ધારાસભ્યના નિવેદનથી પક્ષમાં જ સખળ ડખળના એંધાણ
ભાજપમાં જ્ઞાતિ આધારિત બળવાનો પડકાર
દિગ્ગજ નેતાઓના પોત પોતાના જૂથ સક્રિય થયા હોવાની ચર્ચા : પાટીદાર મુખ્યમંત્રી જાળવી રાખવા લોબિંગ શરૂ : કોળી સમાજમાં જ તડા, પ્રવિણ માળીના નિવેદન સામે બાવળિયા જૂથનો મોરચો
કોળી સમાજ બાદ ખારવા સમાજ પણ મેદાનમાં આવ્યો : સોમનાથ બેઠક પર અન્યાયના આક્ષેપ : ચૂંટણી પહેલા ગરમાવો
અગ્ર ગુજરાત, રાજકોટ
ગુજરાતના રાજકારણમાં ફરી એકવાર મુખ્યમંત્રી પદ અને ભાજપના આંતરિક જૂથવાદને લઈને ચર્ચાઓ તેજ બની છે. વડાપ્રધાન નરેન્દ્ર મોદીની ગુજરાત મુલાકાત બાદ રાજ્યમાં નેતૃત્વ પરિવર્તન અને મંત્રીમંડળમાં ફેરફારની અટકળો વચ્ચે ભાજપના અલગ-અલગ જૂથોની સક્રિયતા ચર્ચાનો વિષય બની છે. પૂર્વ મુખ્યમંત્રી આનંદીબેન પટેલ અને કેન્દ્રીય ગૃહમંત્રી અમિત શાહના સમર્થકો વચ્ચે રાજકીય ખેંચતાણ હોવાની ચર્ચા પણ રાજકીય વર્તુળોમાં ચાલી રહી છે.
ઉત્તર પ્રદેશના રાજ્યપાલ તરીકે આનંદીબેન પટેલનો કાર્યકાળ પૂર્ણ થવાની નજીક હોવાની ચર્ચા વચ્ચે તેમના ગુજરાત પરત ફરવાની અટકળો પણ થઈ રહી છે. આ દરમિયાન તેમની પુત્રી અનાર પટેલનું નામ ગુજરાતના મુખ્યમંત્રી પદના સંભવિત દાવેદાર તરીકે ચર્ચામાં આવ્યું છે.
અનાર પટેલને ખોડલધામ સંગઠનમાં મોટી જવાબદારી મળ્યા બાદ પાટીદાર સમાજમાં તેમની રાજકીય ભૂમિકા અંગે પણ ચર્ચા શરૂ થઈ છે. જોકે, અનાર પટેલને મુખ્યમંત્રી બનાવવાની કોઈ સત્તાવાર જાહેરાત કે પુષ્ટિ થઈ નથી. રાજકીય ચર્ચાઓમાં એવો સવાલ પણ ઉઠાવવામાં આવી રહ્યો છે કે જો જય શાહ આંતરરાષ્ટ્રીય ક્રિકેટ કાઉન્સિલ (ICC)ના ચેરમેન બની શકે તો અનાર પટેલને મુખ્યમંત્રી પદની તક કેમ ન મળે?
બીજી તરફ, અમિત શાહ ગુજરાતના રાજકીય સમીકરણોમાં પોતાની ભૂમિકા જાળવી રાખવા સક્રિય હોવાની ચર્ચાઓ થઈ રહી છે. રાજકીય વર્તુળોમાં હર્ષ સંઘવીનું નામ પણ આગામી મુખ્યમંત્રી તરીકે સંભવિત દાવેદારના રૂપમાં લેવામાં આવી રહ્યું છે. આ દરમિયાન ભાજપના વરિષ્ઠ ધારાસભ્ય પબુભા માણેકે કોળી સમાજમાંથી મુખ્યમંત્રી બનાવવાની માગણી કરતાં રાજકીય ચર્ચાને નવો વળાંક આપ્યો છે. આ નિવેદન બાદ રાજ્યમાં પાટીદાર અને કોળી સમાજના નેતૃત્વને લઈને રાજકીય સમીકરણો અંગે ચર્ચા વધી છે. જોકે, ભાજપના મોવડી મંડળે હજુ સુધી કોઈ નામ જાહેર કર્યું નથી.
રાજકીય વર્તુળોમાં એવી પણ ચર્ચા છે કે પાટીદાર નેતાઓ વર્તમાન મુખ્યમંત્રી ભૂપેન્દ્ર પટેલના નેતૃત્વને જાળવી રાખવા અથવા આગામી સમયમાં પણ પટેલ સમાજના નેતાને મુખ્યમંત્રી પદે રાખવા માગે છે. બીજી તરફ કોળી સમાજમાંથી મુખ્યમંત્રી બનાવવાની માગ પણ ચર્ચામાં છે.
વિધાનસભાની આગામી ચૂંટણીને ધ્યાનમાં રાખીને ભાજપમાં જ્ઞાતિગત સમીકરણો અને નેતૃત્વના પ્રશ્નો મહત્ત્વના બની શકે છે. જોકે, મુખ્યમંત્રી બદલવા, અનાર પટેલને જવાબદારી આપવા કે હર્ષ સંઘવીની પસંદગી કરવા અંગેની વાતો હાલ અટકળો સુધી જ સીમિત છે. અંતિમ નિર્ણય ભાજપનું કેન્દ્રીય નેતૃત્વ જ લેશે.
ગીર સોમનાથ જિલ્લાની અત્યંત મહત્વપૂર્ણ ગણાતી સોમનાથ વિધાનસભા બેઠક પર ખારવા સમાજે પોતાના જ સમાજના ધારાસભ્યની પ્રબળ માંગ કરતા સ્થાનિક અને રાજ્યના રાજકારણમાં મોટો ટ્વિસ્ટ આવ્યો છે. સમાજના અગ્રણી રિતેશ ફોફંડી એ સોશિયલ મીડિયા પર એક પોસ્ટ મૂકીને આ સમગ્ર મુદ્દાને ખુલ્લી ચર્ચાના કેન્દ્રમાં લાવી દીધો છે. રિતેશ ફોફંડીએ પોતાની પોસ્ટમાં સમાજની લાગણીને વાચા આપતા સ્પષ્ટપણે ઉલ્લેખ કર્યો છે કે, ‘આ કોઈ એક વ્યક્તિની અંગત રાજકીય મહત્વાકાંક્ષા નથી, પરંતુ આ સમગ્ર ખારવા સમાજની સામૂહિક માંગ છે કે આગામી વિધાનસભા ચૂંટણીમાં સોમનાથ બેઠક પરથી ખારવા સમાજનો જ ધારાસભ્ય હોવો જરૂરી છે.’ તેમની આ પોસ્ટ બાદ રાજકીય વર્તુળોમાં અનેક તર્ક-વિતર્ક શરૂ થઈ ગયા છે.
પ્રવીણ કોળી દ્વારા કરવામાં આવેલી નિવૃત્તિની માંગના વિરોધમાં બોટાદ જિલ્લાના કોળી સમાજના આગેવાનો અને કુંવરજી બાવળિયાના સમર્થકોએ એક વિશેષ બેઠકનું આયોજન કર્યું હતું. આ બેઠકમાં મોટી સંખ્યામાં ઉપસ્થિત સમાજના લોકોએ પ્રવીણ કોળીના નિવેદનને સખત શબ્દોમાં વખોડી કાઢ્યું હતું અને તેમની સામે સામાજિક બળવો પોકાર્યો હતો. સમર્થકોએ સ્પષ્ટપણે જણાવ્યું હતું કે, કુંવરજી બાવળિયાએ વર્ષો સુધી સમાજના ઉત્થાન અને વિકાસ માટે કામ કર્યું છે, ત્યારે તેમના વિશે આ પ્રકારની ટિપ્પણી કોઈપણ સંજોગોમાં સાંખી લેવામાં આવશે નહીં.
બોટાદ ખાતે યોજાયેલી આ બેઠકમાં આગેવાનોએ આક્રમક અંદાજમાં પ્રવીણ કોળીને વળતો જવાબ આપ્યો હતો. બેઠકમાં એક જ સૂર ઉઠ્યો હતો કે, કુંવરજી બાવળિયાને નિવૃત્તિની નહીં, પરંતુ તેમના વિરોધીઓને યોગ્ય શિખામણ આપવાની જરૂર છે. સમર્થકોએ પ્રવીણ કોળી સામે મોરચો માંડીને કુંવરજી બાવળિયાને મજબૂત પીઠબળ પૂરું પાડવાનો નિર્ધાર વ્યક્ત કર્યો હતો. સમાજના વડીલો અને યુવાનોએ એકજૂથ થઈને બાવળિયાની નેતાગીરીમાં અતૂટ વિશ્વાસ વ્યક્ત કર્યો હતો.
‘આંદોલનને લઈને મને કોઈ રંજ નથી’
દિનેશ બાંભણિયાના આ નિવેદન બાદ હાર્દિક પટેલે પોતાની પ્રથમ પ્રતિક્રિયા આપતાં જણાવ્યું હતું કે બાંભણિયાનું નિવેદન તેમનો વ્યક્તિગત અભિપ્રાય છે. આંદોલન કોઈ એક વ્યક્તિને હટાવવા માટે નહોતું પરંતુ સમાજના હિત માટે કરવામાં આવ્યું હતું. હાર્દિક પટેલે વધુમાં દાવો કર્યો હતો કે આનંદીબેન પટેલે પાટીદાર અનામત આંદોલનના કારણે મુખ્યમંત્રી પદેથી રાજીનામું આપ્યું નહોતું. આંદોલનનો હેતુ કોઈને નુકસાન પહોંચાડવાનો કે સત્તા પરથી હટાવવાનો નહોતો. તેમણે જણાવ્યું કે આંદોલન એ સમગ્ર સમાજનું આયોજન હતું અને સમાજના હિત માટે લડત ચલાવવામાં આવી હતી. તેથી આંદોલનને લઈને તેમને કોઈપણ પ્રકારનો અફસોસ કે રંજ નથી.


