મોહમ્મદ શમીને અર્જુન એવોર્ડથી કરાયા સન્માનિત, કોહલીએ આપી શુભેચ્છાઓ

• વર્લ્ડ કપ 2023માં શમીનું પ્રદર્શન શાનદાર રહ્યું હતું
  
• શમીએ 7 મેચમાં 24 વિકેટ લીધી હતી
  
• વિરાટ કોહલીએ આપી શુભકામનાઓ
  

ટીમ ઈન્ડિયાના સ્ટાર ફાસ્ટ બોલર મોહમ્મદ શમીને અર્જુન એવોર્ડથી સન્માનિત કરવામાં આવ્યો છે. શમી આ પ્રતિષ્ઠિત એવોર્ડ મેળવનાર 46મો ભારતીય પુરૂષ ક્રિકેટર છે. વર્લ્ડ કપ 2023માં શમીનું પ્રદર્શન શાનદાર રહ્યું હતું અને તેણે ટૂર્નામેન્ટમાં સૌથી વધુ વિકેટ લીધી હતી. શમીએ 7 મેચમાં કુલ 24 વિકેટ લીધી હતી.

શમી અર્જુન એવોર્ડથી સન્માનિત

ભારતીય ટીમના ફાસ્ટ બોલર મોહમ્મદ શમીને દેશના પ્રતિષ્ઠિત અર્જુન એવોર્ડથી સન્માનિત કરવામાં આવ્યો છે. રાષ્ટ્રપતિ દ્રૌપદી મુર્મુએ મોહમ્મદ શમીને અર્જુન એવોર્ડથી સન્માનિત કર્યા. છેલ્લા કેટલાક વર્ષોમાં શમીનું પ્રદર્શન શાનદાર રહ્યું છે. ભારતની ધરતી પર રમાયેલા વર્લ્ડ કપમાં શમીએ ટીમ ઈન્ડિયાને ફાઇનલમાં લઈ જવામાં મહત્વની ભૂમિકા ભજવી હતી.

શમીએ અર્જુન એવોર્ડને લઈને કહી મોટી વાત

અર્જુન એવોર્ડ વિશે ANI સાથે વાત કરતા મોહમ્મદ શમીએ કહ્યું, “આ એવોર્ડ મારા માટે એક સ્વપ્ન સમાન છે, જીવન પસાર થાય છે અને લોકો આ એવોર્ડ જીતી શકતા નથી. મને ખુશી છે કે મને આ એવોર્ડ આપવામાં આવ્યો છે. આ એવોર્ડ મેળવવો મારા માટે એક સ્વપ્ન સમાન છે, કારણ કે મેં મારા જીવનમાં ઘણા લોકોને આ એવોર્ડથી સન્માનિત જોયા છે.” શમીની પોસ્ટ પર વિરાટ કોહલીએ પ્રતિક્રીયા આપી હતી. કોહલીએ શમીને અર્જુન એવોર્ડ મળવા પર શુભકામનાઓ આપી હતી.

વર્લ્ડ કપ 2023 રહ્યો યાદગાર

મોહમ્મદ શમી માટે વર્લ્ડ કપ 2023 એક સ્વપ્ન સાકાર થવાથી ઓછો નહોતો. શમીએ બોલથી તબાહી મચાવી હતી અને તે ટુર્નામેન્ટમાં સૌથી વધુ વિકેટ લેનાર બોલર હતો. શમીએ વર્લ્ડ કપમાં રમાયેલી માત્ર 7 મેચમાં 24 વિકેટ ઝડપી હતી અને દુનિયાભરના બેટ્સમેનોને પરેશાન કરી દીધા હતા. શમીએ ન્યૂઝીલેન્ડ સામે રમાયેલી સેમિફાઇનલ મેચમાં 7 વિકેટ ઝડપી હતી. આ સાથે જ 50 ઓવરના વર્લ્ડ કપમાં ભારત તરફથી સૌથી વધુ વિકેટ લેવાનો રેકોર્ડ પણ શમીના નામે નોંધાઈ ગયો છે. શમીએ આ મામલે ઝહીર ખાનને પાછળ છોડી દીધો હતો.

આ ખેલાડીઓને અર્જુન એવોર્ડથી પણ સન્માનિત કરવામાં આવ્યા હતા

અર્જુન એવોર્ડ- ઓજસ પ્રવીણ દેવતલે (તીરંદાજી), અદિતિ ગોપીચંદ સ્વામી (તીરંદાજી), શ્રીશંકર (એથ્લેટિક્સ), પારૂલ ચૌધરી (એથ્લેટિક્સ), મોહમ્મદ હુસામુદ્દીન (બોક્સિંગ), આર વૈશાલી (ચેસ), અનુષ અગ્રવાલ (ઘોડેસવારી), દિવ્યકૃતિ સિંઘ (ઘોડેસવારી ડ્રેસેઝ), દીક્ષા ડાગર (ગોલ્ફ), કૃષ્ણ બહાદુર પાઠક (હોકી), સુશીલા ચાનુ (હોકી), પવન કુમાર (કબડ્ડી), રિતુ નેગી (કબડ્ડી), નસરીન (ખો-ખો), પિંકી (લૉન બોલ્સ), ઐશ્વર્યા પ્રતાપ સિંહ તોમર (શૂટિંગ), ઈશા સિંઘ (શૂટિંગ), હરિન્દર પાલ સિંહ સંધુ (સ્ક્વોશ), અહિકા મુખર્જી (ટેબલ ટેનિસ), સુનિલ કુમાર (કુસ્તી), આનંદ પંખાલ (કુસ્તી), નૌરેમ રોશિબિના દેવી (વુશુ), શીતલ દેવી (પેરા તીરંદાજ), ઇલુરી અજમ કુમાર (બ્લાઇન્ડ ક્રિકેટ), પ્રાચી યાદવ (પેરા કેનોઇંગ).