હિમાચલ, કાશ્મીરમાં બરફવર્ષાથી સામાન્ય જનજીવન ખોરવાઇ ગયું

• હિમાચલના 518 રસ્તા, ચાર નેશનલ હાઇવે બંધ કરાયા
• શ્રીનગરથી તમામ ફ્લાઇટ્સ રદ : ગુલમર્ગમાં લઘુતમ તાપમાન -7
  
• વીજળી અને પીવાના પાણીના પુરવઠાને પણ અસર થઇ છે
  

હિમાચલપ્રદેશમાં વેસ્ટર્ન ડિસ્ટર્બન્સની અસર હેઠળ ભારે બરફવર્ષાથી જનજીવન ઠપ થઇ ગયું છે. રાજ્યના 518 રસ્તા અને ચાર નેશનલ હાઇવે બંધ છે. વીજળી અને પીવાના પાણીના પુરવઠાને પણ અસર થઇ છે. 478 વીજ ટ્રાન્સફોર્મર ઠપ છે જ્યારે પીવાના પાણીના 57 પ્રોજેક્ટને અસર થઇ છે. લગભગ સમગ્ર રાજ્યમાં લઘુતમ તાપમાનમાં ઘટાડો નોંધાયો છે. શનિવારથી રાજ્યના મોટાભાગના ક્ષેત્રોમાં વરસાદ અને બરફવર્ષા જારી છે. રવિવારે સવારે રાજ્યમાં ગાઢ ધુમ્મસ છવાયું હતું. કાશ્મીર ખીણમાં પણ શ્રીનગર અને ગાંદરબલ સહિત ઘણા ભાગોમાં ભારે બરફવર્ષા સાથે લઘુતમ તાપમાનમાં ઘટાડો નોંધાયો છે. રવિવારે શ્રીનગર એરપોર્ટથી તમામ ફ્લાઇટ્સ રદ કરાઇ હતી. ઉત્તર કાશ્મીરના જાણીતા સ્કી રિસોર્ટ ગુલમર્ગમાં લઘુતમ તાપમાન -7 ડિગ્રી સે. અને પહલગામમાં -3.5 ડિગ્રી સે. નોંધાયું હતું.

હિમાચલપ્રદેશમાં પાટનગર સિમલાથી અપર હિમાચલ તરફના મુખ્ય રસ્તા બંધ છે. NH-5, NH-705, સ્ટેટ હાઇવે-8 અને સ્ટેટ હાઇવે-13 બંધ કરાયા છે. મનાલીમાં પણ ભારે બરફવર્ષા જારી છે. મનાલીમાં ભારે બરફવર્ષાથી વાહનવ્યવહાર અને વીજ પુરવઠો પાંચ દિવસથી ખોરવાયેલો છે. રાજ્યના ઊંચાણવાળા ક્ષેત્રોમાં પણ બરફવર્ષા જારી છે. છેલ્લા 24 કલાકમાં કલ્પામાં 5.6 સે.મી., ભરમૌરમાં પાંચ સે.મી., કેલાંગમાં ત્રણ, કુફરીમાં બે તથા સાંગલા અને પૂહમાં એક-એક સે.મી. બરફ પડયો હતો. શિમલા જિલ્લામાં 161 જ્યારે લાહૌલ સ્પિતિમાં 157 રસ્તા બંધ છે. એકંદરે ભારે બરફવર્ષાથી હિમાચલના ઘણા જિલ્લાઓમાં જનજીવન ખોરવાઇ ગયું છે.

હિમાચલ અને કાશ્મીરમાં રસ્તા પરથી બરફ હટાવી રસ્તા વાહનવ્યવહાર માટે ખુલ્લા કરવા યુદ્ધના ધોરણે કામગીરી હાથ ધરાઇ છે. કાશ્મીરના પર્વતાળ વિસ્તારોમાં સત્તાવાળાઓએ હિમપ્રપાતની ચેતવણી જારી કરી સ્થાનિકોને આગામી 24 કલાક માટે ઘરની બહાર નીકળવાનું બને ત્યાં સુધી ટાળવા અનુરોધ કર્યો છે.