ભારત બાદ હવે નેપાળ પણ TikTok એપ પર પ્રતિબંધ, આ છે કારણ

• ભારત બાદ હવે નેપાળ સરકારે TikTok પર મૂકશે પ્રતિબંધ
• TikTok પર વધી રહેલા સાયબર ક્રાઈમને ધ્યાનમાં રાખીને નિર્ણય
• છેલ્લા ચાર વર્ષમાં સાયબર ક્રાઈમના 1647 કેસ નોંધાયા 

ભારત બાદ હવે નેપાળ સરકારે ચીનના સોશિયલ મીડિયા પ્લેટફોર્મ TikTok પર પ્રતિબંધ લગાવવાનો નિર્ણય કર્યો છે. સોમવારે મળેલી કેબિનેટની બેઠકમાં નેપાળ સરકારે TikTok પર પ્રતિબંધ લગાવવાનો નિર્ણય લીધો છે. નેપાળ સરકારના સંચાર મંત્રી રેખા શર્માએ કહ્યું છે કે TikTok પર ટૂંક સમયમાં પ્રતિબંધ મુકવામાં આવશે, પરંતુ હાલમાં આ માટે કોઈ સમય મર્યાદા નક્કી કરવામાં આવી નથી.

TikTok પર વધી રહેલા સાયબર ક્રાઈમને ધ્યાનમાં રાખીને નેપાળ સરકારે આ પગલું ઉઠાવ્યું છે. સરકાર કહે છે કે અભિવ્યક્તિની સ્વતંત્રતા એ મૂળભૂત અધિકાર છે, પરંતુ તેણે સમાજના મોટા વર્ગોમાં દ્વેષપૂર્ણ ભાષણના વધતા વલણને પ્રોત્સાહન આપવા માટે આ સોશિયલ મીડિયા પ્લેટફોર્મની ટીકા પણ કરી છે. જાણકારી માટે તમને જણાવી દઈએ કે નેપાળમાં ટિકટોક પર છેલ્લા ચાર વર્ષમાં સાયબર ક્રાઈમના 1647 કેસ નોંધાયા છે. આવી સ્થિતિમાં દેશમાં સાયબર ક્રાઈમને ડામવા માટે સરકારે આ પગલું ભર્યું છે. પ્રતિબંધ પર નિર્ણય લેતા પહેલા નેપાળ પોલીસના સાયબર બ્યુરો, ગૃહ મંત્રાલય અને ટિકટોકના પ્રતિનિધિઓ વચ્ચે ગયા અઠવાડિયે એક બેઠક પણ યોજાઈ હતી.

નેપાળી કોંગ્રેસે આ નિર્ણયનો વિરોધ કર્યો હતો

બીજી તરફ નેપાળ સરકારના નિર્ણયની ટીકા પણ શરૂ થઈ ગઈ છે. નેપાળી કોંગ્રેસના મહાસચિવ ગગન થાપાએ સરકારના નિર્ણય સામે વાંધો ઉઠાવ્યો હતો. તેમણે કહ્યું છે કે TikTok પર પ્રતિબંધ મૂકવાનો સરકારનો નિર્ણય ખોટો છે. સરકારે સોશિયલ મીડિયા વેબસાઈટનું નિયમન કરવું જોઈએ. તેમણે કહ્યું કે સરકારે પોતાના નિર્ણયમાં સુધારો કરવો જોઈએ કારણ કે તે અભિવ્યક્તિની સ્વતંત્રતા અને વ્યક્તિગત સ્વતંત્રતાનું ઉલ્લંઘન કરે છે.

TikTok ઘણા દેશોમાં તપાસ હેઠળ

ભારત પછી, નેપાળ સરકાર દ્વારા લેવામાં આવેલા પગલાને ચીનના નેટવર્કિંગ પ્લેટફોર્મ માટે વધુ એક મોટો ફટકો માનવામાં આવી રહ્યો છે, જે ભારત, યુએસ, ઇયુ અને યુકે સહિત અન્ય ઘણા દેશોમાં તપાસ હેઠળ છે. આ દેશોની સરકારોએ સુરક્ષાને ધ્યાનમાં રાખીને TikTok એપ્લિકેશન પર પ્રતિબંધ મૂક્યો છે.