વામ્બે આવાસમાં ક્રેટાની ડેકીમાંથી દારૂની 720 બોટલ ઝડપાઈ
ક્રાઇમ બ્રાન્ચે રૂ. 2.43 લાખનો વિદેશી દારૂ, આઇફોન અને ક્રેટા સહિત રૂ. 12.93 લાખનો મુદ્દામાલ કબજે કર્યો , વિનોદ ઉર્ફે વીનો સહિતના આરોપીઓની શોધખોળ
અગ્ર ગુજરાત, રાજકોટ
રાજકોટ શહેરમાં દારૂબંધીના કાયદાનો ભંગ કરી વિદેશી દારૂનો જથ્થો રાખવામાં આવતો હોવાની માહિતીના આધારે ક્રાઇમ બ્રાન્ચે કાલાવડ રોડ પર આવેલી વામ્બે આવાસ યોજના ક્વાર્ટરની શેરીમાં દરોડો પાડી હ્યુન્ડાઈ ક્રેટા કારની ડેકીમાંથી ભારતીય બનાવટના વિદેશી દારૂની 720 બોટલો કબજે કરી છે. દારૂના જથ્થાની કિંમત રૂ. 2,43,600 હોવાનું પોલીસની યાદીમાં જણાવાયું છે. આ ઉપરાંત મોબાઇલ ફોન અને કાર સહિત કુલ રૂ. 12,93,600નો મુદ્દામાલ કબજે કરવામાં આવ્યો છે.
રાજકોટ શહેર પોલીસ કમિશનર બ્રજેશકુમાર ઝા, અધિક પોલીસ કમિશનર ચૈતન્ય માંડલિક, નાયબ પોલીસ કમિશનર (ક્રાઇમ) જગદીશ બાંગરવા અને મદદનીશ પોલીસ કમિશનર (ક્રાઇમ) બી.બી. બસિયાની સૂચના અને માર્ગદર્શન હેઠળ ક્રાઇમ બ્રાન્ચની ટીમ શહેરમાં ગેરકાયદે પ્રવૃત્તિઓ સામે કાર્યવાહી કરી રહી છે. આ દરમિયાન પોલીસ ઇન્સ્પેક્ટર એ.એસ. ચાવડા, એમ.એલ. ડામોર અને સી.એચ. જાદવના માર્ગદર્શન હેઠળની ટીમ પેટ્રોલિંગમાં હતી. દરમિયાન પોલીસ કર્મચારીઓ ગોપાલસિંહ જાડેજા અને કનકસિંહ સોલંકીને મળેલી બાતમીના આધારે કાલાવડ રોડ પર વૃંદાવન સોસાયટી પાછળ આવેલી વામ્બે આવાસ યોજના ક્વાર્ટરની શેરીમાં જાહેરમાં પાર્ક કરેલી હ્યુન્ડાઈ ક્રેટા કાર નંબર GJ 03 PM 3813ની તપાસ કરવામાં આવી હતી. કારની ડેકીમાંથી ભારતીય બનાવટના વિદેશી દારૂની બોટલો મળી આવતાં પોલીસે જથ્થો કબજે કરી કાયદેસરની કાર્યવાહી હાથ ધરી હતી.
પોલીસે કબજે કરેલા દારૂમાં રોયલ ચેલેન્જ ફાઇનેસ્ટ પ્રીમિયમ વ્હિસ્કીની 180 મિલીલીટરની 336 કંપની સીલબંધ પ્લાસ્ટિક બોટલો, જેની કિંમત રૂ. 1,08,200, તેમજ ઓલ સીઝન્સ ગોલ્ડન કલેક્શન રિઝર્વ વ્હિસ્કીની 180 મિલીલીટરની 384 કંપની સીલબંધ પ્લાસ્ટિક બોટલો, જેની કિંમત રૂ. 1,34,400 છે, તેનો સમાવેશ થાય છે. આમ, કુલ 720 બોટલોની કિંમત રૂ. 2,43,600 થાય છે. આ ઉપરાંત રૂ. 50,000ની કિંમતનો ગોલ્ડન કલરનો એપલ આઇફોન અને રૂ. 10 લાખની કિંમતની હ્યુન્ડાઈ ક્રેટા કાર પણ કબજે કરવામાં આવી છે. પોલીસના જણાવ્યા મુજબ કુલ મુદ્દામાલની કિંમત રૂ. 12,93,600 થાય છે.
આ પ્રકરણમાં પોલીસની યાદીમાં વામ્બે આવાસ યોજના ક્વાર્ટર, વૃંદાવન સોસાયટી પાછળ, કાલાવડ રોડ, રાજકોટના એક શખસ તથા અન્ય એક અજાણ્યા ઇસમનો ઉલ્લેખ છે. જ્યારે વિનોદભાઈ ઉર્ફે વીનો મુકેશભાઈ મણવરને પકડવાના બાકી હોવાનું જણાવાયું છે. પોલીસની યાદી મુજબ વિનોદ ઉર્ફે વીનો સામે અગાઉ શાપર-વેરાવળ, રાજકોટ તાલુકા, લોધિકા અને રાજકોટ શહેરના ડી.સી.બી. પોલીસ સ્ટેશનમાં મારામારી-ધમકી તથા પ્રોહિબિશન સંબંધિત ગુનાઓ નોંધાયેલા છે. વર્ષ 2016થી 2026 દરમિયાનના કુલ છ ગુનાઓનો ઉલ્લેખ કરવામાં આવ્યો છે.
ક્રાઇમ બ્રાન્ચની આ કામગીરીમાં પોલીસ ઇન્સ્પેક્ટર એ.એસ. ચાવડા, એમ.એલ. ડામોર, સી.એચ. જાદવ તથા પોલીસ હેડ કોન્સ્ટેબલ કનકસિંહ સોલંકી, ગિરિરાજસિંહ જાડેજા, દીપકભાઈ ચૌહાણ, ગોપાલસિંહ જાડેજા, સુભાષભાઈ ઘોઘારી અને પોલીસ કોન્સ્ટેબલ મનીષભાઈ ચાવડા તથા રાજેશભાઈ ચાવડાનો સમાવેશ થાય છે.
