- ઋષભ પંતના ફિટનેસની મોટી અપડેટ સામે આવી
- IPL 2024માં ઋષભ પંત રમતો જોવા મળશે
- કોલકાતામાં જોવા મળ્યો ઋષભ પંત
ભારતીય વિકેટકીપર બેટ્સમેન ઋષભ પંત આ દિવસોમાં તેની રિકવરી પ્રક્રિયામાંથી પસાર થઈ રહ્યો છે. પંત ગત વર્ષે એટલે કે, ડિસેમ્બર 2022માં એક કાર અકસ્માતમાં ઈજાગ્રસ્ત થયો હતો. જે બાદ તે અત્યાર સુધી ક્રિકેટના મેદાનમાં પરત ફર્યો નથી. જો કે, તે નેશનલ ક્રિકેટ એકેડમીમાં નેટ્સમાં બેટિંગ કરી રહ્યો છે. આ તમામ વચ્ચે ઋષભ પંતને લઈ મોટું અપડેટ સામે આવ્યું છે. આ અપડેટ અનુસાર, IPL 2024માં ઋષભ પંતનું સમવું નિશ્ચિત છે.
ઋષભ પંત IPLની આગામી સિઝનમાં કરશે વાપસી
પંત દિલ્હીની તૈયારીના કેમ્પમાં કોલકાતામાં જોવા મળ્યો છે. જેનાથી સ્પષ્ટ થઈ રહ્યું છે કે, ઋષભ પંત IPLની આગામી સિઝનમાં વાપસી કરી શકે છે. આ પહેલા તે ઈજાના કારણે 2023ની IPL રમી શક્યો નહતો, પરંતુ હવે તેની વાપસીની આશા વધી રહી છે. અત્યાર સુધીમાં પંત ઘણો સ્વસ્થ થઈ ગયો છે અને IPL શરૂ થવામાં હજુ સમય છે. જેથી પંત IPL સુધીમાં સંપૂર્ણ રીતે ફિટ થઈ શકે છે.
2023માં ડેવિડ વોર્નરે દિલ્હીનું નૈતૃત્વ કર્યું હતું
IPL 2023માં પંતની ગેરહાજરીમાં ઓસ્ટ્રેલિયાના ઓપનર ડેવિડ વોર્નરે દિલ્હી કેપિટલ્સનું નેતૃત્વ કર્યું હતું. જો કે, ટૂર્નામેન્ટમાં દિલ્હીની ટીમ 15માંથી માત્ર 5 મેચ જીતી શકી હતી. જેની સાથે ટીમ પોઈન્ટ ટેબલમાં 9માં સ્થાને હતી. આવી સ્થિતિમાં પંત ફરી એકવાર IPLમાં દિલ્હી કેપિટલ્સનું નૈતૃત્વ કરી શકે છે. જો કે, હજુ સુધી પંતની વાપસીને લઈ કોઈ પ્રકારની અધિકૃત જાહેરાત કરવામાં આવી નથી.
ઋષભ પંતની કારનો થયો હતો અકસ્માત
ઉલ્લેખનીય છે કે, પંત આ અકસ્માતમાં ગંભીર રીતે ઈજાગ્રસ્ત થયો હતો. અકસ્માત બાદ પંતના ઘૂંટણની સર્જરી કરવામાં આવી હતી. પંતે રિકવરીમાં ઘણી સારી પ્રગતિ દર્શાવી છે. ભારતીય બેટ્સમેનની વાપસીને લઈને ફેન્સ ખૂબ જ ઉત્સાહિત દેખાઈ રહ્યા છે. આવી સ્થિતિમાં પંત સત્તાવાર રીતે મેદાનમાં ક્યારે પરત આવે છે તે જોવું દિલચસ્પ રહેશે.
