાહીમાં જનતાના અવાજને દબાવવાના પ્રયાસો સામે કોંગ્રેસ મૌન નહીં રહે. લોકશાહી કોઈ એક પક્ષની સત્તા ટકાવી રાખવાનું સાધન નથી, પરંતુ દેશના દરેક નાગરિકનો બંધારણીય અધિકાર છે.
ડૉ. જાડેજાએ વધુમાં જણાવ્યું હતું કે, ભાજપે રેલી યોજતાં પહેલાં રાજકોટની જનતાની વાસ્તવિક સ્થિતિનો જવાબ આપવો જોઈએ. આજે રાજકોટના નાગરિકો પીવાના પાણીની સમસ્યા, રસ્તાઓ પરના ખાડા, ગંદકી અને પાયાની નાગરિક સુવિધાઓના અભાવથી પરેશાન છે. શહેરમાં હત્યા સહિતની ગંભીર ગુનાહિત ઘટનાઓને કારણે કાયદો અને વ્યવસ્થાની સ્થિતિ અંગે પણ ચિંતા ઊભી થઈ રહી છે. રાજ્યના નાયબ મુખ્યમંત્રીની રાજકોટ મુલાકાત જેવા પ્રસંગો વચ્ચે પણ શહેરની સુરક્ષા અને વ્યવસ્થાને લઈને પ્રશ્નો ઊભા થાય, ત્યારે સરકાર અને સ્થાનિક તંત્રની જવાબદારી નક્કી થવી જ જોઈએ.
સત્તા તમારી છે, વહીવટ તમારી જવાબદારી છે અને જનતાના પ્રશ્નોના જવાબ પણ તમારે જ આપવા પડશે. ભાજપે યાદ રાખવું જોઈએ કે જનતાનો અવાજ દબાવી શકાતો નથી અને જનતાના રોષને રાજકીય પ્રદર્શનો પાછળ છુપાવી શકાતો નથી. લોકશાહીમાં જનતા જ સર્વોપરી છે અને સમય આવ્યે જનતા પોતાના મતાધિકારથી જ જવાબ આપશે.
