મેયરના વોર્ડમાં એક મહિનાથી પાણીનો બગાડ
ઢેબર રોડ પર લાઈનમાં ભંગાણ થતા લાખો લિટર પાણી નદીની જેમ રોડ પર વહી ગયું
પાણીનો વેડફાટ બંધ કરાવવા કોંગ્રેસ પ્રવક્તા ગજેન્દ્રસિંહ ઝાલાની ઇજનેરોને રજૂઆત
અગ્ર ગુજરાત, રાજકોટ
રાજકોટમાં વરસાદ ઓછો પડતા જળસંકટ ઘેરાયું હતું અને મનપા દ્વારા નર્મદાનીર મંગાવવામાં આવી રહ્યું છે. ત્યારે જળ બચાવવાની અપીલ કરતા મેયરના વોર્ડ નં.૭માં જ એક મહિનાથી પાણીનો વેડફાટ થઇ રહ્યો હોવાના આક્ષેપ કોંગ્રેસ નેતા ગજેન્દ્રસિંહ ઝાલા અને પૂર્વ નગરસેવક દિલીપભાઇ આસવાણી દ્વારા કરવામાં આવ્યા છે. હજારો લીટર પાણીનો બગાડ થતા તંત્રની કામગીરી સામે પણ સવાલો કરવામાં આવ્યા છે.
રાજકોટ મહાનગરપાલિકામાં પાણીની લાઈનોમાં થતા ભંગાણમાં સમય મર્યાદામાં પાણીની લાઈનો મરામત ન થતી હોવાના પગલે મોંઘા દાટ નર્મદાના પાણીનો લાખો લિટરનો વેડફાટ થાય છે. ત્યારે દેશના વડાપ્રધાન અને રાજ્યના મુખ્યમંત્રી અને મેયર અવારનવાર પોતાના વક્તવ્યો માં પાણી બચાવવા અંગે કોર્પોરેશન અને આમ નાગરિકને અપીલ કરી ચૂક્યા છે અને પાણીની બુંદ બુંદ બચાવો પાણી તમને બચાવશે સુત્રો આપી ચૂક્યા છે પરંતુ ખુદ રાજકોટ મહાનગરપાલિકા નું રેઢીયાળ તંત્ર પાણીની મરામત કરવામાં બેદરકારી અને લાપરવાહી દાખવતું હોવાનું પ્રકાશમાં આવેલ છે. વડાપ્રધાન અને મુખ્યમંત્રીની સલાહનું સુરસુરિયું રાજકોટ મહાનગરપાલિકા દ્વારા થઈ રહ્યું છે.
પ્રાપ્ત વિગતો મુજબ ગઈકાલે રૈયા રોડ વોર્ડ નંબર એકમાં પ્રમુખસ્વામી ઓડિટોરિયમ સામે તુલસી બંગલોના ખૂણા પાસે પાણીની લાઈન લીકેજ હોવાથી હજારો લિટર પાણીનો ફેરફાર થયો હતો જો કે આ લાઈન પેટા લાઈન હોવાથી વિતરણ વ્યવસ્થામાં કોઈ અવ્યવસ્થા સર્જાઇ નહોતી. બીજા બનાવમાં મેયરના વોર્ડ નંબર 7ના ઢેબર રોડ પર વિજય પ્લોટ 22 અક્ષય રેડીએટર્સ ની બાજુમાં 24 કલાક પાણીની જે લાઈન છે તેમાં ભંગાણ થયું હતું અને હજારો લિટર પાણી વહી ગયું હતું ઢેબર રોડ ઉપર પાણીની રેલમછેલ થઈ હતી અને એકાદ કિલોમીટર સુધી પાણીના ખાબોચિયા ભરાયા હતા. જે પગલે ગજેન્દ્રસિંહ ઝાલા ને બાતમી મળતા તેઓ સ્થળ પર પહોંચ્યા હતા અને સ્થળ પરથી રાજકોટ મહાનગરપાલિકાના કોલ સેન્ટર માં ફરિયાદ નંબર 26451141 થી ફરિયાદ કર્યા બાદ સેન્ટ્રલ ઝોનના સીટી અતુલ રાવલને અને વોર્ડ નંબર 7ના ડેપ્યુટી ઇજનેર જીગ્નેશ સોલંકી ને પાણીના વેડફાટ તાત્કાલિક બંધ કરાવવા ઉગ્ર રજૂઆત કરવામાં આવી હતી.
સ્થળ પરથી જાણવા મળ્યું કે અહીં એકાદ માસથી આ પ્રકારે પાણીનો વેડફાટ થાય છે. અહીં સવાલ એ છે કે જો એકાદ મહિનાથી શહેરના મુખ્ય રસ્તા ઢેબર રોડ પર કે જ્યાંથી હજારો માણસોની રોજ બ રોજ અવરજવર રહે છે ત્યાં જ જો પાણીનો આ રીતે વેડફાટ થતો હોય તો રાજકોટ મહાનગરપાલિકાના જવાબદાર ઇજનેરો કે કોન્ટ્રાક્ટર ઉપર બેદરકારી અને લાપરવાહી દાખવવા બદલ પેનલ્ટી (દંડનીય) કાર્યવાહી થવી જોઈએ અને શોકોઝ નોટિસ પણ મળવી જોઈએ. શહેરમાં આઇવે પ્રોજેક્ટ હેઠળ લગાવેલા કેમેરામાં થુંકનારા અને ટ્રાફિકનો સામાન્ય ગુનો કરતાં સીસી ફૂટેજ કેમેરામાં આવી જાય છે. એવા પ્રજાજનોને તોતિંગ દંડ વસૂલવામાં આવી રહ્યા છે. ત્યારે આ પાણીના વેડફાટ ના કિસ્સામાં પણ જવાબદારી ફિક્સ થવી જોઈએ અને પેનલ્ટી કરવી જોઈએ એવી અમારી માંગ છે.


