અપર એર સાયકલોનિક સકર્યુલેશન અને વેસ્ટર્બન્સ એક સાથે સક્રિય
સૌરાષ્ટ્રમાં ગુરૂવાર-શુક્રવારે ત્રાટકશે માવઠું
દરિયાકાંઠાના વિસ્તારો નવસારી, વલસાડ, દમણ, દાદરાનગર હવેલી, અમરેલી, ભાવનગરમાં કમોસમી વરસાદની આગાહી
ગુજરાતમાં ત્રણ ઋતુનો અનુભવ કરતા લોકો, રાત્રે ઠંડી, સવારે ધુમ્મસ અને બપોરે અસહ્ય બફારો
અગ્ર ગુજરાત, રાજકોટ
ગુજરાતમાં ચોમાસું વિદાય લઈ રહ્યું છે ત્યારે હવામાન વિભાગ દ્વારા રાજ્યના વાતાવરણને લઈને એક મહત્વપૂર્ણ આગાહી કરવામાં આવી છે. રાજ્યમાં અપર એર સાયક્લોનિક સર્ક્યુલેશન અને વેસ્ટર્ન ડિસ્ટર્બન્સ એકસાથે સક્રિય થવાના કારણે વાતાવરણમાં પલટો આવશે. આ હવામાન સિસ્ટમના પ્રભાવ હેઠળ આગામી 29 અને 30 ઓક્ટોબરે રાજ્યના કેટલાક જિલ્લાઓમાં હળવાથી સામાન્ય કમોસમી વરસાદ (માવઠું) થવાની શક્યતા વ્યક્ત કરવામાં આવી છે.
હવામાન વિભાગની આગાહી અનુસાર, 29 ઓક્ટોબરના રોજ દક્ષિણ ગુજરાતના દરિયાકાંઠાના વિસ્તારોમાં વરસાદી માહોલ જોવા મળી શકે છે. ખાસ કરીને નવસારી, વલસાડ તેમજ કેન્દ્રશાસિત પ્રદેશ દમણ અને દાદરા નગર હવેલીના વિસ્તારોમાં હળવાથી સામાન્ય વરસાદ પડી શકે છે. આ વિસ્તારોમાં વાદળછાયું વાતાવરણ રહેવાની અને પવનની ગતિ વધવાની પણ શક્યતા છે.
ત્યારબાદ 30 ઓક્ટોબરના રોજ વરસાદનો વ્યાપ થોડો વધી શકે છે. 30 ઓક્ટોબરે દક્ષિણ ગુજરાતના નવસારી, વલસાડ, દમણ અને દાદરા નગર હવેલી ઉપરાંત સૌરાષ્ટ્રના વિસ્તારોમાં પણ વાતાવરણ પલટાશે. સૌરાષ્ટ્રના અમરેલી અને ભાવનગર જિલ્લામાં કમોસમી વરસાદ પડવાની પૂર્ણ સંભાવના હવામાન વિભાગ દ્વારા વ્યક્ત કરવામાં આવી છે.
રાજ્યમાં દિવસ દરમિયાન ગરમીનો પ્રકોપ યથાવત્ રહ્યો છે. ગત દિવસે રાજકોટમાં મહત્તમ તાપમાન 39.3 ડિગ્રી સેલ્સિયસ નોંધાયું હતું, જે આપેલા આંકડા મુજબ રાજ્યમાં સૌથી વધુ હતું. ભુજમાં પણ 38 ડિગ્રી તાપમાન નોંધાતાં ગરમીનો અહેસાસ થયો હતો.
એક તરફ દિવસના તાપમાનમાં ખાસ ઘટાડો જોવા મળતો નથી, તો બીજી તરફ રાત્રિના તાપમાનમાં ઘટાડાની શક્યતા છે. આ સાથે કેટલાક વિસ્તારોમાં હળવા વરસાદની આગાહી હોવાથી હવામાનમાં વધુ ફેરફાર જોવા મળી શકે છે.
પાક ધોવાઈ જવાની ભીતિથી ખેડૂતોમાં ચિંતાનું મોજું
હવામાન વિભાગની આ આગાહીને પગલે રાજ્યના ખેડૂતોની ચિંતામાં ફરી એકવાર વધારો થયો છે. હાલ ખેતરોમાં મગફળી, કપાસ અને અન્ય ખરીફ પાકોના લણણીની કામગીરી પૂર્ણતાના આરે છે. આ પરિસ્થિતિમાં જો કમોસમી માવઠું થાય તો તૈયાર થયેલો પાક બગડવાની અને મોટું આર્થિક નુકસાન થવાની ભીતિ ખેડૂતો સેવી રહ્યા છે. ખેતીવાડી વિભાગ દ્વારા ખેડૂતોને પોતાના તૈયાર પાકની યોગ્ય જાળવણી કરવા અને સુરક્ષિત સ્થળે ખસેડવા સલાહ આપવામાં આવી છે.
19 રાજ્યોમાં મુશળધાર વરસાદની આગાહી
દેશભરમાં હવામાનનો મિજાજ ફરી એકવાર ગંભીર વળાંક લઈ રહ્યો છે. ભારતીય હવામાન વિભાગ (IMD) દ્વારા જારી કરાયેલા તાજા અપડેટ મુજબ, આગામી 15 કલાકમાં ઉત્તર, પૂર્વ અને દક્ષિણ ભારતના 19 જેટલા રાજ્યોમાં મુશળધાર વરસાદ અને તોફાની પવનની સંભાવના વ્યક્ત કરવામાં આવી છે. એક તરફ બંગાળની ખાડીમાં સક્રિય થયેલું ગંભીર ચક્રવાતી તોફાન ‘અર્ણબ’ અને બીજી તરફ ઉત્તર-પશ્ચિમ ભારતમાં સક્રિય નવું વેસ્ટર્ન ડિસ્ટર્બન્સ—આ બંને સિસ્ટમની સંયુક્ત અસરથી દેશના મોટાભાગના વિસ્તારોમાં આગામી 31 ઑક્ટોબર સુધી વ્યાપક અસર જોવા મળશે.
નલિયામાં સૌથી ઓછું તાપમાન
રાત્રિના તાપમાનની વાત કરીએ તો નલિયામાં 18.6 ડિગ્રી સેલ્સિયસ સાથે સૌથી ઓછું લઘુતમ તાપમાન નોંધાયું હતું. અમદાવાદમાં મહત્તમ તાપમાન 36.1 ડિગ્રી, જ્યારે લઘુતમ તાપમાન 22.4 ડિગ્રી નોંધાયું હતું. હવામાનની આગાહી મુજબ, 31 ઑક્ટોબર બાદ અમદાવાદમાં લઘુતમ તાપમાનનો પારો તબક્કાવાર ઘટવાની શક્યતા છે. એટલે કે આગામી દિવસોમાં વહેલી સવારે અને રાત્રે ઠંડીનો અહેસાસ વધી શકે છે.
વહેલી સવારે અનેક વિસ્તારોમાં ધુમ્મસની ચાદર
ગુજરાતના અનેક વિસ્તારોમાં વહેલી સવારે ધુમ્મસ પણ જોવા મળ્યું હતું. દિવસ દરમિયાન ગરમી અને રાત્રે હળવી ઠંડી વચ્ચે ધુમ્મસની હાજરી હવામાનમાં થઈ રહેલા ફેરફારનો સંકેત આપે છે. વાહનચાલકોએ વહેલી સવારે ધુમ્મસ હોય ત્યારે ખાસ સાવચેતી રાખવી જોઈએ અને વાહન ધીમે ચલાવવું જોઈએ.
