હાપા–ઓખા રેલવે સેક્શન પર જૂના સ્ટીલ ગર્ડરના સ્થાને પીએસસી સ્લેબ સ્થાપિત

હાપા–ઓખા રેલવે સેક્શન પર જૂના સ્ટીલ ગર્ડરના સ્થાને પીએસસી સ્લેબ સ્થાપિત

બ્રિજ નંબર 391 ની અપ લાઇન પર 6 પીએસસી સ્લેબ અને 4 રિટેનર સ્થાપિત; 300 મેટ્રિક ટન ક્ષમતા ધરાવતી ક્રેનની મદદથી સુરક્ષાના ધોરણો અનુસાર કાર્ય પૂર્ણ

અગ્ર ગુજરાત, રાજકોટ

પશ્ચિમ રેલવેના રાજકોટ ડિવિઝનના એન્જિનિયરિંગ વિભાગે રેલવે ઇન્ફ્રાસ્ટ્રક્ચર (માળખાગત સુવિધાઓ) ને સુદ્રઢ બનાવવા તરફ એક મહત્વપૂર્ણ સિદ્ધિ પ્રાપ્ત કરી છે. રાજકોટ ડિવિઝનના સિનિયર ડિવિઝનલ કોમર્શિયલ મેનેજર શ્રી સુનીલ કુમાર મીનાના જણાવ્યા અનુસાર, હાપા–ઓખા રેલવે સેક્શનના લાખાબાવળ–પીપળી બ્લોક સેક્શનમાં બ્રિજ નંબર 391 ની અપ લાઇન પર જૂના સ્ટીલ ગર્ડર બદલવાનું કાર્ય સફળતાપૂર્વક પૂર્ણ કરવામાં આવ્યું છે. આ કામગીરી હેઠળ કુલ 6 પ્રી-સ્ટ્રેસ્ડ કોંક્રિટ (પીએસસી) સ્લેબ અને 4 રિટેનર સ્થાપિત કરવામાં આવ્યા છે.

આ કાર્ય 300 મેટ્રિક ટન ક્ષમતા ધરાવતી વિશાળ ક્રેનની મદદથી તમામ નિર્ધારિત સુરક્ષા ધોરણો અને સાવચેતીઓનું પાલન કરીને પૂર્ણ કરવામાં આવ્યું હતું. આ ટેકનિકલ અપગ્રેડેશનથી પુલની માળખાકીય ક્ષમતામાં વધારો થશે અને ટ્રેક મેન્ટેનન્સ  ની કામગીરી વધુ સરળ બનશે, જેનાથી ટ્રેન સંચાલનની કાર્યક્ષમતા અને સુરક્ષામાં નોંધપાત્ર સુધારો થશે.

રાજકોટ ડિવિઝનનો એન્જિનિયરિંગ વિભાગ રેલવે ઇન્ફ્રાસ્ટ્રક્ચરના આધુનિકીકરણ અને સુરક્ષિત રેલ સંચાલન સુનિશ્ચિત કરવા માટે સતત સક્રિય છે. બ્રિજ નંબર 391 પર કરવામાં આવેલી આ કામગીરી સલામતી અને ટેકનિકલ આધુનિકીકરણ તરફનું એક નક્કર પગલું છે.

રાજકોટ ડિવિઝનલ રેલવે મેનેજર (DRM) શ્રી ગિરિરાજ કુમાર મીનાએ જણાવ્યું હતું કે, “રાજકોટ ડિવિઝન રેલવે ઇન્ફ્રાસ્ટ્રક્ચરને આધુનિક અને મજબૂત બનાવવા માટે સંપૂર્ણપણે પ્રતિબદ્ધ છે. બ્રિજ નંબર 391 પર પીએસસી સ્લેબની સ્થાપનાથી ટ્રેકની જાળવણી સરળ બનશે અને ટ્રેકની સ્થિરતા વધશે. અમારો ઉદ્દેશ્ય આધુનિક એન્જિનિયરિંગ તકનીકો અને ઉચ્ચ સુરક્ષા ધોરણો દ્વારા ટ્રેન સંચાલનને વધુ સુરક્ષિત, ઝડપી અને વિશ્વસનીય બનાવવાનો છે.”