વ્યાજખોરીના બોજે દંપતીનો કરુણ અંત
અટીકાના લસણના કારખાનામાં પતિ-પત્નીએ જીવન ટૂંકાવ્યું
મોરબી પંથકના શખ્સ પાસેથી રૂ. 4 લાખ વ્યાજે લીધા હોવાનો પરિવારજનોનો દાવો; વ્યાજ સહિતની રકમ રૂ. 8 લાખ થઈ, નહીં ચૂકવે તો રોજના રૂ. 70 હજાર વસૂલવાની ધમકી અપાતા પગલું ભર્યું
અગ્ર ગુજરાત, રાજકોટ
રાજકોટમાં વ્યાજખોરીના ચક્કરમાં વધુ એક પરિવાર પર આભ તૂટી પડ્યું છે. શહેરના સ્વામિનારાયણ ચોક પાસે આવેલા કૃષ્ણનગરમાં રહેતા અને અટીકા વિસ્તારમાં લસણ ફોલવાનું કારખાનું ચલાવતા દંપતીએ કારખાનામાં જ ગળાફાંસો ખાઈ આપઘાત કરી લેતાં ચકચાર મચી ગઈ છે. મૃતક દંપતીના પરિવારજનોના જણાવ્યા અનુસાર, ધંધાના વિકાસ માટે તેમણે મોરબી પંથકના એક શખ્સ પાસેથી આશરે ત્રણ મહિના પહેલાં રૂ. 4 લાખ વ્યાજે લીધા હતા. આ રકમ સામે રોજનું રૂ. 42 હજારથી રૂ. 50 હજાર સુધીનું વ્યાજ ચૂકવવાનું દબાણ હોવાનો આક્ષેપ કરવામાં આવ્યો છે. સમય જતાં દેવાની રકમ વધીને રૂ. 8 લાખ થઈ ગઈ હતી અને સોમવાર, 26મીએ આ રકમ ચૂકવવા નહીં આવે તો રોજના રૂ. 70 હજાર વસૂલવાની ધમકી આપવામાં આવી હોવાની પરિવારજનોએ વાત કરી છે. જોકે, વ્યાજખોરી અને ધમકી અંગેના આક્ષેપોની પોલીસ તપાસ બાદ જ હકીકત સ્પષ્ટ થશે.
આપઘાત કરનાર રમેશભાઈ માવજીભાઈ ચાવડા (ઉંમર આશરે 40 વર્ષ) અને તેમનાં પત્ની ભારતીબેન રમેશભાઈ ચાવડા (ઉંમર આશરે 40 વર્ષ) સ્વામિનારાયણ ચોક નજીક કૃષ્ણનગર-12માં રહેતાં હતાં. અટીકા ફાટકથી આગળ દેવકીવાળી શેરીમાં તેમનું લસણ ફોલવાનું કારખાનું હતું. પતિ-પત્ની બંને સાથે મળીને ધંધો સંભાળતાં હતાં અને પરિવારનું ગુજરાન ચલાવતાં હતાં. જોકે, આર્થિક મુશ્કેલી અને કથિત વ્યાજના દબાણ વચ્ચે બંનેએ કારખાનામાં જ જીવન ટૂંકાવી લેતાં પરિવારજનોમાં શોકનું મોજું ફરી વળ્યું છે.
પ્રાથમિક વિગતો અનુસાર, બંને રાત્રિના સમયે ઘરેથી નીકળીને કારખાને પહોંચ્યાં હતાં. ત્યાં લોખંડની આડી સાથે ચૂંદડી બાંધી બંનેએ ગળાફાંસો ખાઈ લીધો હતો. આ ઘટનાની જાણ થતાં જ આસપાસના વિસ્તારમાં અરેરાટી ફેલાઈ ગઈ હતી.
રમેશભાઈ અને ભારતીબેન મોડી રાત્રે ઘરેથી નીકળી ગયાં હતાં. લાંબા સમય સુધી તેઓ પરત ન ફરતાં રમેશભાઈના વૃદ્ધ પિતા માવજીભાઈને શંકા ગઈ હતી. તેમણે પોતાના ભાઈના પુત્ર લક્ષ્મીદાસને બોલાવી બંને ક્યાં ગયાં છે તેની તપાસ કરવા જણાવ્યું હતું. ત્યારબાદ બંને અટીકા વિસ્તારમાં આવેલા કારખાને પહોંચતાં દંપતીના આપઘાતની કરુણ ઘટના સામે આવી હતી. બનાવની જાણ 108 એમ્બ્યુલન્સના ઇએમટી ઉર્વિશાબેન દ્વારા કરવામાં આવતાં કંટ્રોલ ઇન્ચાર્જ વી.એ. પરમારે ભક્તિનગર પોલીસને જાણ કરી હતી. ત્યારબાદ એએસઆઈ શૈલેષભાઈ નાગજીભાઈ સહિતના પોલીસ કર્મચારીઓ સ્થળ પર પહોંચ્યા હતા. જરૂરી કાર્યવાહી કર્યા બાદ બંને મૃતદેહને પોસ્ટમોર્ટમ માટે સિવિલ હોસ્પિટલ ખસેડવામાં આવ્યા હતા.
પરિવારજનોના જણાવ્યા મુજબ, રમેશભાઈ અટીકામાં લસણ ફોલવાનું કારખાનું ચલાવતા હતા. ધંધાને આગળ વધારવા માટે આશરે ત્રણ મહિના પહેલાં તેમણે મોરબી તરફના અને અટીકા વિસ્તારમાં આવ-જા કરતા ગોબરભાઈ તરીકે ઓળખાતા એક શખ્સ પાસેથી રૂ. 4 લાખ લીધા હતા. આ રકમ પર અસાધારણ ઊંચા દરે વ્યાજ વસૂલવામાં આવતું હોવાનો પરિવારજનોએ આક્ષેપ કર્યો છે.
સગાંવહાલાંના કહેવા પ્રમાણે, શરૂઆતમાં ધંધો સારો ચાલતો હોવાથી દંપતી વ્યાજની રકમ ચૂકવતું હતું. જોકે, સમય જતાં વ્યાજનો બોજ વધતો ગયો અને રૂ. 4 લાખની મૂળ રકમ સામે કુલ લેણું રૂ. 8 લાખ સુધી પહોંચી ગયું હતું. સોમવાર, 26 ઑક્ટોબરે આ રકમ ચૂકવી દેવા માટે દબાણ કરવામાં આવ્યું હોવાની વિગતો પણ સામે આવી છે. જો નિર્ધારિત દિવસે નાણાં નહીં ચૂકવે તો રોજના રૂ. 70 હજાર વસૂલવામાં આવશે તેવી ધમકી મળ્યાના આક્ષેપને કારણે દંપતી ભારે ચિંતામાં મુકાયું હોવાનું પરિવારજનો જણાવી રહ્યા છે. જોકે, વ્યાજના દર, ખરેખર કેટલી રકમ ચૂકવવામાં આવી હતી, કેટલું લેણું બાકી હતું અને કોઈ ધમકી આપવામાં આવી હતી કે કેમ તે તમામ મુદ્દાઓની પોલીસ તપાસમાં જ સ્પષ્ટતા થશે.
રમેશભાઈ બે બહેનોના એકના એક ભાઈ અને પરિવારનો મુખ્ય આધારસ્તંભ હતા. તેમને 15 વર્ષનો પુત્ર જય છે. રમેશભાઈ, ભારતીબેન, પુત્ર જય તથા વૃદ્ધ માતા મંજુલાબેન અને પિતા માવજીભાઈ સાથે રહેતાં હતાં. પરિવારની જવાબદારી સંભાળતા રમેશભાઈ અને તેમની પત્નીના એકસાથે થયેલા મોતથી પુત્રએ માતા-પિતાની છત્રછાયા ગુમાવી છે, જ્યારે વૃદ્ધ માતા-પિતા પર વૃદ્ધાવસ્થામાં દુઃખનો પહાડ તૂટી પડ્યો છે. બે બહેનોના એકમાત્ર ભાઈના મોતથી પરિવારમાં કલ્પાંત સર્જાયો છે. ધંધો ચલાવી પરિવારનું ગુજરાન ચલાવતું દંપતી કથિત વ્યાજના દબાણમાં આવી ગયું હોવાના આક્ષેપોએ શહેરમાં વ્યાજખોરીના મુદ્દાને ફરી ચર્ચાના કેન્દ્રમાં લાવ્યો છે.
ભક્તિનગર પોલીસ ઇન્સ્પેક્ટર જે.ડી. પરમારની રાહબરી હેઠળ પોલીસે વધુ તપાસ હાથ ધરી છે. વ્યાજે નાણાં આપનાર શખ્સની ઓળખ, નાણાકીય વ્યવહારની વિગતો, વ્યાજની વસૂલાત અને ધમકી અંગેના આક્ષેપોની તપાસ કરવામાં આવશે. તપાસ પૂર્ણ થયા બાદ જ દંપતીના આપઘાત પાછળનાં સંજોગો અને જવાબદાર પરિબળો અંગે સ્પષ્ટ ચિત્ર સામે આવશે.
