- ભારત અને ઓસ્ટ્રેલિયા વચ્ચે રમાશે વર્લ્ડકપની ફાઈનલ મેચ
- રવિવારે અમદાવાદમાં બંને ટીમ આવશે આમને-સામને
- બંને ટીમ શાનદાર ફોર્મમાં છે અત્યારે
ભારત બાદ ઓસ્ટ્રેલિયાએ પણ વર્લ્ડકપ 2023ના ફાઇનલમાં એન્ટ્રી કરી છે. કાંગારૂ ટીમે ગુરુવારે રાત્રે ઈડન ગાર્ડન્સ ખાતે રમાયેલી બીજી સેમીફાઈનલ મેચમાં સાઉથ આફ્રિકાને હરાવીને ફાઇનલમાં જગ્યા બનાવી છે. આ પહેલા બુધવારે ટીમ ઈન્ડિયાએ ન્યૂઝીલેન્ડને હરાવીને ચેમ્પિયન બનવાની દિશામાં આગળ વધી હતી. હવે વર્લ્ડકપ 2023ની ફાઈનલ મેચમાં ફરી એકવાર ભારત અને ઓસ્ટ્રેલિયા ટકરાશે. આ પહેલા 2003માં રમાયેલા વર્લ્ડકપની ફાઇનલમાં પણ બંનેની ટક્કર થઈ હતી. આ મેચમાં ઓસ્ટ્રેલિયા ચેમ્પિયન બન્યું હતું.
વર્લ્ડકપની ફાઇનલ મેચ ક્યારે રમાશે?
ભારત અને ઓસ્ટ્રેલિયા વચ્ચે વર્લ્ડકપ 2023ની ફાઇનલ મેચ રવિવારે 19 નવેમ્બરે રમાશે. ટોસ બપોરે 1.30 વાગ્યે થશે અને મેચનો પહેલો બોલ બપોરે 2 વાગ્યે નાખવામાં આવશે.
ભારત-ઓસ્ટ્રેલિયા ફાઇનલ ક્યાં રમાશે?
વર્લ્ડકપ 2023ની ફાઇનલ મેચ અમદાવાદના નરેન્દ્ર મોદી સ્ટેડિયમમાં રમાશે. આ વિશ્વનું સૌથી મોટું ક્રિકેટ સ્ટેડિયમ છે.
લાઈવ ટેલિકાસ્ટ અને સ્ટ્રીમિંગ ક્યાં જોઈ શકાશે?
વર્લ્ડકપ 2023ની અન્ય તમામ મેચોની જેમ, ભારત-ઓસ્ટ્રેલિયા ફાઇનલ મેચનું પણ વિવિધ ભાષાઓમાં સ્ટાર સ્પોર્ટ્સ નેટવર્કની ચેનલો પર જીવંત પ્રસારણ કરવામાં આવશે. લાઇવ સ્ટ્રીમિંગ Disney+ Hotstar પર ઉપલબ્ધ હશે. આ મેચો મફત ડીટીએચ કનેક્શન પર ડીડી સ્પોર્ટ્સ પર લાઈવ પણ જોઈ શકાય છે.
શાનદાર ફોર્મમાં છે બંને ટીમ
ભારત અને ઓસ્ટ્રેલિયાની બંને ટીમો અત્યારે શાનદાર ફોર્મમાં છે. ટીમ ઈન્ડિયા આ વર્લ્ડકપમાં અત્યાર સુધી અજેય છે અને તેણે તેની તમામ 10 મેચ જીતી છે. બીજી તરફ ઓસ્ટ્રેલિયાએ પણ પ્રથમ બે મેચ હાર્યા બાદ સતત આઠ મેચ જીતીને વર્લ્ડકપની ફાઇનલમાં પ્રવેશ કર્યો છે. બંને ટીમોના તાજેતરના ફોર્મને જોતા સ્પષ્ટ થાય છે કે ફાઇનલ મેચ ખૂબ જ રોમાંચક બનવાની છે.
