ઓગર મશીને કરી કમાલ, ટનલમાં ફસાયેલા શ્રમિકો સુધી પહોંચવુ થયુ સરળ

ઉત્તરાખંડના ઉત્તરકાશીમાં યમુનોત્રી નેશનલ હાઈવે પર સિલ્ક્યારાથી દાંડલગાંવ સુધી નિર્માણાધીન ટનલની અંદર ભૂસ્ખલન થયું છે.ઉત્તરકાશીના સિલ્ક્યારા ટનલમાં ફસાયેલા મજૂરો હજુ સુધી બહાર આવી શક્યા નથી. શ્રમિકોને બચાવવાની કામગીરી ચાલી રહી છે. જે માટે ખાસ અમેરિકન ઓગર મશીન ગઇ કાલે લાવવામાં આવ્યું હતું . જેના દ્વારા 21 મીટર સુધી ડ્રિલિંગનું કામ કર્યું છે. જેમ જેમ મશીન આગળ વધી રહ્યું છે તેમ તેમ કામદારો બહાર આવવાની અપેક્ષા પણ વધી રહી છે.

 શુક્રવારે સવાર સુધીમાં અમેરિકન જેક અને પુશ અર્થ ઓગર મશીન દ્વારા 21 મીટર સુધી પાઇપ કાટમાળમાં નાખવામાં આવી હતી. આ હાઈ પાવર મશીન એક કલાકમાં 5 થી 6 મીટરનું ડ્રિલિંગ કરે છે, પરંતુ દોઢ કલાકમાં માત્ર 3 મીટર જ પાઈપના કાટમાળમાં જઈ શકે છે. પાઈપને વેલ્ડીંગ કરવામાં અને ગોઠવણીને સુધારવામાં વધુ સમય લાગી રહ્યો છે. હવે 21 મીટર સુધી ડ્રિલિંગ કર્યા બાદ ટનલમાં ફસાયેલા મજૂરો સુધી પહોંચવાનો રસ્તો સરળ બની ગયો છે.

ટનલમાં ફસાયેલા 40 મજૂરોને બચાવવાનું ચાલુ રેસ્ક્યુ ઓપરેશન પીએમઓની દેખરેખ હેઠળ ચાલી રહ્યું છે, તેથી ITBP અને NDRFના જવાનોને ટનલની અંદર તૈનાત કરવામાં આવ્યા છે. અધિકારીઓના જણાવ્યા અનુસાર ડ્રિલિંગ દ્વારા કાટમાળમાં રસ્તો બનાવીને, 800 મીમી અને 900 મીમી વ્યાસની મોટી પાઇપ એક પછી એક એવી રીતે નાખવામાં આવી રહી છે કે બીજી બાજુ ફસાયેલા કામદારોને બહાર લાવવા ‘એસ્કેપ ટનલ’ બનાવવામાં આવી રહી છે.

શ્રમિકોને બહાર કાઢવા માટે તમામ પ્રયાસો કરવામાં આવી રહ્યા છે. હેવી ઓગર મશીન મંગાવવામાં આવ્યું છે. જે સાઇટ પર પહોંચી જતા તેની પૂજા કરવામાં આવી છે. આ મશીન એવુ મશીન છે કે જેનાથી ડ્રિલિંગની કામગીરી સરળ થશે. આ મશીન દ્વારા કામગીરી શરૂ કરતા ટનલમાં ફસાયેલા કામદારોને સુરક્ષિત રીતે બહાર કાઢવાની આશા વધી ગઈ છે. હવે વધુ બચાવ કામગીરીમાં આ મશીનની મદદ લેવામાં આવશે. આ મશીનથી રેસ્ક્યુ ટીમ માટે ડ્રિલિંગ કરવામાં સરળતા રહેશે. આ મશીનની મદદથી 900 એમએમના પાઈપોને એક બાજુથી બીજી તરફ ડ્રિલિંગ કરીને પહોંચાડવાની યોજના બનાવવામાં આવી છે.

 ઉલ્લેખનીય છે કે ફસાયેલા મજૂરોને ખોરાક અને દવાઓનો જરૂરી પુરવઠો પૂરો પાડવામાં આવી રહ્યો છે. બચાવ ટુકડીઓ કામદારો સાથે નિયમિત સંવાદ કરી રહી છે. જેથી તેઓ જુસ્સો અકબંધ રહે અને આશા જીવંત રહે.

ભૂસ્ખલન અને ટેકનિકલ સમસ્યાઓના કારણે બચાવ કાર્યમાં અવરોધ આવી રહ્યા હતા. જે બાદ હવે ત્રણ વિશેષ ભારતીય વાયુસેના વિમાનો ઉત્તરાખંડમાં ત્રણ દિવસથી વધુ સમયથી ટનલમાં અટવાયેલા 40 મજૂરો આશાનુ કિરણ બનીને આવ્યા છે. હવે આ બચાવ અભિયાનમાં થાઈલેન્ડ અને નોર્વેના નિષ્ણાતોની પણ મદદ લેવામાં આવી રહી છે, જેમણે વર્ષ 2018માં ગુફામાં ફસાયેલા બાળકોને બચાવવામાં મદદ કરી હતી. તમને જણાવી દઈએ કે આ ઘટના રવિવારે સવારે ઉત્તરકાશીના ચાર ધામ રોડ પર બની હતી અને 4 દિવસ પછી પણ આ મજૂરોને સુરંગમાંથી બહાર કાઢી શકાયા નથી.

દિલ્હીથી એક વિશેષ મશીન લાવવામાં આવ્યું છે જે એક કલાકમાં 4થી 5 મીટરની અંદર કાટમાળમાં ઘુસી શકે છે. જો બધુ બરાબર રહ્યુ તો 10થી 12 કલાકમાં ફસાયેલા કામદારો સુધી પહોંચવામાં મદદગાર થશે. બચાવકાર્યમાં સામેલ ટીમોએ એક થાઈ કંપનીનો સંપર્ક કર્યો છે કે જેણે 2018 માં ઉત્તર થાઈલેન્ડના ચિયાંગ રાય પ્રાંતમાં ગુફા પ્રણાલી થામ લુઆંગ નાંગ નોનમાં ફસાયેલી જુનિયર એસોસિએશન ફૂટબોલ ટીમને બચાવવામાં મદદ કરી હતી. તે બચાવ પ્રયાસમાં એક અઠવાડિયા કરતાં વધુ સમય લાગ્યો અને તેમાં 10,000 થી વધુ લોકો સામેલ થયા અને અધિકારીઓએ જણાવ્યું કે, કંપનીની કુશળતા અમૂલ્ય હશે. ટનલની અંદર કેવી રીતે કામગીરી કરવી તે અંગેના સૂચનો માટે નોર્વેજીયન જીઓટેકનિકલ સંસ્થા પાસેથી પણ મદદ લેવામાં આવી રહી છે. ભારતીય રેલ્વે અને તેની સાથે સંકળાયેલી સંસ્થાઓ જેમ કે રેલ વિકાસ નિગમ લિમિટેડ, રેલ ઈન્ડિયા ટેકનિકલ એન્ડ ઈકોનોમિક સર્વિસ (આરઆઈટીઈએસ) અને ઈન્ડિયન રેલ્વે કન્સ્ટ્રક્શન ઈન્ટરનેશનલ લિમિટેડના નિષ્ણાતો પાસેથી પણ આવા સૂચનો લેવામાં આવી રહ્યા છે.