શ્રી જયાનંદધામ ખાતે ૮ નવેમ્બરના રોજ ઘંટાકર્ણવીર દેવના હવન અને પૂજનનું આયોજન

 શ્રી જયાનંદધામ ખાતે ૮ નવેમ્બરના રોજ ઘંટાકર્ણવીર દેવના હવન અને પૂજનનું આયોજન

રવિવારે સવારે ૯ કલાકથી પ.પૂ. આચાર્ય દેવ જયશેખરસૂરીશ્વરજી મ.સા. આદિ ઠાણાંની પવિત્ર નિશ્રામાં યોજાશે ધાર્મિક અનુષ્ઠાન

અગ્ર ગુજરાત, રાજકોટ

શ્રી જયધર્મ કલ્યાણનિધિ ટ્રસ્ટ સંચાલિત નૂતન જિનાલય શ્રી જયાનંદધામ (નવગ્રહ જિનાલય) ના આંગણે આગામી રવિવાર તા. ૮-૧૧-૨૦૨૬ના રોજ સવારે ૯:૦૦ કલાકથી વિઘ્ન નિવારક દેવ શ્રી ઘંટાકર્ણવીરના ભવ્ય હવન અને પૂજન મહોત્સવનું આયોજન કરવામાં આવ્યું છે. આ પવિત્ર ધાર્મિક પ્રસંગે આશીર્વાદ દાતા તરીકે પ.પૂ. આચાર્ય દેવ જયશેખરસૂરીશ્વરજી મ.સા. આદિ ઠાણાંની વિશેષ ઉપસ્થિતિ રહેશે. આ પ્રસંગે સકળ સંઘના ભાઈઓ તથા બહેનોને મોટી સંખ્યામાં પધારવા આમંત્રણ પાઠવવામાં આવ્યું છે.

પૂજાના નિર્ધારિત કપડામાં પધારેલ ભાઈઓને જ હવન અને પૂજનનો લાભ આપવામાં આવશે. પૂજામાં બેસનાર ભાવિકોએ નિશ્ચિત સમય કરતાં ૩૦ મિનિટ અગાઉ સ્થળ પર પહોંચી જવાનું રહેશે. જે ભાગ્યશાળીઓને શ્રી ઘંટાકર્ણ યંત્રનું પૂજન કરવાની ભાવના હોય, તેમને શ્રી સંઘ દ્વારા યંત્ર પૂજા અર્થે આપવામાં આવશે. જેનો નકરો રૂા. ૨૫૦/- રાખેલ છે. પૂજન કર્યા બાદ આ યંત્ર ભાવિકોએ પોતાના ઘરે લઈ જવાનું રહેશે, અને પૂજન માટે વાક્ષેપ (અક્ષત) સ્થળ પરથી જ પૂરા પાડવામાં આવશે.

જામનગરના પ્રખ્યાત વિધિકાર પ્રિયાંશુભાઈ શાહ દ્વારા પૂજન વિધિ કરાવવામાં આવશે, જ્યારે સંગીતકાર યોગેશભાઈ શાહ દ્વારા સંગીતમય માહોલ બનાવવામાં આવશે. સંપૂર્ણ પૂજન, હવન અને સાધર્મિક ભક્તિના લાભાર્થી પરિવાર તરીકે ઉષાબેન હસમુખભાઈ સંઘાણી પરિવાર તેમજ મોનાબેન ધવલભાઈ સંઘાણી (હસ્તે વેદાંશી, શ્રેયા) છે. હવન અને પૂજનની વિધિ પૂર્ણ થયે જિનાલયની બાજુમાં આવેલ જૈન ભુવન ખાતે ભવ્ય સાધર્મિક ભક્તિનું આયોજન કરવામાં આવ્યું છે.

આ આયોજન અંગે વધુ માહિતી કે પૂછપરછ મિલનભાઈ શાહ: ૯૩૭૪૧ ૧૧૨૧૩, નિરવભાઈ શાહ: ૬૩૫૭૬ ૫૩૫૫૫, વિશાલભાઈ શાહ: ૯૫૧૦૩ ૩૩૭૭૭ નો સંપર્ક કરી શકાશે.