- અમેરિકી પ્રમુખ નહીં આવે ભારત
- જો બાઈડેનની ભારત મુલાકાત નહીં થાય
- ક્વાડ મીટિંગની તારીખોને લઈને હજુ અસમંજસ
26 જાન્યુઆરી 2024ના રોજ ભારત તેનો ગણતંત્ર દિવસ ઉજવશે. જો કે આ દિવસે આ વખતે કોણ પરેડમાં પ્રમુખ મહેમાન હશે એ વિષયને લઈને એક મોટા સમાચાર સામે આવ્યા છે. અમેરિકી પ્રમુખ જો બાઈડેન આ દિવસે ભારતના 4 મુખ્ય મહેમાનો તરીકે હાજર રહેવાના હતા. જો કે હવે તે આ કાર્યક્રમમાં ભારત નહીં આવે એવા સમાચાર સામે આવ્યા છે.
આ મામલે વધુ જાણકારી અનુસાર યુએસ પ્રમુખ જો બાઈડેન જાન્યુઆરી 2024માં રિપબ્લિક ડેની ઉજવણીમાં ભાગ લેશે નહીં. એવું કહેવામાં આવી રહ્યું છે કે 2024ના અંતમાં ભારતમાં ક્વાડ સમિટનું આયોજન કરવાનો પ્રસ્તાવ છે. જો કે સૂત્રોએ એમ પણ જણાવ્યું હતું કે ક્વાડ ગ્રુપની મીટિંગનું આયોજન થવાની તારીખો પર હજુ સુધી સહમતિ બની શકી નથી. એટલે કે ભારતમાં યોજાનારી ક્વાડ મીટિંગને લઈને હજુ સુધી તારીખો ફાઈનલ થઈ શકી નથી અને 4 દેશોની વચ્ચે જાન્યુઆરીના અંતમાં પહેલા ક્વાડની મીટિંગ થવાની વિચારણા હતી. જો કે મીટિંગની તારીખો નક્કી ન હોવાથી એવી સંભાવના છે કે હાલમાં જો બાઈડેનનો રિપબ્લિક ડે પરેડમાં આવવાનો કાર્યક્રમ રદ્દ કરાયો છે.
હકીકતે વડા પ્રધાન નરેન્દ્ર મોદીએ મે મહિનામાં જાપાનના હિરોશિમામાં G-7 સમિટની સાઈડલાઈન મીટિંગમાં જાહેરાત કરી હતી કે ભારત આગામી ક્વાડ લીડર્સ સમિટનું આયોજન કરશે. તમને જણાવી દઈએ કે ક્વાડમાં ભારત, ઓસ્ટ્રેલિયા, અમેરિકા, જાપાનનો સમાવેશ થાય છે. જેનો ઉદ્દેશ્ય ઈન્ડો-પેસિફિક પ્રદેશમાં ચીનની દરમિયાનગીરીને ડામી તેને નિયંત્રિત કરવાનો છે. આધિકારિક રીતે ઈંડો પેસેફિક વિભાગના આ 4 મોટા લોકશાહી દેશો દક્ષિણ ચીન સાગર સહિતના સમગ્ર ઈંડો પેસેફિક વિભાગની સુરક્ષા અને સ્વતંત્રતાનું સમર્થન કરે છે અને તેને સુનિશ્ચિત કરવાનો પ્રયાસ કરે છે. આ વિસ્તારમાં ચીનની દરમિયાનગીરી અને દખલઅંદાજી વધતી જઈ રહી છે જેને કાઉન્ટર કરી રોકવા માટે ક્વાડની રચના થઈ હોય તેવું સામાન્યપણે માનવામાં આવે છે.
આમ આગામી જાન્યુઆરીના અંતના દિવસોમાં ભારત ક્વાડ મીટિંગનું આયોજન કરે તે બાબત હજુ કન્ફર્મ થઈ નથી. જેથી આગામી 26 જાન્યુઆરી 2024ના દિવસે અમેરિકી રાષ્ટ્રપતિ જો બાઈડેન ભારતના મહેમાન તરીકે હાજર નહીં રહી શકે તેવી જાણકારી મલ્ટિપલ મીડિયા રિપોર્ટ્સમાં સામે આવી છે. આમ ઓબામા પછી હાલ તો બીજા કોઈ અમેરિકી રાષ્ટ્રપ્રમુખ 26 જાન્યુઆરીની ગણતંત્ર પરેડ અટેન્ડ કરે તેવી શક્યતાઓ હાલના દિવસોમાં ધૂંધળી દેખાઈ રહી છે.
